កាសែតខេមបូឌាដេលីបើកវេទិកាលើកដំបូងរបស់ខ្លួន បន្ទាប់ពីបដិសេធវិលមកកម្ពុជាវិញ
កាសែត The Cambodia Daily ប្រកាសថាខ្លួននឹងបើកវេទិកាមួយសម្រាប់សំឡេងឯករាជ្យនិយាយអំពីបញ្ហាផ្សេងៗទាក់ទងនឹងប្រទេសកម្ពុជា។ វេទិកាលើកដំបូងពីក្រៅប្រទេសរបស់កាសែតពីរភាសានេះ នឹងធ្វើនៅថ្ងៃចន្ទ ស្អែកនេះ វេលាម៉ោង ៩:៣០ នាទីយប់ម៉ោងនៅកម្ពុជា បន្ទាប់ពីម្ចាស់កាសែតមួយនេះអះអាងថានឹងមិនត្រឡប់មកកម្ពុជាវិញជាដាច់ខាត ដរាបណាច្បាប់របស់កម្ពុជាមិនទាន់រឹងមាំ។
ចុះផ្សាយនៅថ្ងៃ៖
កាសែត The Cambodia Daily ឲ្យដឹងថា នៅក្នុងកម្មវិធីផ្សាយលើកដំបូងរបស់ខ្លួន លោកបណ្ឌិត គង់ សេងលី ពីសាកលវិទ្យាល័យ Cornell ក្នុងសហរដ្ឋអាមេរិក នឹងធ្វើជាវាគ្មិនក្នុងកិច្ចពិភាក្សាអំពីការលូតលាស់របស់កម្ពុជាតាមរយៈប្រព័ន្ធពហុបក្ស និងអ្វីដែលគណបក្សប្រឆាំងដ៏ធំគួរធ្វើដើម្បីដោះស្រាយបញ្ហាប្រឈមផ្ទៃក្នុង និងបញ្ហាខាងក្រៅរបស់ខ្លួន។ វេទិការបស់កាសែតអនឡាញមួយនេះ ក៏ផ្តល់ឱកាសឲ្យមានការចោទជាសំណួរ និងបញ្ចេញទស្សនៈរបស់អ្នកទស្សនាផងដែរ។
សូមបញ្ជាក់ថា ការបើកវេទិការបស់កាសែតឌឹខេមបូឌាដេលី នៅពេលនេះគឺបន្ទាប់ពីម្ចាស់កាសែតពីរភាសានេះ បានអះអាងជាថ្មីថា កាសែតនេះនឹងមិនវិលត្រឡប់ទៅកម្ពុជាវិញនោះទេ។ មិនអាចវិលមកកម្ពុជាវិញ ដោយសារតែកម្ពុជានៅតែអនុវត្តនយោបាយចាប់ហើយដោះលែងវិញ ធ្វើទុក្ខបុកម្នេញដដែលៗ អំពើពុករលួយ ការប្រើប្រាស់ស្ថាប័នពន្ធដារ និងតុលាការជាឈ្នាន់ដើម្បីគំរាមកំហែងខាងផ្នែកនយោបាយដល់ស្ថាប័នសារព័ត៌មាន។ នេះជាការលើកឡើងរបស់ លោកស្រី Deborah Krisher Steele ម្ចាស់កាសែតឌឹខេមបូឌាដេលី។
ការប្រកាសជំហររបស់ម្ចាស់កាសែតនេះ គឺក្រោយពីក្រសួងការបរទេសកម្ពុជា កាលពីថ្ងៃទី១០ខែធ្នូបាន ច្រានចោលទាំងស្រុងចំពោះការលើកឡើងរបស់ម្ចាស់កាសែតឌឹខេមបូឌាដេលីដែលថា រដ្ឋាភិបាលកម្ពុជាបានបញ្ឈប់ប្រតិបត្តិការ និងបានបិទគណនីធនាគាររបស់ខ្លួន ដោយសារតែជំហររិះគន់រដ្ឋាភិបាល។ បើតាមរដ្ឋាភិបាលកម្ពុជា សារព័ត៌មានមួយនេះ បានដំណើរការអាជីវកម្មរបស់ខ្លួន ចាប់តាំងពីឆ្នាំ២០០៧មក ដោយមិនបានបង់ពន្ធ ដែលមានទឹកប្រាក់ប្រមាណ៦,៣លានដុល្លារអាមេរិក។
ប៉ុន្តែលោកស្រី Deborah Krisher Steele អះអាងថា រដ្ឋាភិបាលកន្លងមកបានចោទប្រកាន់ ស្ថាប័នកាសែតរបស់លោកស្រីថា ជាប់ពាក់ព័ន្ធនឹងបញ្ហាបដិវត្តន៍ពណ៌រួមជាមួយអង្គការអាមេរិកាំងដទៃទៀត ហើយក្រោយមករដ្ឋាភិបាលបានប្តូរការចោទប្រកាន់របស់ខ្លួនទៅលើបញ្ហាមិនបានបង់ពន្ធ ដែលមានទឹកប្រាក់ចំនួន៦លាន៣សែនដុល្លារ។ លោកស្រីបញ្ជាក់ថា បន្ទាប់មករដ្ឋាភិបាលកម្ពុជាបានបញ្ឈប់ប្រតិបត្តិការ និងបានបិទគណនីធនាគាររបស់កាសែតឌឹខេមបូឌាដេលី ដែលធ្វើឲ្យកាសែតមួយនេះមិនអាចដកលុយបើកប្រាក់ខែឲ្យបុគ្គលិករបស់ខ្លួនបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ