សង្គ្រាមប្រឆាំងបទល្មើសនេសាទលើផ្ទៃបឹងទន្លេសាបចាប់ផ្តើម
ដូចការគ្រោងទុកយុទ្ធនាការទ្រង់ទ្រាយធំដើម្បីបង្ក្រាបភាព អនាធិបតេយ្យក្នុងដែននេសាទបឹងទន្លេសាបបានចាប់ផ្តើមហើយនៅព្រឹកថ្ងៃ អាទិត្យនេះ។ សង្គ្រាមនៅលើផ្ទៃបឹងទន្លេសាប បានផ្តើមឡើងនៅក្នុងខេត្តសៀមរាប ដោយប្រើប្រាស់កម្លាំងចម្រុះនិងគ្រឿងចក្រ សាឡង់តូចធំ ចុះដល់កន្លែងគោលដៅដែលបានគ្រោងទុក។ យុទ្ធនាការអនុវត្តដាវអាជ្ញាសឹករបស់នាយករដ្ឋមន្ត្រីបានចាប់ផ្តើម ភ្លាមៗមិនបង្អង់យូរ ក្រោយពេលដែលឱសានវាទបានផុតកំណត់នៅថ្ងៃ អាទិត្យនេះ។ ប៉ុន្តែ នៅមិនទាន់មានរបាយការណ៍អំពីលទ្ធផលជាក់ស្តែងនៅឡើយទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៣
ប្រតិបត្តិការនៅថ្ងៃនេះបានចាប់ផ្តើមពីខេត្តសៀមរាបឆ្ពោះទៅខេត្តកំពង់ធំ និងកំពង់ឆ្នាំងក្រោមការបញ្ជាផ្ទាល់ដោយលោកលឹម គានហោ រដ្ឋមន្ត្រីក្រសួងធនធានទឹក និងជាប្រធានអាជ្ញាធរជាតិបឹងទន្លេសាបដោយមានកម្លាំងចម្រុះជាច្រើននាក់អមជាមួយ។ សម្រាស់ ព្រួល និងធ្នស់មួយចំនួនដែលនៅសេសសល់ត្រូវបានរុះរើ។ រហូតមកទល់នឹងរសៀលថ្ងៃអាទិត្យនេះនៅមិនទាន់មានរបាយការណ៍ច្បាស់លាស់អំពីលទ្ធផលនៃយុទ្ធនាការថ្ងៃដំបូងនៅឡើយទេ។ អ្វីដែលគួរឲ្យកត់សម្គាល់គឺម្ចាស់ទីតាំងនេសាទល្មើសច្បាប់ភាគច្រើនបានរុះរើអស់ទៅហើយនៅមុនកម្លាំងចម្រុះចុះដល់។
លោកនាយករដ្ឋមន្ត្រីបានចេញបទបញ្ជាលេខ០១ចុះថ្ងៃទី២២ឧសភាដោយបញ្ជាឲ្យលុបបំបាត់ឲ្យអស់នូវភាពអនាធិបតេយ្យនៅតាមដងស្ទឹង បឹងបួរ ព្រែក និងទន្លេនៅតាមបណ្តាខេត្តចំនួន៨ដែលពាក់ពន្ធ័នឹងបឹងទន្លេសាប។ ខេត្តទាំង៨នោះរួមមាន ខេត្តកំពង់ឆ្នាំង ពោធិសាត់ បាត់ដំបង បន្ទាយមានជ័យ សៀមរាប កំពង់ធំ កំពង់ចាម និងខេត្តកណ្តាល។ បទបញ្ជានេះសំដៅបោសសម្អាតសម្រាស់ ព្រួល ធ្នស់ និងឧបករណ៍ផ្សេងទៀតដែលគេដាក់ដោយខុសច្បាប់នៅក្នុងដែននេសាទនៃតំបន់បឹងទន្លេសាប។ រដ្ឋាភិបាលបានទុករយៈពេលពីរសប្តាហ៍ឲ្យម្ចាស់ដែននេសាទទាំងនោះរុះរើដោយខ្លួនឯងមុននឹងចាប់ផ្តើមយុទ្ធនាការបោសសម្អាតទ្រង់ទ្រាយធំនៅថ្ងៃនេះ។ លោកលឹម គានហោ បានប្រកាសឲ្យដឹងក្នុងសន្និសីទកាសែតកាលពីថ្ងៃសុក្រថា ឧបករណ៍នេសាទខុសច្បាប់ប្រហែល៨០ភាគរយក្នុងចំណោម៥៩២ទីតាំងដែលគោលដៅនៃការបង្ក្រាបត្រូវបានរុះរើរួចរាល់ហើយនៅមុនការផុតកំណត់នៃឱសានវាទ។
សូមបញ្ជាក់ថា បឹងទន្លេសាបជាសម្បត្តិមហាសាលមួយរបស់ប្រទេសកម្ពុជា។ បឹងនេះមិនត្រឹមតែជាជង្រុកត្រីនិងជីវៈចម្រុះដ៏សម្បូរបែបប៉ុណ្ណោះទេ តែវាក៏ជាអាងស្តុកទឹកដ៏ធំមួយដែលអាចកាត់បន្ថយទឹកជំនន់ទន្លមេគង្គយ៉ាងសំខាន់ផងដែរ។ បឹងទន្លេសាបមានបណ្តាញជាស្ទឹង បឹង ព្រែក ចំនួន ១៩ ដែលហូរចាក់ចូលទៅទីនោះ។ លោកលឹម គានហោ ឲ្យដឹងថា ប្រសិនបើគ្មានការទប់ស្កាត់ភាពអនាធិបតេយ្យក្នុងដែនបឹងទន្លេសាបទេនោះ ក្នុងរយៈពេល៣ឆ្នាំទៀតត្រីក្នុងបឹងទន្លេសាបនឹងផុតពូជជាមិនខាន។
យ៉ាងណាក៏ដោយ ទន្ទឹមនឹងការសាទរចំពោះចំណាត់ការរបស់រដ្ឋាភិបាល ក៏មានការស្តីបន្ទោសដែរថា វាហាក់ដូចជាចង់ជ្រុលពេលបន្តិចទៅហើយទម្រាំតែមានវិធានការបែបនេះ ហើយគេក៏នៅមិនទាន់ដឹងថា ដាវអាជ្ញាសឹករបស់លោកនាយករដ្ឋមន្ត្រីនឹងមានប្រសិទ្ធភាពនិងនិរន្តរភាពប៉ុណ្ណាដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ