អង្គការសង្គមស៊ីវិល សមាគម សហជីព ២១ គ្រោងរៀបចំទិវាពលកម្មអន្តរជាតិនៅសួនវត្តបុទុម
ក្រុមអង្គការសង្គមស៊ីវិលផ្នែកសិទ្ធិមនុស្ស និងសិទ្ធិការងារ និងបណ្តាញសហជីពពហុវិស័យ ចំនួន២១ស្ថាប័នគ្រោងប្រារព្ធទិវាពលកម្មអន្តរជាតិ ១ឧសភា នៅសួនវត្តបុទុមវតី ដែលមានអ្នកចូលរួមប្រមាណ១ ២០០នាក់។ អ្នករៀបចំកម្មវិធីសង្ឃឹមថាសាលាក្រុងភ្នំពេញនឹងអនុញ្ញាតឲ្យពួកគេរៀបចំប្រារព្ធពិធីនេះ។
ចុះផ្សាយនៅថ្ងៃ៖
ស្តាប់ - ០២:៣១
លោក ឃុន ថារ៉ូ អ្នកសម្របសម្រួលកម្មវិធីនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថា សង់ត្រាល់ បានលើកឡើងថា ក្នុងឱកាសទិវាពលកម្មអន្តរជាតិរដ្ឋាភិបាលមិនគួរយកហេតុផលណាមួយដែលមិនអនុញ្ញាតឲ្យក្រុមអង្គការសង្គមស៊ីវិលរៀបចំទិវានេះទេ ព្រោះនេះជាកម្មវិធីអន្តរជាតិ។
លោក ឃុន ថារ៉ូ សង្កេតឃើញថា នារយៈពេលប៉ុន្មានឆ្នាំចុងក្រោយនេះ រដ្ឋាភិបាលតែយកហេតុផលនយោបាយមួយចំនួន ដើម្បីមិនអនុញ្ញាតផ្តល់ទីតាំង ដើម្បីជួបជុំគ្នា។ លោកបន្ថែមថាកន្លងមកទិវាអន្តរជាតិមួយចំនួនដូចជាសិទ្ធិមនុស្សអន្តរជាតិ, សិទ្ធិនារីអន្តរជាតិ ក៏មិនមានការអនុញ្ញាតដែរ។ ប៉ុន្តែលោកបង្ហាញក្តីសង្ឃឹមថា លើកនេះរដ្ឋាភិបាល ក៏ដូចជាសាលាក្រុងភ្នំពេញនឹងអនុញ្ញាតឲ្យរៀបចំនៅទីកន្លែងណាមួយសមរម្យ។
អ្នកសម្របសម្រួលកម្មវិធីនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស បន្ថែមថាក្រុមអង្គការសង្គមស៊ីវិល សមាគម និងសហជីពពហុវិស័យ នឹងដាក់លិខិតមួយទៅកាន់សាលាក្រុងភ្នំពេញនាថ្ងៃទី២២ ខែមេសា ដោយស្នើយកទីតាំងសួនច្បារមុខវត្តបុទុមវតីធ្វើជាទីតាំងសម្រាប់ប្រារព្ធទិវាពលកម្មអន្តរជាតិ ១ឧសភា។
លោក ម៉េត មាសភក្តី អ្នកនាំពាក្យសាលារាជធានីភ្នំពេញ បានអះអាងប្រាប់វិទ្យុបារាំងអន្តរជាតិថារហូតមកដល់ពេលនេះ សាលារាជធានីទើបតែទទួលបានលិខិតពីសហជីពមួយ ដែលស្នើរៀបចំប្រារព្ធទិវាពលកម្មអន្តរជាតិ ១ឧសភា ខាងមុខនេះ។
លោក ម៉េត មាសភក្តី បានឆ្លើយតបចំពោះការលើកឡើង ដែលថាសាលារាជធានីកម្រនឹងអនុញ្ញាតឲ្យរៀបចំកម្មវិធីអ្វីមួយ គឺមិនមែនជាការពិតនោះទេ។ លោកថាកន្លងមកសាលារាជធានីភ្នំពេញធ្លាប់អនុញ្ញាតឲ្យសង្គមស៊ីវិល សហជីព និងអង្គការក្រៅរដ្ឋាភិបាល សម្តែងមតិ គ្រាន់តែនៅក្នុងលក្ខខណ្ឌខ្លះសាលារាជធានីភ្នំពេញមិនអនុញ្ញាតជូនទាំងស្រុងទេ។ ឧទាហរណ៍ដូចជាការដើរហែក្បួននៅតាមដងផ្លូវសាធារណៈជាដើម។
លោក ឃុន ថារ៉ូ អ្នកសម្របសម្រួលកម្មវិធីនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្សបញ្ជាក់ថាទិវាពលកម្មអន្តរជាតិខួបលើកទី១៣៣ នាឆ្នាំនេះ ក្រុមអង្គការសង្គមស៊ីវិលទាំង២១នឹងប្រារព្ធធ្វើឡើងនៅក្រោមប្រធានបទ “រួបរួមគ្នាការពារសិទ្ធិជាមូលដ្ឋានរបស់កម្មករនិយោជិត និងទីផ្សារការងារ”។
បើតាមលោក ថារ៉ូ ការជ្រើសរើសយកប្រធានបទនេះ ដោយសារតែសិទ្ធិជាមូលដ្ឋានរបស់ អង្គការ សមាគម សហជីព ត្រូវបានរឹតត្បិតដោយច្បាប់ ហើយបច្ចុប្បន្នសហភាពអឺរ៉ុបកំពុងដំណើរនីតិវិធីព្យួរ EBA ដែលអាចធ្វើឲ្យប៉ះពាល់ដល់ការងាររបស់កម្មករនិយោជិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ