ក្រសួងកសិកម្មចេញអាជ្ញាប័ណ្ណឲ្យក្រុមហ៊ុនកែច្នៃឈើស្របពេលរដ្ឋាភិបាលកំពុងទប់ស្កាត់បទល្មើសព្រៃឈើ
រដ្ឋមន្ត្រីក្រសួងកសិកម្មលោក វេង សាខុន បានចុះហត្ថលេខាលើប្រកាសមួយស្តីពីការអនុញ្ញាតឲ្យក្រុមហ៊ុន លីម រ៉ូយ៉ាល់ ជ័ញ ស្តុក (Lim Royal Joint Stock) បង្កើតរោងម៉ាស៊ីនកែច្នៃឈើ និងផលិតគ្រឿងសង្ហារិមជាបណ្តោះអាសន្នមួយកន្លែង ដែលមានទីតាំងស្ថិតនៅក្នុងស្រុកស្នួលខេត្តក្រចេះ។ វត្តមានរោងម៉ាស៊ីនកែច្នៃឈើដូច្នេះ ធ្វើឲ្យមានការបារម្ភពីសំណាក់ប្រជាសហគមន៍ការពារព្រៃឈើ ពីការត្រលប់មកម្តងទៀតនូវវិនាសកម្មព្រៃឈើកម្ពុជា។
ចុះផ្សាយនៅថ្ងៃ៖
ស្តាប់ - ០២:០២
នៅក្នុងលិខិត ដែលមានការយល់ព្រមពីរដ្ឋបាលព្រៃឈើ និងចុងក្រោយចុះហត្ថលេខាដោយលោករដ្ឋមន្ត្រី ក្រសួងកសិកម្ម វេង សាខុន កាលពីថ្ងៃទី០៩ ខែកុម្ភៈ ឆ្នាំ២០១៧ បញ្ជាក់ថា ការអនុញ្ញាតឲ្យក្រុមហ៊ុន Lim Yoyal Joint Stock ដំណើរការធ្វើអាជីវកម្មកែច្នៃឈើ ដោយគោរពទៅតាមលក្ខខណ្ឌជាច្រើន។
ប្រការ២ នៃប្រកាសនេះ បានតម្រូវឲ្យក្រុមហ៊ុនរៀបចំសំណង់រោងម៉ាស៊ីន រៀបចំគំនូរប្លង់បច្ចេកទេសផលិតកម្មនិងអនុវត្តតាមគោលការណ៍បច្ចេកទេស និងច្បាប់ស្តីពីព្រៃឈើ។ ឈើពាក់កណ្តាលសម្រេចដែលដឹកជញ្ជូនចូលក្នុងបរិវេណរោងម៉ាស៊ីន ត្រូវមានលិខិតអនុញ្ញាតចេញដោយសមត្ថកិច្ចរដ្ឋបាលព្រៃឈើ។ អនុញ្ញាតឲ្យរដ្ឋបាលព្រៃឈើចេញ ចូលត្រួតពិនិត្យសកម្មភាពរោងម៉ាស៊ីន គ្រប់ពេលវេលា។ ត្រូវទទួលខុសត្រូវលើគ្រប់បទល្មើសដែលកើតមានក្នុងបរិវេណរោងម៉ាស៊ីន និងលក្ខខណ្ឌមួយចំនួនទៀត។
លោក សេង សុខហេង អ្នកសម្របសម្រួលបណ្តាញសហគមន៍ព្រៃឡង់ ប្រតិកម្មថាយោងទៅលើស្ថានភាពព្រៃឈើកម្ពុជាបច្ចុប្បន្ន រដ្ឋាភិបាលគួរតែមានការបិទទាំងស្រុងនូវការកែច្នៃឈើគ្រប់ប្រភេទមួយរយៈ និងមានយន្តការត្រួតពិនិត្យការកែច្នៃផលិតផលព្រៃឈើឡើងវិញ។ លោកថា ព្រៃឈើកម្ពុជាស្ថិតក្នុងភាពប្រកាសអាសន្ន ហើយមិនមានព្រៃឈើណាសេសសល់សម្រាប់ធ្វើការកែច្នៃទេ គឺមានតែព្រៃឈើដែលស្ថិតនៅតំបន់ការពារ ដែនជម្រាកសត្វព្រៃ និងដែនអភិរក្សរបស់ក្រសួងបរិស្ថាន។
រដ្ឋបាលព្រៃឈើក្រសួងកសិកម្ម រួមទាំងអ្នកនាំពាក្យក្រសួងនេះផងដែរ បានបដិសេធ ការធ្វើអត្ថាធិប្បាយបន្ថែម លើការចេញអាជ្ញាប័ណ្ណ អនុញ្ញាតឲ្យមានក្រុមហ៊ុនកែច្នៃឈើ និងផលិតផលគ្រឿងសង្ហារិមនេះ។
លោកឧត្តមសេនីយ៍ត្រី អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស ដែលជាស្ថាប័នរដ្ឋាភិបាលទុកចិត្តឲ្យដឹកនាំគណៈកម្មការជាតិទប់ស្កាត់និងបង្ក្រាបបទល្មើសព្រៃឈើ លើកឡើងថា គណៈកម្មការនេះបង្ក្រាបតែករណីឈើដែលលើ្មសច្បាប់ តែការពារក្រុមហ៊ុន និងសិប្បកម្មកែច្នៃឈើដែលមានច្បាប់អនុញ្ញាត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ