រដ្ឋាភិបាលបង្កើតឧទ្យានជាតិសមុទ្រដំបូងក្នុងភូមិសាស្ត្រខេត្តព្រះសីហនុនិងខេត្តកោះកុង
រដ្ឋាភិបាលកម្ពុជានៅថ្ងៃទី៨ខែកុម្ភៈនេះ បានសម្រេចបង្កើតឧទ្យានជាតិសមុទ្រកោះរ៉ុងជាផ្លូវការ ដែលក្នុងនោះមានកោះជាច្រើនត្រូវបានរាប់បញ្ចូលផងដែរទៅក្នុងឧទ្យានជាតិសមុទ្រនេះ។ ការដាក់ប្រជុំកោះជាច្រើនបង្កើតបានជាឧទ្យានជាតិសមុទ្រជាលើកដំបូងនេះ គឺដើម្បីធានាការថែរក្សា និងការពារសោភ័ណ្ឌភាពធម្មជាតិ វប្បធម៌ ប្រព័ន្ធអេកូឡូស៊ីនិងជីវៈចម្រុះ លើកោះនិងបរិវេណសមុទ្រជុំវិញ។
ចុះផ្សាយនៅថ្ងៃ៖
ស្តាប់ - ០២:១៨
នៅក្នុងអនុក្រិត្យដែលរួមមាន៧មាត្រា និងចុះហត្ថលេខាដោយលោកនាយករដ្ឋមន្ត្រីហ៊ុន សែន ឧទ្យានជាតិសមុទ្រកោះរ៉ុងត្រូវបានរាប់បញ្ជូលកោះជាច្រើន ដូចជាកោះរ៉ុង កោះរ៉ុងសន្លឹម កោះកូន កោះតូច កោះតាទៀម កោះម្នាស់ក្រៅ កោះម្នាស់ក្នុង និងសមុទ្រជុំវិញ ដែលមានផ្ទៃក្រឡាសរុបជាង ៥២ ០០០ ហិចតា។ តំបន់អភិរក្សនេះ ស្ថិតនៅក្នុងភូមិសាស្ត្រខេត្តព្រះសីហនុ និងខេត្តកោះកុង ដែលមានផ្ទៃដីទំហំជាង ៥ ០០០ ហិចតា និងផ្ទៃទឹកទំហំជាង៤៧ ០០០ ហិចតា។
ក្រៅពីក្នុងគោលដៅថែរក្សានិងការពារតំបន់នេះ គោលបំណងផ្សេងទៀតក៏ត្រូវបានផ្តោតផងដែរ ដូចជាផ្តល់ផលិតផលនិងសេវាកម្មធម្មជាតិសម្រាប់ការប្រើប្រាស់ប្រកបដោយនិរន្តរភាព រក្សាលំនឹងបរិស្ថាន ការពារ និងអភិរក្សធនធានធម្មជាតិ និងរួមចំណែកកាត់បន្ថយការប្រែប្រួលអាកាសធាតុ និងហានិភ័យគ្រោះមហន្តរាយធម្មជាតិ។
លើសពីនេះ ក៏ជាការលើកកម្ពស់ការចូលរួមរបសសហគមន៍មូលដ្ឋានក៏ដូចជាសាធារណជនក្នុងការរួមចំណែកដល់ការគ្រប់គ្រង ការការពារ និងការអភិរក្សជីវៈចម្រុះ និងធនធានធម្មជាតិក្នុងតំបន់។ ទោះយ៉ាងណា មាត្រា៣នៃអនុក្រិត្យ បញ្ជាក់ថាផ្ទៃដីតំបន់ឧទ្យានជាតិសមុទ្រកោះរ៉ុងនេះ មិនបញ្ចូលដីកម្មសិទ្ធិឯកជន និងដីប្រើប្រាស់ជាប្រយោជន៍សាធារណៈទេ។
ជាមួយគ្នានេះ អនុក្រិត្យបានផ្តល់សិទ្ធិឲ្យក្រសួងបរិស្ថាន មានសមត្ថកិច្ចរៀបចំ និងគ្រប់គ្រងឧទ្យានជាតិសមុទ្រកោះរ៉ុងនេះ ដោយសហការជាមួយស្ថាប័នពាក់ព័ន្ធ និងរដ្ឋបាលដែនដីខេត្តព្រះសីហនុ និងកោះកុង ដើម្បីធានាកិច្ចគាំពារបរិស្ថាន ការអភិរក្សជីវៈចម្រុះ និងការប្រើប្រាស់ធនធានធម្មជាតិប្រកបដោយនិរន្តរភាព។
សូមបញ្ជាក់ថា គិតត្រឹមឆ្នាំ២០១៦ ប្រទេសកម្ពុជាមានឧទ្យានជាតិដីគោកចំនួន១២តំបន់រួចមកហើយ ដោយក្នុងនោះឧទ្យានជាតិចំនួន៧ បានបង្កើតឡើងដោយព្រះរាជក្រឹត្យ និងទីតាំងចំនួន៥តំបន់ទៀតត្រូវបានបង្កើតឡើងដោយអនុក្រឹត្យ។ បើតាមក្រសួងបរិស្ថាន ឧទ្យានជាតិទាំង១២តំបន់នេះ បានគ្រប់ដណ្តប់លើផ្ទៃដីសរុបជាង១.៧ លានហិកតា ដែលផ្ទៃដីទាំងនេះ ស្ថិតក្នុងភូមិសាស្ត្រខេត្តកំពង់ស្ពឺ កោះកុង កំពត ពោធិ៍សាត់ សៀមរាប រតនគិរី ខេត្តព្រះសីហនុ និងខេត្តស្ទឹងត្រែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ