កម្ពុជាទទួលបានមេដាយមាស ១ហើយ ពី Asian Games នៅឥណ្ឌូនេស៊ី
ទីបំផុតទៅ កម្ពុជា បានទទួលមេដាយមាស ១ហើយ ពីព្រឹត្តិការណ៍កីឡាអាស៊ី Asian Games លើកទី ១៨ ដែលបាននិងកំពុងធ្វើឡើងនៅប្រទេសឥណ្ឌូនេស៊ី។ ការទទួលបានមេដាយមាសនេះ ធ្វើឡើងដោយកីឡាការនីជឺជីតស៊ូ (Ju-Jitsu) កម្ពុជា បន្ទាប់ពីបានបំបាក់កីឡាការនីនៃប្រទេសអារ៉ាប់រួម ដោយលទ្ធផល ១០០ទល់នឹង០ នៅវគ្គផ្តាច់ព្រ័ត្រ ការប្រកួត កីឡាជឺជីតស៊ូ ទម្ងន់ក្រោម ៤៩គីឡូក្រាម នៅល្ងាចថ្ងៃសុក្រ ទី ២៤សីហានេះ។
ចុះផ្សាយនៅថ្ងៃ៖
ស្តាប់ - ០១:៥៥
គឺកីឡាការនីជឺជីតស៊ូកម្ពុជាវ័យ ១៦ឆ្នាំ ជាកូនខ្មែរអាមេរិកាំង ឈ្មោះ Jessa Khan នេះហើយ ដែលបានរកមេដាយមាសដំបូងឲ្យកម្ពុជា ក្នុងការប្រកួតកីឡាអាស៊ី លើកទី ១៨ នៅប្រទេសឥណ្ឌូនេស៊ី។ Jessa Khan បានប្រកួតតែមួយថ្ងៃប៉ុណ្ណោះ នៅថ្ងៃទី ២៤សីហា ដោយបានជួបប្រកួតជាមួយ គូប្រកួត ៥ប្រទេស។
ការប្រកួតទី ១ Jessa Khan បានប្រកួតយកឈ្នះកីឡាការិនីថៃ ដោយពិន្ទុដាច់ ១០០-០ ក្នុងប្រភេទទម្ងន់ -៤៩គីឡូក្រាម ។ ប្រកួតទី២ Jessa Khan បានឈ្នះដោយស្វ័យប្រវត្តិ បន្ទាប់ពីកីឡាការិនី ចិនបោះបង់ចោលការប្រកួត។ ចំណែកការប្រកួតទី៣ កីឡាការនី វ័យ ១៦ឆ្នាំរបស់កម្ពុជា បានប្រកួតឈ្នះកីឡាការិនី អ៊ីរ៉ង់។ រីឯប្រកួតទី៤ ឈ្នះកីឡាការនីហ្វីលីពីន ដោយពិន្ទុ១០០ទល់០ ដាច់តែម្តង មុននិង ឈានមកការប្រកួតចុងក្រោយ ឈ្នះកីឡាការិនី អារ៉ាប់រួម ដោយពិន្ទុ ១០០-០ដាច់ដែរ ហើយដណ្តើមបានមេដាយមាស។
គួរជម្រាបជូនថា នេះគឺជាមេដាយមាសទី ២ហើយ ដែលកម្ពុជាទទួលបាន ពីព្រឹត្តិការណ៍កីឡាប្រចាំទ្វីបដ៏ធំ Asian Games នេះ បន្ទាប់ពីលើកទី១ ធ្វើបានដោយកីឡាការនីតៃក្វាន់ដូកម្ពុជា ស៊ន សៀវម៉ី នៅក្នុងការប្រកួត Asian Games លើកទី ១៧ កាលពីឆ្នាំ ២០១៤ ដែលធ្វើឡើងនៅទីក្រុង Incheon ប្រទេសកូរ៉េខាងត្បូង។ ប៉ុន្តែនៅឆ្នាំនេះ កីឡាការនី ស៊ន សៀវម៉ី ដែលបានទៅចូលរួមប្រកួតដែរនោះ មិនអាចការពារមេដាយមាសរបស់ខ្លួនបាននោះទេ។
យ៉ាងណាក៏ដោយ ការប្រកួតកីឡាអាស៊ី នៅពុំទាន់ចប់នៅឡើយទេ ដូច្នេះកម្ពុជា ទំនងជាអាចបន្តបានមេដាយបន្ថែមទៀត។ ការប្រកួតកីឡាអាស៊ី បានចាប់ផ្តើមពីថ្ងៃទី ១៨ខែសីហា ឆ្នាំ ២០១៨ និងគ្រោងបញ្ចប់នៅថ្ងៃទី ២ខែកញ្ញា ឆ្នាំ ២០១៨។ កម្ពុជា បានបញ្ជូនកីឡា ១៣ប្រភេទទៅចូលរួមប្រកួត ដោយក្នុងនោះ មាន ៤ប្រភេទកីឡា បានចាញ់អស់ហើយ ហើយអត្តពលិក ក៏បានត្រលប់មកប្រទេសវិញជាបន្តបន្ទាប់។ ហើយប្រភេទកីឡាខ្លះ អត្តពលិកទើបតែចាប់ផ្តើមធ្វើដំណើរទៅប្រទេសឥណ្ឌូនេស៊ីនៅឡើយ ដើម្បីចូលរួមប្រកួតកីឡាផ្សេងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ