ខួបមួយឆ្នាំនៃការឃុំខ្លួន៖ អង្គការជាង៦០ស្នើឲ្យមានការដោះលែង និងឈប់យាយីអ្នកស្រីទេព វន្នីតទៅទៀត
គិតត្រឹមថ្ងៃទី១៥ សីហានេះ គឺជារយៈពេលមួយឆ្នាំគត់ដែលអ្នកស្រីទេព វន្នី សកម្មជនសហគមន៍បឹងកក់ត្រូវបានឃុំខ្លួននៅក្នុងពន្ធនាគារព្រៃស។ ក្នុងគម្រប់ខួបមួយឆ្នាំនេះ អង្គការសង្គមស៊ីវិលជាង៦០ បានចេញសេចក្តីថ្លែងការណ៍រួមមួយដោយអំពាវនាវដល់អាជ្ញាធរកម្ពុជាឲ្យដោះលែងអ្នកស្រីទេព វន្នី និងឈប់យាយីលើអ្នកស្រីក៏ដូចជាសមាជិកនៃសហគមន៍បឹងកក់ដទៃទៀត។
ចុះផ្សាយនៅថ្ងៃ៖
ស្តាប់ - ០២:២៤
អង្គការសង្គមស៊ីវិលជាតិ និងអន្តរជាតិចំនួន៦៤ មានជាអាទិ៍ អង្គការលើកលែងទោសអន្តរជាតិ សមាជិកសភាទទួលបន្ទុកសិទ្ធិមនុស្សអាស៊ាន មជ្ឈមណ្ឌលសិទ្ធិមនុស្សកម្ពុជា សមាគមសិទ្ធិមនុស្សអាដហុក និងអង្គការលីកាដូជាដើម បានសម្តែងការខកចិត្តចំពោះការបន្តឃុំខ្លួនអ្នកស្រីទេព វន្នី នៅក្នុងពន្ធនាគារពីសំណាក់តុលាការខ្មែរ។ ជាមួយនឹងការខកចិត្តនេះ ក្រុមអង្គការការពារសិទ្ធិមនុស្សក៏បានស្នើឲ្យអាជ្ញាធរបដិសេធសេចក្តីសម្រេចផ្តន្ទាទោសលើអ្នកស្រីទេព វន្នី ព្រមទាំងទម្លាក់ចោលរាល់បទចោទ ដែលពួកគេចាត់ទុកថា មានចរិតនយោបាយ និងពុំមានភស្តុតាងជាក់លាក់ដែលកើតមានជាបន្តបន្ទាប់លើសកម្មជនបឹងកក់រូបនេះ។
អ្នកស្រីទេព វន្នី សកម្មជនដីធ្លីដ៏លេចធ្លោ ត្រូវបានអាជ្ញាធរកម្ពុជាចាប់ខ្លួនកាលពីថ្ងៃទី១៥ ខែសីហា ឆ្នាំ២០១៦ នៅអំឡុងពេលដែលអ្នកស្រី និងសកម្មជនដីធ្លីផ្សេងទៀតបានចូលរួមធ្វើយុទ្ធនាការថ្ងៃចន្ទពណ៌ខ្មៅ ដើម្បីទាមទារឲ្យដោះលែងអ្នកការពារសិទ្ធិមនុស្សអាដហុក និងអគ្គលេខាធិការរងគ.ជ.ប។ កាលពីថ្ងៃទី២៣ ខែកុម្ភៈ ឆ្នាំ២០១៧ កន្លងទៅ អ្នកស្រីទេព វន្នី ត្រូវបានសាលាដំបូងរាជធានីភ្នំពេញផ្តន្ទាទោសដាក់ពន្ធនាគាររយៈពេល២ឆ្នាំ៦ខែពីបទហិង្សាដោយចេតនាមានស្ថានទម្ងន់ទោសដែលប្រព្រឹត្តទៅនៅក្បែរផ្ទះលោកនាយករដ្ឋមន្ត្រីហ៊ុន សែន កាលពីឆ្នាំ២០១៣ បន្ថែមពីលើបទចោទដទៃទៀត។
ក្រុមអង្គការសង្គមស៊ីវិលបានហៅការឃុំខ្លួននាពេលបច្ចុប្បន្ននេះលើអ្នកស្រីទេព វន្នីថា ជាការយាយីក្នុងគោលបំណងបំបិទសំឡេងអ្នកស្រី។ សម្រាប់ក្រុមអង្គការសង្គមស៊ីវិលទាំងនេះ វិធានការនេះបានរួមចំណែកបង្កើតបានជាបរិយាកាសភ័យខ្លាចដល់អ្នកការពារសិទ្ធិមនុស្សនិងបុគ្គលដទៃទៀតនៅក្នុងប្រទេសកម្ពុជា។ ក្រុមអង្គការសង្គមស៊ីវិលក៏បានអំពាវនាវឲ្យអាជ្ញាធរកម្ពុជាលុបចោលនូវការផ្តន្ទាទោសលើអ្នកស្រីទេព វន្នី ដើម្បីដោះលែងអ្នកស្រីពីពន្ធនាគារ និងបញ្ឈប់ការយាយីដែលមានដូចជា ការចាប់ខ្លួន ការចោទប្រកាន់ និងការឃុំខ្លួនលើអ្នកស្រីទេព វន្នី និងសមាជិកនៃសហគមន៍បឹងកក់ផ្សេងទៀត។
ក្រៅពីក្រុមអង្គការសង្គមស៊ីវិលទាំង៦៤ នៅក្នុងគម្រប់រយៈពេលមួយឆ្នាំនៃការឃុំខ្លួនអ្នកស្រីទេព វន្នីនេះ វេទិកាអាស៊ីដែលជាអង្គការការពារសិទ្ធិមនុស្សមានមូលដ្ឋាននៅក្នុងទីក្រុងបាងកក ប្រទេសថៃ ក៏បានអំពាវនាវដល់រដ្ឋាភិបាលកម្ពុជាឲ្យដោះលែងអ្នកស្រីទេព វន្នីជាបន្ទាន់ និងដោយគ្មានលក្ខខណ្ឌ ដើម្បីធានាបរិយាកាសល្អនៃការប្រមូលផ្តុំដោយសន្តិវិធីនិងអនុញ្ញាតឲ្យអ្នកការពារសិទ្ធិមនុស្សអនុវត្តនូវសេរីភាពជាមូលដ្ឋានរបស់ពួកគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ