ក្រសួងបរិស្ថានច្រានចោលការចោទប្រកាន់ដែលថា ការប្រែពណ៌ទឹកសមុទ្របង្កឡើងដោយសារធាតុគីមី
ការប្រែពណ៌ទឹកសមុទ្រនៅក្នុងខេត្តកែប ដែលក្រសួងជំនាញអះអាងថា មកពីកត្តាធម្មជាតិនោះនាំឲ្យមានការជជែកគ្នាផ្ទុយពីនេះថា អាចបណ្ដាលមកពីការហូរចូលសារធាតុគីមីបង្កឡើងដោយក្រុមហ៊ុនវៀត ណាមដែលមានទីតាំងនៅក្បែរនោះ ។ ឆ្លើយតបនឹងការចោទប្រកាន់ទាំងប៉ុន្មាន លោក សៅ សុភាព អ្នកនាំពាក្យក្រសួងបរិស្ថានបន្តអះអាងថា ការប្រែពណ៌នេះមិនមែនបង្កឡើងដោយទង្វើរបស់មនុស្សទេ។ លោកបន្ថែមថា ការប្រែពណ៌នេះកើតមានឡើងតាមធម្មជាតិទាំងក្នុងទឹកសាបនិងទឹកប្រៃ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
ការពិសោធន៍អំពីការប្រែពណ៌ទឹកសមុទ្រក្នុងខេត្តកែបនៅមិនទាន់បញ្ចប់ទេគិតមកដល់ព្រឹកថ្ងៃអាទិត្យទី០៣មេសានេះ។ ជាលទ្ធផលបឋមក្រសួងបរិស្ថានអះអាងថា មិនមែនបណ្ដាលមកពីសារជាតិគីមីដូចការចោទប្រកាន់នោះទេ។ តែវាជាការពិតដូចដែលក្រសួងធ្លាប់អះអាងនោះ គឺបណ្ដាលមកពីបាតុភូតធម្មជាតិកើតមានឡើងនៅក្នុងទឹកសមុទ្រ តាមរយៈការកើនឡើងកម្រិតជាតិស្លែ។
ក៏ព្រោះតែកែប្រែពណ៌ទឹកសមុទ្រកើតឡើងដោយបាតុភូតធម្មជាតិ លោក សៅ សុភាព មិនហ៊ានសន្និដ្ឋានថា ករណីនៃការប្រែពណ៌ទឹកសមុទ្រអាចនឹងកើតមាននៅក្នុងខេត្តផ្សេងទៀតដូចជា កំពង់សោម និងកោះកុង។ ខេត្តទាំងនេះក៏កំពុងស្ថិតនៅក្នុងការឃ្លាំមើលដោយយកចិត្តទុកដាក់ពីមន្ទីរបរិស្ថាន។
លោក សៅ សុភាព អ្នកនាំពាក្យក្រសួងបរិស្ថានបានប្រដូចករណីការប្រែពណ៌ទឹកសមុទ្រនេះជាមួយការប្រែពណ៌ទឹកសមុទ្រ ដែលធ្លាប់កើតមាននៅក្នុងសហរដ្ឋអាមេរិក។ ហើយករណីស្រដៀងគ្នានេះ ក៏ធ្លាប់កើតមាននៅបឹងយក្សឡោម ក្នុងខេត្តរតនគិរី ដែលជាប្រភេទទឹកសាប។
សូមជម្រាបជូនថា រហូតមកដល់ថ្ងៃអាទិត្យនេះ ស្ថានភាពទឹកសមុទ្រនៅក្នុងខេត្តកែបបាន
វិលមករកភាពប្រក្រតីប្រមាណ៩០ភាគរយ ហើយ។ នៅមិនយូរទៀតទេពលរដ្ឋ និងភ្ញៀវទេសចរអាចប្រកបមុខរបរទទួលទានដូចដើមវិញបាន។ ប៉ុន្តែស្ថិតនៅក្នុងដំណាក់កាលនេះពលរដ្ឋត្រូវបន្តអនុវត្តទៅតាមសេចក្ដីជូនដំណឹងរបស់ក្រសួង ដែលហាមមិនឲ្យទទួលទានគ្រឿងសមុទ្រ និងផ្អាកចុះមុជទឹកសមុទ្រមួយរយៈ។
បន្ថែមពីលើក្រសួងបរិស្ថាន លោកហ៊ុន សែន បានអំពាវនាវដល់ប្រជាពលរដ្ឋ ដែលរស់នៅក្នុងខេត្តកែបឲ្យផ្អាកទទួលទានគ្រឿងសមុទ្រ និងចុះងូតទឹកសមុទ្រមួយរយៈសិនដោយរងចាំក្រសួងជំនាញពិនិត្យផលប៉ះពាល់។ ប្រមុខរដ្ឋាភិបាលកម្ពុជា បានអំពាវនាវយ៉ាងដូច្នេះនៅលើទំព័រហ្វេសប៊ុកផ្លូវការរបស់លោកកាលពីថ្ងៃសៅរ៍ទី០២មេសា។
បញ្ហានេះក៏ទទួលបានការចាប់អារម្មណ៍ ពីប្រធានគណបក្សសង្គ្រោះជាតិលោក សម រង្ស៊ី ដែលកំពុងរស់នៅក្រៅប្រទេស។ លោក សម រង្ស៊ី តាមរយៈទំព័រហ្វេសប៊ុកនៅថ្ងៃសៅរ៍ លើកឡើងថា អស់រយៈពេលបីថ្ងៃហើយ ដែលអាជ្ញាធរមិនបានបង្ហាញពីមូលហេតុច្បាស់លាស់ នៃការពុលងាប់ ត្រី ក្តាម បង្កង បង្គា នៅក្នុងសមុទ្រ នៃខេត្តកែប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ