កម្ពុជា

កម្ពុជា ឡាវ និងវៀតណាម កំពុងពិភាក្សាគ្នាពីកិច្ចព្រមព្រៀងពាណិជ្ជកម្ម

តំណាងមន្ត្រីរដ្ឋាភិបាលកម្ពុជា ឡាវ និងវៀតណាមបានកំពុងពិភាក្សាគ្នាពីកិច្ចព្រមពៀងជំរុញ និងសម្រួលពាណិជ្ជកម្ម នៅក្នុងខេត្ត Dak Lak ប្រទេសវៀតណាម។ កិច្ចប្រជុំនេះត្រូវបានធ្វើឡើងចាប់តាំងពីថ្ងៃចន្ទ ទី ១៨ មេសាម្សិលមិញ និងបន្តរហូតដល់ថ្ងៃពុធទី ២០ មេសា។ មន្ត្រីរដ្ឋាភិបាលកម្ពុជារំពឹងថា កិច្ចព្រមព្រៀងពាណិជ្ជកម្មនេះ នឹងអាចឈានទៅបញ្ចប់ និងចុះហត្ថលេខាបាន នៅចុងឆ្នាំ២០១៦នេះ។

ចុះផ្សាយនៅថ្ងៃ៖ 19/04/2016 - 09:22កែប្រែថ្ងៃទី៖ 19/04/2016 - 12:37

ផ្សាយពាណិជ្ជកម្ម

កម្ពុជា ឡាវ និងវៀតណាម បានកំពុងតែរៀបចំកិច្ចពិភាក្សាស្តីពីកិច្ចព្រមព្រៀងជំរុញ និងសម្រួលពាណិជ្ជកម្មនៅក្នុងតំបន់ត្រីកោណរវាងប្រទេសទាំងបី Cambodia- Laos-Vietnam (CLV) Development Triangle Area នៅក្នុងខេត្ត Lak Dak របស់វៀតណាម។ កិច្ចពិភាក្សានេះត្រូវបានធ្វើឡើងដើម្បីជំរុញ និងដោះស្រាយរាល់បញ្ហានានា និងព្យាយាមធ្វើយ៉ាងណាពន្លឿនឲ្យមានការចុះហត្ថលេខាលើកិច្ចព្រមព្រៀងការអភិវឌ្ឍពាណិជ្ជកម្មនៅក្នុងតំបន់ត្រីកោណរវាងប្រទេសទាំងបីនេះ ដែលជាតំបន់មួយសំបូរទៅដោយប្រជាពលរដ្ឋក្រីក្ររស់នៅ។

លោក ណុប សោភ័ណតារា ប្រធាននាយកដ្ឋានអាស៊ីបាស៊ីហ្វិកនៃក្រសួងពាណិជ្ជកម្មកម្ពុជា បានបញ្ជាក់ប្រាប់វិទ្យុបារាំងថាកិច្ចពិភាក្សានៅពេលនេះ គឺជាកិច្ចពិភាក្សាលើកទី៥ហើយ។ ហើយត្រូវបានធ្វើឡើងដើម្បីជំរុញ និងសម្រួលការអភិវឌ្ឍនៅក្នុងតំបន់ត្រីកោណនេះ។ លោកបានបន្តថា កិច្ចពិភាក្សានេះនឹងព្យាយាមធ្វើយ៉ាងណាសម្រួលឲ្យមានការឆ្លងកាត់ងាយស្រួល និងព្យាយាមទាក់ទាញទាំងវិនិយោគិនក្នុងស្រុក និងក្រៅស្រុក មកកាន់តំបន់ត្រីកោណនេះ ឲ្យបានច្រើនតាមដែលអាចទៅរួច។

គួរជម្រាបជូនថា តំបន់ត្រីកោណរវាងប្រទេសទាំងបីមានខេត្តចំនួន ១៣ ដែលនៅក្នុងនោះកម្ពុជាមានខេត្ត រតនៈគិរី ស្ទឹងត្រែង មណ្ឌលគិរី និងក្រចេះ។ ប្រទេសឡាវមានខេត្ត Attapeu, Salavan, Sekong, និងខេត្ត Champasak ។ រីឯនៅវៀតណាមវិញ គឺមានខេត្ត Kon Tum, Gia Lai, Dak Lak, Dak Nong និងខេត្ត Binh Phuoc។ ពាណិជ្ជកម្មដែលឆ្លងកាត់តំបន់នេះភាគច្រើន គឺជាពាណិជ្ជកម្មកសិឧស្សាហកម្ម។

លោកណុប សោភ័ណតារា បានបន្តឲ្យដឹងទៀតថា កិច្ចភិភាក្សានេះត្រូវបានធ្វើឡើងរយៈពេល៥ដងមកហើយ។ ហើយនៅលើកទី៦ កិច្ចពិភាក្សនេះនឹងត្រូវធ្វើឡើងនៅក្នុងទឹកដីអង្គរសៀមរាប ចាប់ពីថ្ងៃទី ១៦ ដល់ ១៨ សីហា ឆ្នាំ២០១៦ខាងមុខនេះ។ កន្លងមករដ្ឋាភិបាលជប៉ុនធ្លាប់បានផ្តល់ប្រាក់ជំនួយដើម្បីធ្វើការអភិវឌ្ឍតំបន់ត្រីកោណនេះ ប្រមាណជា ២០លានដុល្លារសហរដ្ឋអាមេរិកសម្រាប់ប្រទេសទាំងបី។ កម្ពុជាទទួលបានទឹកប្រាក់ ៥ ទៅ ៦ លានដុល្លារពីជំនួយនេះ ហើយបានយកទៅអភិវឌ្ឍន៍ផ្លូវថ្នល់ អគារសិក្សា និងគម្រោងអភិវឌ្ឍន៍តូចៗ ជាច្រើនផ្សេងទៀតនៅក្នុងតំបន់ទាំងអស់នោះ។ នេះបើតាមការឲ្យដឹងពីលោកណុប សោភ័ណតារា៕