ការប្រកាសទ្រព្យសម្បតិ្តដោយចំហជាប្រសិទ្ធភាពនៃការប្រឆាំងអំពើពុករលួយនៅកម្ពុជា
ជាថ្មីម្តងទៀត អ្នកស្រាវជ្រាវសង្គមលោក កែម ឡី បានទទូចឲ្យមានការប្រកាសទ្រព្យសម្បត្តិដោយចំហ ចាប់តាំងពីនាយករដ្ឋមន្ត្រី រហូតដល់មន្ត្រីជាន់ទាបនិងជាន់ខ្ពស់ និងអ្នកពាក់ព័ន្ធទាំងអស់ដែលមានកាតព្វកិច្ចប្រកាសទ្រព្យសម្បត្តិ។ ការធ្វើបែបនេះត្រូវគេជឿជាក់ថា ជាមធ្យោបាយដ៏មានប្រសិទ្ធភាព ក្នុងការប្រឆាំងអំពើពុករលួយនៅក្នុងប្រទេសកម្ពុជា។ក៏ប៉ុន្តែ មន្ត្រីរដ្ឋាភិបាលថាដំណោះស្រាយមិនអាចធ្វើទៅតាមការយល់ឃើញតាម អារម្មណ៍បានទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤០
ការទទូចឲ្យមានការប្រកាសទ្រព្យសម្បត្តិដោយចំហ នៅតែជារបៀបវារៈសង្គមដ៏គួរឲ្យចាប់អារម្មណ៍ដដែល ខណៈប្រធានបទនេះត្រូវបានអ្នកនយោបាយ ជាពិសេសអង្គភាពប្រឆាំងអំពើពុករលួយតែងធ្វើអត្ថាធិប្បាយកន្លងមកថាមិនអាចធ្វើទៅបានទេ ដោយសំអាងលើហេតុផលសន្តិសុខ។
នៅលើទំព័រហ្វេសប៊ុករបស់ខ្លួនកាលពីថ្ងៃសុក្រម្សិលមិញ លោក កែម ឡី អ្នកស្រាវជា្រវសង្គម បានលើកឡើងថា ថ្នាំដែលមានប្រសិទ្ធិភាពក្នុងការព្យាបាលជំងឺពុករលួយឲ្យជាសះស្បើយ ពិតប្រាកដនោះគឺការប្រកាសទ្រព្យសម្បត្តិដោយចំហនិងទាំងគ្រួសារនិងធ្វើសវនកម្មទ្រព្យសម្បត្តិប្រចាំឆ្នាំ លើថ្នាក់ដឹកនាំកំពូលៗដូចជានាយករដ្ឋមន្ត្រី ឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រី ព្រមទាំងអភិបាលនៃគណៈអភិបាលរាជធានី ខេត្តនិងក្រុងផងដែរ។
អ្នកស្រាវជ្រាវនិងតាមដានសង្គមរូបនេះ មើលឃើញថាករណីដែលអ្នកធ្វើសេចក្តីសម្រេចចិត្ត
កំពូលៗ មិនប្រព្រឹត្តអំពើពុករលួយ និងមានការប្តេជ្ញាចិត្តខ្ពស់ថាខ្លួនមិនពុករលួយសូម្បីតែ១ដុល្លារនោះ ស្ថានភាពពុករលួយអាចកាត់បន្ថយនិងឈានទៅរកការលុបបំបាត់បានទាំងស្រុងក្នុងរយៈពេល៥ឆ្នាំឬ១អាណត្តិ។
ខណៈដែលមន្ត្រីអង្គភាពប្រឆាំងអំពើពុករលួយមិនអាចទាក់ទងបាននោះ អ្នកនាំពាក្យទីស្តីការគណៈរដ្ឋមន្ត្រីលោកផៃ ស៊ីផាន បានអត្ថាធិប្បាយថា យន្តការប្រឆាំងអំពើពុករលួយនៅកម្ពុជាត្រូវបានធ្វើឡើងយោងទៅតាមច្បាប់មិនមែនធ្វើឡើងតាមអារម្មណ៍នោះទេ។ហើយលោកថាដោយបញ្ហាសុវត្ថិភាពនិងសន្តិសុខបុគ្គល បទពិសោធន៍ពិភពលោកក៏មិនមានការប្រកាសទ្រព្យសម្បត្តិដោយចំហរដែរ។តែពេលនេះកម្ពុជាបានចាប់ផ្តើមពីការចូលរួម តម្លាភាព សុច្ចរិតភាពនិងគណនេយ្យភាព បានក្លាយទៅជាវប្បធម៌ប្រឆាំងអំពើពុករលួយហើយ។
ជាមួយគ្នានេះ លោកកែម ឡី បានលើកឡើងជាអនុសាសន៍សំខាន់ៗចំនួន១៤ចំណុច ដែលជាទស្សនៈ បង្ហាញឲ្យឃើញពីប្រសិទ្ធភាពនៃការប្រយុទ្ធប្រឆាំងអំពើពុករលួយ។ចំណុចទាំងនោះមានទាក់ទងទៅនឹងការរៀបចំសវនកម្មសហគ្រាសប្រចាំឆ្នាំតាមស្រុកខណ្ឌ ដោយនាយកដ្ឋានពន្ធដារ។ការប្រមូលពន្ធត្រូវផ្អែកលើរបាយការណ៍សវនកម្មប្រចាំឆ្នាំ ប្រព័ន្ធទិន្នន័យចំណូលចំណាយ ប្រាក់កំចី ជំនួយឥតសំណងគ្រប់ប្រភេទនិងបំណុល របាយការណ៍ទូទាត់ហិរញ្ញវត្ថុប្រចាំឆ្នាំ ត្រូវមានការចូលរួមពីស្ថាប័នពាក់ព័ន្ធនិងអង្គការសង្គមស៊ីវិល។
គណៈកម្មាធិការជំនាញរដ្ឋសភាជាតិដែលមានសមាជិកចំរុះអាចរៀបចំសវនកម្មអង្គភាពណាមួយក៏បាន។ សាធារណជន អ្នកសារព័ត៌មាន អង្គការសង្គមស៊ីវិល អាចទទួលព័ត៌មានសាធារណៈជាពិសេសព័ត៌មានដែលទាក់ទងនឹងចំណូលចំណាយថវិការជាតិជាប្រចាំនិងទាន់ពេលវេលា។ល។និង។ល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ