កម្មករនៅបាវិតចូលធ្វើការវិញខណៈការដោះលែងកម្មករនិងតៃកុងឡានមានសង្ឃឹមតិចតួច
ទាំងអាជ្ញាធរនិងសហជីពអះអាងរួមគ្នាថា កម្មករ-កម្មការិនី នៅតំបន់សេដ្ឋកិច្ចពិសេស មេដ ហា ធេន និង តាយសេង ស្ថិតនៅក្រុងបាវិតត្រឡប់មកធ្វើការដូចដើមវិញហើយ នៅព្រឹកនៅ ថ្ងៃ សុក្រ ទី ២៥ ធ្នូ នេះ។ តែយ៉ាងណាក៏ដោយគ្រប់ភាគីពាក់ព័ន្ធនៅតែបន្តឃ្លាំមើល ហើយកម្លាំងសមត្ថកិច្ចនៅតែបន្តឈរជើងប្រចាំគោលដៅសំខាន់ៗដើម្បីត្រៀមខ្លាចមានកូដកម្មជាថ្មី នៅថ្ងៃចន្ទខាងមុខ។
ចុះផ្សាយនៅថ្ងៃ៖
ស្តាប់ - ០២:០៦
ទ្វាររោងចក្រនៅតំបន់ សេដ្ឋកិច្ចពិសេស មេដ ហា ធេន និង តាយ សេង បានបើកឲ្យកម្មករ-កម្មការិនី ចូលធ្វើការជាធម្មតាវិញហើយ នៅព្រឹកថ្ងៃសុក្រទី២៥ធ្នូនេះ បន្ទាប់ពីកូដកម្មទាមទារតំឡើងប្រាក់ឈ្នួលត្រូវបានផ្អាក់។
លោក អ៊ូ សាខឿន អនុប្រធានមន្ទីរការងារខេត្តស្វាយរៀង បានប្រាប់វិទ្យុបារាំងថា ស្ថានភាព ទូទៅតំបន់សេដ្ឋកិច្ចពិសេសទាំងពីរមានសភាពស្ងប់ស្ងាត់។ ប៉ុន្តែកម្លាំងសមត្ថកិច្ចនៅតែបន្តឈរជើងនៅទីតាំងសំខាន់ៗដដែលដើម្បីត្រៀមខ្លាចកើតមានកូដកម្មជាថ្មី។ ហើយភាគីពាក់ព័ន្ធក៏បន្តឃ្លាំមើលស្ថានភាពនេះតទៅទៀតដែរ។ លោក អ៊ូ សាខឿន បន្តថា កម្មករមានការហត់នឿយនិងកូដកម្ម ជាអ្វីដែលលោកចាត់ទុកថា ជាការទាមទារគ្មានគោលបំណងច្បាស់លាស់។ លោកបានអំពាវនាវឲ្យកម្មករចូលធ្វើការវិញដើម្បីកុំឲ្យប៉ះពាល់ដល់ផលប្រយោជន៍របស់កម្មករដោយសារតែបញ្ហាកូដកម្មនេះ។
ស្របពេលដែលកម្មករចូលធ្វើការវិញ លោក ប៉ាវ ស៊ីណា ប្រធានសហជីព ចលនាកម្មករបង្ហាញពីភាពយឺតយ៉ាវ ពាក់ព័ន្ធការដោះលែងកម្មករបួននាក់និងតៃកុងឡានប្រាំមួយនាក់ ដែលត្រូវបានចាប់ខ្លួនកាលពីល្ងាចថ្ងៃទី ២៤ ធ្នូ។ លោកបន្តថា មេធាវីរបស់កម្មករចំនួនបួននាក់បានរៀបចំសំណុំបែបបទដាក់ទៅតុលាការសាលាដំបូងខេត្តស្វាយរៀងរួចហើយពោលគឺរងចាំតែសេចក្ដីសម្រេចរបស់ចៅក្រមប៉ុណ្ណោះ។ លោក ប៉ាវ ស៊ីណា បញ្ជាក់ថា សំណុំរឿងកម្មករបន្តអូសបន្លាយនេះ ដោយសារតែព្រះរាជអាជ្ញាកាន់សំណុំរឿងនេះឡើងមកភ្នំពេញចូលរួមសិក្ខាសាលាពាក់ព័ន្ធផ្នែកច្បាប់។
ទាក់ទងការត្រៀមដោះលែងនេះ សមាគមន៍កាត់ដេរនៅកម្ពុជា(GMAC) បានចេញសេចក្តីថ្លែងការថ្កោលទោសចំពោះការប៉ុនប៉ងឱ្យមានការដោះលែង កម្មករកាត់ដេរទាំង៤នាក់នោះ ដោយ GMAC យល់ថា ការស្នើឱ្យមានការដោះលែងគឺប្រព្រឹត្តិទៅខុសនឹងបទបញ្ញត្តិរបស់ ច្បាប់។ តែលោក ប៉ាវ ស៊ីណា ថាការលើកឡើងរបស់ GMAC គ្មានជំហរអ្វីដើម្បីអាចឱ្យស្ថានការវិលទៅរកភាពប្រក្រតី វិញនោះទេ ហើយជាការជំរុញឱ្យស្ថានភាពបាតុកម្មរឹងរឹតតែក្តៅ។
សូមរម្លឹកថា តុលាការខេត្តស្វាយរៀងបានចោទប្រកាន់កម្មករចំនួនបួននាក់ពីបទប្រើប្រាស់អំពើហិង្សានិងបំផ្លិចបំផ្លាញទ្រព្យសម្បត្តិរោងចក្រ។ ហើយតៃកុងឡានប្រាំមួយនាក់ត្រូវបានចាប់ខ្លួនកាលពីល្ងាចមិញជាប់ពាក់ព័ន្ធនឹងកូដកម្មកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ