មកដល់ឆ្នាំ២០១៨នេះ កម្ពុជាបានចូលជាសមាជិកអាស៊ាន១៩ឆ្នាំហើយ
នៅថ្ងៃចន្ទទី៣០ មេសានេះ គឺជាខួបរយៈពេល១៩ឆ្នាំដែលកម្ពុជាបានចូលជាសមាជិកសមាគមប្រជាជាតិអាស៊ីអាគ្នេយ៍ហៅកាត់ថា អាស៊ាន។ ឆ្លៀតឱកាសនេះ វណ្ណ សុគន្ធា សូមរំឮកជូនលោកអ្នកស្តាប់ឡើងវិញអំពីប្រវត្តិនៃការឈានជើង ចូលក្នុងអាស៊ានរបស់កម្ពុជា និងសមិទ្ធផលនានាដែលកម្ពុជាទទួលបានអាស៊ាននេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥២
កម្ពុជា បានចូលជាសមាជិកអាស៊ានកាលពីថ្ងៃទី៣០ ខែមេសា ឆ្នាំ១៩៩៩។ គិតមកដល់ពេលនេះ កម្ពុជាបានក្លាយជាសមាជិកទី១០របស់អាស៊ានរយៈពេល១៩ឆ្នាំហើយ។ ការសម្រេចចូលជាសមាជិកអាស៊ានរបស់កម្ពុជានាពេលនោះ គឺកម្ពុជាសំអាងលើមូលហេតុសំខាន់ៗចំនួន៤ ចំណុច គឺទី អាស៊ានមានគោលការណ៍មិនជ្រៀតជ្រែកកិច្ចការផ្ទៃក្នុងនៃប្រទេសដែលជាសមាជិករបស់ខ្លួន។ ទី២ គឺអាស៊ានមានស្មារតីសហគមន៍ បានន័យថា រាល់ការសម្រេចលើបញ្ហាអ្វីមួយ គឺផ្អែកតាមគោលការណ៍កុងសង់ស៊ីសដោយមិនឲ្យមានការបោះឆ្នោតនោះឡើយដែលអាចនាំឲ្យមានការបែកបាក់អាស៊ាន។ ចំណុចទី៣ គឺពាក់ព័ន្ធនឹងសមាហរណកម្មអាស៊ាន។ សមាហរណកម្មអាស៊ាននេះធ្វើឲ្យកម្ពុជាទទួលបានផលប្រយោជន៍យ៉ាងច្រើនលើការអភិវឌ្ឍ។ ចំណែកចំណុចទី៤ គឺទាក់ទងទៅនឹងច្រកទ្វារចេញនៃការទូតរបស់កម្ពុជា មានន័យថា កម្ពុជាអាចនឹងជាដៃគូនៅក្រៅប្រទេសច្រើនតាមរយៈអាស៊ាន។
នៅក្នុងរយៈពេល១៩ឆ្នាំនៃសមាជិកភាពរបស់អាស៊ាននេះ កម្ពុជាធ្លាប់ធ្វើម្ចាស់ផ្ទះរៀបចំកិច្ចប្រជុំកំពូលអាស៊ានចំនួនពីរលើក គឺលើកទី១នៅក្នុងឆ្នាំ២០០២ និងលើកទី២នៅក្នុងឆ្នាំ២០១២។ នៅក្នុងឆ្នាំ២០០២ ក្នុងនាមជាប្រធានអាស៊ាន កម្ពុជាបានចូលរួមចំណែកក្នុងការសម្រេចបាននូវកិច្ចព្រមព្រៀងមួយចំនួនក្នុងនោះ ក៏មានដែរសេចក្តីថ្លែងការណ៍ស្តីពីការប្រតិបត្តិរបស់ភាគីនៅសមុទ្រចិនខាងត្បូងដែលហៅកាត់ថា DOC។
ក៏ប៉ុន្តែនៅក្នុងឆ្នាំ២០១២វិញ មានបញ្ហាគួរឲ្យកត់សម្គាល់មួយបានកើតឡើង នោះគឺសេចក្តីថ្លែងការណ៍រួមរបស់កិច្ចប្រជុំរដ្ឋមន្ត្រីការបរទេសអាស៊ាននៅទីក្រុងភ្នំពេញមិនអាចចេញបាន ដោយសារតែប្រទេសសមាជិកទាំងអស់មិនចុះសម្រុងគ្នាស្តីពីជម្លោះសមុទ្រចិនខាងត្បូង។ ទោះជាបែបនេះក្តី កិច្ចប្រជុំកំពូលអាស៊ានដែលកម្ពុជាជាអ្នកដឹកនាំនាពេលនោះ ក៏បានសម្រេចចេញនូវឯកសារភាពជាដៃគូសេដ្ឋកិច្ចគ្រប់ជ្រុងជ្រោយផងដែរ។
បើទោះបីជាយ៉ាងណាក៏ដោយ ក៏អ្នកវិភាគមួយចំនួននៅតែមើលឃើញថា នារយៈពេលកន្លងមកនេះ កម្ពុជាបានទាញយកផលប្រយោជន៍ច្រើនពីសមាគមអាស៊ាននេះទាំងផ្នែកសន្តិសុខ ការទូត និងផ្នែកសេដ្ឋកិច្ច។ កាលពីដំណាច់ឆ្នាំ២០១៥កន្លងទៅ អាស៊ានបានសម្រេចបង្កើតបាននូវសហគមន៍សេដ្ឋកិច្ចអាស៊ានដែលជាការរួមបញ្ចូលគ្នាក្នុងទីផ្សារសេរី និងមូលដ្ឋានផលិតកម្មតែមួយ។ សហគមន៍សេដ្ឋកិច្ចអាស៊ាននេះ ក៏ត្រូវបានក្រុមអ្នកវិភាគអះអាងថា ផ្តល់អត្ថប្រយោជន៏ច្រើនដល់កម្ពុជាផងដែរ។
សូមបញ្ជាក់ថា សមាគមប្រជាជាតិអាស៊ីអាគ្នេយ៍ហៅកាត់ថា អាស៊ានត្រូវបានបង្កើតឡើងក្នុងទីក្រុងបាងកកប្រទេសថៃ កាលពីថ្ងៃទី៨ សីហា ១៩៦៧។ ប្រទេស៥ គឺថៃ ម៉ាឡេស៊ី ឥណ្ឌូនេស៊ី ហ្វីលីពីន និងប្រទេសសឹង្ហបុរី គឺជាស្ថាបនិកនៃអង្គការអន្តររដ្ឋាភិបាលថ្នាក់តំបន់មួយនេះ។ បច្ចុប្បន្ននេះ អាស៊ានមានសមាជិកចំនួន១០ ប្រទេស ហើយប្រទេសទីម័រខាងកើតក៏កំពុងតែស្នើសុំចូលជាសមាជិកទី១១នៃសមាគមអាស៊ាននេះផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ