ព្រះមហាក្សត្រ និងនាយករដ្ឋមន្ត្រី ចូលរួមរំលែកទុក្ខក្រុមគ្រួសារអ្នកស្លាប់ក្នុងហេតុការណ៍រលំអគារ
មួយថ្ងៃក្រោយហេតុការណ៍រលំអគារនៅខេត្តព្រះសីហនុ ព្រះមហាក្សត្រកម្ពុជា ព្រះបាទសម្ដេចព្រះបរមនាថ នរោត្ដម សីហមុនី បានចូលរួមរំលែកមរណៈទុក្ខ ជាមួយក្រុមគ្រួសារនៃសព តាមរយៈទំព័រហ្វេសបុកនៅថ្ងៃអាទិត្យនេះ។ ចំណែក លោកនាយករដ្ឋមន្ដ្រី ហ៊ុន សែន ប៉ុន្មានម៉ោងក្រោយហេតុការណ៍រលំអគារនេះ លោកបានផ្ញើសាររំលែកទុក្ខពីប្រទេសថៃដល់ក្រុមគ្រួសារអ្នកស្លាប់ផងដែរ។ លោកនាយករដ្ឋមន្ត្រី ហ៊ុន សែន ចាត់ទុកករណីរលំអគារនេះ កើតឡើងដោយសារការធ្វេសប្រហែសរបស់ក្រុមហ៊ុនសាងសង់។ សូមជម្រាបជូនថា គិតមកដល់ព្រឹកថ្ងៃអាទិត្យនេះ ចំនួនអ្នកស្លាប់ដោយសារហេតុការណ៍រលំអគារនៅខេត្តព្រះសីហនុ បានកើនឡើងដល់១៧នាក់ និងមានអ្នករបួសបាន២៤នាក់។
ចុះផ្សាយនៅថ្ងៃ៖
តាមរយៈសំណេរខ្លីអមដោយរូបភាពជាច្រើនសន្លឹករំលេចឡើងក្នុងបណ្ដាញសង្គមហ្វេសបុក ព្រះមហាក្សត្រកម្ពុជា ព្រះករុណា ព្រះបាទសម្ដេចព្រះបរមនាថ នរោត្ដម សីហមុនី បានថ្លែងសារចូលរួមរំលែកមរណៈទុក្ខ ជាមួយក្រុមគ្រួសារនៃសព ព្រមទាំងជាមួយ ប្រជានុរាស្ត្រទូទាំងព្រះរាជាណាចក្រកម្ពុជា។ បើតាមបន្ទូលព្រះមហាក្សត្រ ឧប្បត្តិវហេតុបាក់រលំអាគារគឺជាករណីដ៏រន្ធត់។
ចំណែកលោកនាយករដ្ឋមន្ត្រី ហ៊ុន សែន ចាត់ទុកករណីរលំអគារនៅខេត្តព្រះសីហនុជាសោដនាដកម្មដ៏ឈឺចាប់របស់ជាតិ។ បន្ទាប់ពីចូលរំលែកទុក្ខដល់ក្រុមគ្រួសារអ្នកស្លាប់ លោកនាយករដ្ឋមន្ត្រី ហ៊ុន សែន បានចំណាយថវិកាជាតិ ជួយដល់ក្រុមគ្រួសារអ្នកស្លាប់៤០លានរៀលនិងអ្នករងរបួសចំនួន៥លានរៀលព្រមទាំងការព្យាបាលដោយឥតគិតថ្លៃ។ ការឧបត្ថម្ភថវិកាជាអ្វីដែល លោក ហ៊ុន សែន អះអាងថា ធ្វើឡើងដើម្បីជួយសម្រួលដល់ជីវភាពក្រុមគ្រួសារអ្នកស្លាប់។ ក្នុងនោះសាច់ញាតិជនរងគ្រោះដែលស្លាប់ចំនួន១១នាក់បានបំពេញបែបបទដើម្បីយកសពទៅធ្វើបុណ្យ ហើយសាកសពនៅសេសសល់ផ្សេងទៀតអាជ្ញាធរកំពុងទាក់ទងទៅសាច់ញាតិ។
បន្ថែមពីការឧបត្ថម្ភថវិកាលោកនាយករដ្ឋមន្ត្រី ហ៊ុន សែន បានបញ្ជាពីប្រទេសថៃក្នុងឱកាសដែលលោកចូលរួមប្រជុំកំពូលអាស៊ាន ឲ្យអាជ្ញាធរមានសមត្ថកិច្ច និងកងកម្លាំងប្រដាប់អាវុធចុះជួយសង្រ្គោះអាយុជីវិតពលរដ្ឋដែលត្រូវបានអគារបាក់រលំសង្កត់។
លោក អ៊ី សុខឡេង អភិបាលក្រុងព្រះសីហនុបានអះអាងប្រាប់វិទ្យុបារាំងនៅព្រឹកថ្ងៃអាទិត្យថា ប្រតិបត្កិការជួយសង្គ្រោះរុករកមនុស្សក្រោយរលំអគារ កំពុងដំណើរការយ៉ាងសស្រាក់ទាំងយប់និងថ្ងៃដោយមានការចូលរួមពីកម្លាំងចម្រុះទូទាំងប្រទេសសរុបប្រមាណជា១២០០នាក់។ ក៏មានផងដែរ ការប្រើប្រាស់សុនខ ដើម្បីស្វែងរកអ្នកស្លាប់និងអ្នកនៅមានជីវិតដែលកំពុងស្ថិតក្នុងគំនរអគារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ