ក្រសួងពាណិជ្ជកម្មបង្កើតក្រុមការងារតាមដានតម្លៃទំនិញ
ក្រសួងពាណិជ្ជកម្មនៅថ្ងៃទី១៦មិថុនា បានបង្កើតក្រុមការងារមួយដើម្បីតាមដានតម្លៃទំនិញលើទីផ្សារដឹកនាំផ្ទាល់ដោយរដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្ដិ។ ការងារស្នូលរបស់ក្រុមការងារនេះ គឺតាមដានរាល់ការប្រែប្រួលឡើងចុះ នៃមុខទំនិញសំខាន់ៗមួយចំនួនរួមមាន ស្រូវ អង្ករ ត្រី សាច់មាន់ សាច់ជ្រូក ប្រេងសាំងធម្មតា ម៉ាស៊ូត និងដំឡូងមី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
ក្រុមការងារនេះបង្កើតឡើងដើម្បីតាមឲ្យទាន់សភាពការណ៍នៃការឡើងចុះតម្លៃទំនិញនៅលើទីផ្សារដោយធ្វើការប្រៀបធៀបជាមួយតម្លៃក្នុងតំបន់ និងពិភពលោក។ អ្នកនាំពាក្យក្រសួងពាណិជ្ជកម្ម កញ្ញា សឹង សុផារ៉ា បានបញ្ជាក់ប្រាប់វិទ្យុបារាំងថា ការងារសំខាន់មួយទៀតរបស់ក្រុមការងារនេះ ពង្រឹងទៅលើការប្រមូលព័ត៌មាន ខណៈដែលព័ត៌មានស្ដីពីបញ្ហាតម្លៃទំនិញនាពេលកន្លងមកក្រសួងទទួលបានមានភាពមិនត្រឹមត្រូវ និងខ្វះចន្លោះ។ ដូច្នេះហើយទើបការគ្រប់គ្រងតម្លៃទំនិញជួបបញ្ហាប្រឈមព្រោះកម្ពុជាជាប្រទេសសេដ្ឋកិច្ចសេរី។
ឯកភាពនឹងការលើកឡើងនេះដែរ លោក ចាន់ សុផល អ្នកវិភាគសេដ្ឋកិច្ចផ្ដល់យោបល់ថា រដ្ឋគួរតែប្រមូលព័ត៌មាន និងផ្ដល់ព័ត៌មានធ្វើយ៉ាងណាឲ្យអ្នកលក់ និងអ្នកទិញទទួលបានព័ត៌មានច្បាស់លាស់។ ជាព័ត៌មានផ្ដោតលើទៅលើបញ្ហាតម្លៃសម្រាប់ទីផ្សារក្នុង និងក្រៅប្រទេស។
ខណៈបញ្ហាតម្លៃទំនិញនៅទីផ្សារនៅកម្ពុជាតែងតែទទួលរងការរិះគន់ពីប្រជាពលរដ្ឋ ព្រោះឡើងថ្លៃ កញ្ញា សុផារី អះអាងថា ក្រសួងមិនអាចបញ្ចុះតម្លៃភ្លាមៗតាមការចង់បានរបស់ ពលរដ្ឋនោះទេ។ អ្វីដែលជាដំណោះស្រាយនោះគឺក្រុមការងារដែលក្រសួងបង្កើតឡើងនេះនឹងត្រូវសិក្សាទៅលើបរិបទជុំវិញខ្លួន តាមរយៈការណែនាំទៅពលរដ្ឋគួរតែកាត់បន្ថយការដាំដុះឬក៏ជំរុញការដាំដុះ។
ចំណែកលោក ចាន់ សុផល លើកឡើងថា ការប្រែប្រួលតម្លៃទំនិញនៅកម្ពុជាអាស្រ័យលើកត្តាច្រើនយ៉ាង។ តែអ្វីសំខាន់នោះ គឺកត្តាផលិត តម្រូវការ ការប្រកួតប្រជែងជាមួយបណ្ដាប្រទេសផ្សេងៗ។ លោកសុផល បន្ថែមថា ការដោះស្រាយបញ្ហាតម្លៃទំនិញនៅកម្ពុជាដែលជាប្រទេសសេដ្ឋកិច្ចទីផ្សារសេរីគឺមានភាពស្មុគស្មាញបំផុត។ ដូច្នេះការបង្កើតក្រុមការងារតាមដានតម្លៃទំនិញរបស់ក្រសួងនៅពេលនេះ គឺជាដំណើរការមួយល្អ។ នេះបើតាម លោក ចាន់ សុផល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ