រដ្ឋាភិបាលកែសម្រួលសមាសភាពថ្មីនៃគណៈកម្មការបោះបង្គោលព្រំដែនគោកកម្ពុជា-វៀតណាម
រដ្ឋាភិបាលកម្ពុជាបានកែសម្រួលសមាសភាពថ្មីនៃ គណៈកម្មការចម្រុះខណ្ឌសីមា និងបោះបង្គោលព្រំដែនគោកកម្ពុជា-វៀតណាម ដែលមានសមាសភាពចំនួន៣៣រូប។ ក្នុងនោះលោក វ៉ា គឹមហុង ដែលជាប្រធានគណៈកម្មការព្រំដែនកម្ពុជាធ្វើជាប្រធាន លោក ឡុង វីសាលោ រដ្ឋលេខាធិការក្រសួងការបរទេស និងលោក នាង ផាត រដ្ឋលេខាធិការក្រសួងការពារជាតិ ជាអនុប្រធាន។ ក្រៅពីនេះ អភិបាលខេត្តទាំង៩ដែលជាប់នឹងព្រំដែនជាមួយវៀតណាម មេបញ្ជាការភូមិភាគ និងមន្រ្តីរដ្ឋាភិបាលជាច្រើនរូបទៀតជាសមាជិក។
ចុះផ្សាយនៅថ្ងៃ៖
ស្តាប់ - ០២:១១
ភារកិច្ចសំខាន់មួយរបស់គណៈកម្មការថ្មីនេះ គឺចរចាជាមួយភាគីវៀតណាម ដើម្បីដោះស្រាយនូវរាល់បញ្ហាទាក់ទងនឹងការកំណត់ខណ្ឌសីមានិងការបោះបង្គោលព្រំដែនកម្ពុជា-វៀតណាមខណៈដែលប្រមុខរដ្ឋាភិបាលកម្ពុជា-វៀតណាម បានប្រកាសកាលពីថ្ងៃទី២៦ ធ្នូ ចង់ឲ្យបញ្ចប់ការបោះបង្គោលព្រំដែនគោករវាងប្រទេសទាំងពីរឲ្យបានឆាប់ ហើយបន្តកំណត់ព្រំដែនទឹកថែមទៀត។
យោងតាមសេចក្ដីសម្រេចស្ដីពីការបង្កើតគណៈកម្មការចម្រុះខណ្ឌសីមានិងបោះបង្គោលព្រំដែនគោកកម្ពុជា វៀតណាម ចុះថ្ងៃទី១៧ធ្នូ ឲ្យដឹងថា គណៈកម្មការថ្មីមានភារៈកិច្ចបន្ថែមទៀតគឺរៀបចំចាត់ចែង និង បច្ចេកទេសសម្រាប់ការងារកំណត់ខណ្ឌសីមា និង បោះបង្គោលព្រំដែន។ ធ្វើការត្រួតពិនិត្យនិងដោះស្រាយបញ្ហាដែលជួបប្រទះនៅពេលប្រតិបត្តិការការងារជាក់ស្ដែង។ គណៈកម្មការនេះសិទ្ធិចូលរួមកំណត់ការបើកនិងតម្លើងច្រកព្រំដែនកម្ពុជា-វៀតណាម។
ហើយគណៈកម្មការចម្រុះខណ្ឌសីមានិងបោះបង្គោលព្រំដែនគោកកម្ពុជា-វៀតណាមនេះ មានទីស្នាក់ការនៅទីស្ដីការគណៈរដ្ឋមន្រ្តីនិងមានសិទ្ធិប្រើប្រាស់ត្រារបស់ទីស្ដីការគណៈរដ្ឋមន្ត្រី។ គណៈកម្មការនេះអាចបង្កើតអនុគណៈកម្មការនិងក្រុមការងារមួយចំនួនជាជំនួយការតាមការចាំបាច់ ។ បន្ថែមពីលើនេះទៀតសេចក្ដីសម្រេចលេខ១៤ចុះថ្ងៃទី២៥ខែមេសាឆ្នាំ២០០៦ស្ដីពីការបង្កើតគណៈកម្មការចម្រុះខណ្ឌសីមានិងបោះបង្គោលព្រំដែនគោកកម្ពុជា វៀតណាម និងបទប្បញ្ញាត្តិទាំងឡាយដែលផ្ទុយនឹងសេចក្ដីសម្រេចថ្មីរបស់រដ្ឋាភិបាលនេះត្រូវទុកជានិរាករណ៍។
ថ្លែងប្រាប់វិទ្យុបារាំងអន្តរជាតិRFI នៅថ្ងៃអាទិត្យទី២៧ធ្នូ លោក វ៉ា គឹមហុង ប្រធានគណៈកម្មការព្រំដែនឲ្យដឹងថា គណៈកម្មការនេះបង្កើតឡើងដើម្បីកែប្រែសមាសភាពថ្មី។ ព្រោះសមាសភាពក្នុងគណៈកម្មការចាស់មានមន្ត្រីខ្លះទទួលមរណភាព ហើយក្នុងនោះតំណែងមន្ត្រីមួយចំនួនក៏មានការប្រែប្រួលដែរ។ បើតាមលោក វ៉ា គឹមហុង រយៈពេលជិត១០ឆ្នាំមកហើយដែល រដ្ឋាភិបាលសម្រេចកែប្រែសមាសភាពគណៈកម្មការថ្មីនេះ។
សូមបញ្ជាក់ថា កិច្ចការងារបោះបង្គោលព្រំដែនគោក រវាងកម្ពុជានិងវៀតណាមត្រូវបានប្រមុខរដ្ឋាភិបាលកម្ពុជាអះអាងថានៅសល់តែជាង១៦ភាគរយទៀតប៉ុណ្ណោះ។ជាងនេះទៅទៀត លោកនាយករដ្ឋមន្រ្តី ហ៊ុន សែន បានបញ្ជាក់ថា កម្ពុជា-វៀតណាម នឹងបន្តបោះបង្គោលព្រំដែនទឹកថែមទៀត នៅពេលដែលប្រទេសទាំងពីរ បានបញ្ចប់ការបោះបង្គោលព្រំដែនគោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ