ប.ស.ស ព្រមានប្តឹងលោក រ៉ុង ឈុន ទៅតុលាការ
បេឡាជាតិរបបសន្តិសុខសង្គម ហៅកាត់ថា ប.ស.ស កាលពីម្សិលមិញ បានប្រកាសប្តឹង លោក រ៉ុង ឈុន ទៅតុលាការ បន្ទាប់ពីប្រធានសហភាពសហជីពកម្ពុជារូបនេះ ចេញសេចក្តីថ្លែងការណ៍មួយមានខ្លឹមសារថា ប.ស.ស គេចវេសមិនទទួលខុសត្រូវ ចំពោះកម្មករ និយោជិត ដែលជួបគ្រោះថ្នាក់ការងារតទៅទៀត។ ប៉ុន្តែលោក រ៉ុង ឈុន អះអាងថា អ្វីដែលលោកបានលើកឡើង គឺគ្រាន់តែជាការបញ្ចេញមតិបង្ហាញពីកង្វល់ដើម្បីការពារផលប្រយោជន៍កម្មករតែប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:១២
នៅក្នុងលិខិតបដិសេធ អ្នកនាំពាក្យបេឡាជាតិរបបសន្តិសុខសង្គម (ប.ស.ស) បានអះអាងថា ខ្លួននៅតែរក្សាជំហរទទួលខុសត្រូវចំពោះកម្មករ និយោជិត តែព្រមានប្តឹង លោក រ៉ុង ឈុន ទៅកាន់តុលាការដើម្បីចាត់វិធានការតាមច្បាប់។
បើតាម ប.ស.ស ករណីកម្មករ និយោជិត ដែលមានបញ្ហាសុខភាព សន្លប់ជាបុគ្គល (ម្នាក់ ឬពីរនាក់) និងសន្លប់ជាសមូហភាព (ច្រើននាក់) ទោះបញ្ហាសន្លប់នោះ ពាក់ព័ន្ធនឹងការងារ ឬមិនពាក់ព័ន្ធនឹងការងារក្តី ក៏កម្មករ និយោជិត អាចទទួលសេវាព្យាបាល និងថែទាំងវេជ្ជសាស្រ្តនៅគ្រប់មជ្ឈដ្ឋានសុខាភិបាលដែលបានចុះកិច្ចព្រមព្រៀងជាមួយ ប.ស.ស ដោយឥតបង់ថ្លៃ។
ប្រតិកម្មតបភ្លាមៗរបស់ ប.ស.ស នៅថ្ងៃតែមួយបែបនេះ គឺបន្ទាប់ពី លោក រ៉ុង ឈុន បានចេញសេចក្តីថ្លែងការណ៍មួយនៅថ្ងៃទី១៩ខែឧសភា ដោយសម្តែងការសោកស្តាយចំពោះសេចក្តីជូនដំណឹងរបស់ ប.ស.ស កាលពីថ្ងៃទី១៧ ខែឧសភា ពាក់ព័ន្ធនឹងការបែងចែកការទទួលខុសត្រូវលើកម្មករដួលសន្លប់។ បើតាម លោក រ៉ុង ឈុន សេចក្តីជូនដំណឹងរបស់ ប.ស.ស នេះ ជាការគេចវេសមិនទទួលខុសត្រូវចំពោះកម្មករ និយោជិត ដែលមានបញ្ហានៅកន្លែងធ្វើការ ឬម៉ោងធ្វើការ និងផ្ទុយពីអ្វីដែលលោកនាយករដ្ឋមន្រ្តី ហ៊ុន សែន ដែលបាន និងកំពុងចុះជួបកម្មករ និយោជិត។
យ៉ាងណាក៏ដោយ បេឡាជាតិរបបសន្តិសុខសង្គម បានចាត់ទុកសេចក្តីថ្លែងការណ៍របស់ លោក រ៉ុង ឈុន ថាមានខ្លឹមសារផ្ទុយទាំងស្រុងពីសេចក្តីជូនដំណឹងរបស់ ប.ស.ស ចុះថ្ងៃទី១៧ ខែឧសភា ឆ្នាំ២០១៨។ ជាសេចក្តីជូនដំណឹងដែល ប.ស.ស បានបែងចែកការទទួលខុសត្រូវជាពីរករណី។ ករណីទី១ កម្មករ និយោជិត សន្លប់ជាបុគ្គលនៅកន្លែងការងារឬម៉ោងធ្វើការគឺត្រូវទទួលបានការព្យាបាលក្រោមរបបសន្តិសុខសង្គមផ្នែកថែទាំសុខភាពវិញ។ ករណីទី២ ការសន្លប់ច្រើនតៗគ្នា ក្នុងសហគ្រាសដែលបណ្តាលមកពីបរិយាកាសការងារ គឺកម្មករ និយោជិតត្រូវទទួលបានការព្យាបាល ក្រោមរបបសន្តិសុខសង្គម ផ្នែកហានិភ័យការងារ។
ចំពោះករណីដែល ប.ស.ស ព្រមានប្តឹងទៅតុលាការនោះ លោក រ៉ុង ឈុន អះអាងថាអ្វីដែលលោកបានលើកឡើងគឺគ្រាន់តែជាការបញ្ចេញមតិបង្ហាញពីកង្វល់ដើម្បីការពារផលប្រយោជន៍កម្មករតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ