ក្រសួងដែនដីនឹងទូទាត់លុយជូនពលរដ្ឋប៊ូឌីញដើមខែក្រោយ
អ្នកនាំពាក្យក្រសួងដែនដី បានបង្ហើបពីគម្រោងទូទាត់លុយ ជូនពលរដ្ឋរស់នៅអគារប៊ូឌីញ នៅថ្ងៃទី៦មិថុនា ។ គិតរហូតមកដល់ពេលនេះ ពលរដ្ឋ៩២ភាគរយ បានចុះកិច្ចសន្យាលក់បន្ទប់ទៅឲ្យក្រុមហ៊ុនជប៉ុនរួចហើយ។ ចំនួនសល់ពីនេះ រដ្ឋមន្ត្រីក្រសួងដែនដីនឹងជួបដោះស្រាយបញ្ចប់ជាមួយពលរដ្ឋ នៅថ្ងៃទី៣០ឧសភា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៣
ក្រសួងដែនដីជឿជាក់ថា ពលរដ្ឋ៤៣គ្រួសារដែលមិនព្រមទទួលយកតម្លៃបន្ទប់១៤០០ដុល្លារក្នុងមួយម៉ែត្រការ៉េនៅពេលនេះ គឺពួកគេប្រាកដជាព្រមទទួលយកតម្លៃនេះនៅក្នុងកិច្ចប្រជុំជាមួយលោក ជា សុផារ៉ា រដ្ឋមន្ត្រីក្រសួងដែនដីជាថ្មីទៀត នៅថ្ងៃទី៣០ខាងមុខ។ ព្រោះតម្លៃបន្ទប់១៤០០ដុល្លារនេះ គឺជាតម្លៃមួយខ្ពស់ ហើយសមស្របជាមួយនឹងស្ថានភាពអគារប៊ូឌីញដែលកំពុងចាស់ឌ្រុធទ្រោមស្រាប់។ នេះបើតាមអ្វីដែលលោក សេង ឡូត អ្នកនាំពាក្យក្រសួងដែនដីអះអាងប្រាប់វិទ្យុបារាំងនៅថ្ងៃអាទិត្យនេះ។
ចំពោះការទូទាត់លុយនេះ កន្លងមករដ្ឋមន្ត្រីក្រសួដែនដីអះអាងថា ធ្វើឡើងតាមរយៈកុងធនាគារដោយមិនមែនជាការផ្ដល់លុយដោយផ្ទាល់ទៅឲ្យពលរដ្ឋនោះទេ។ ព្រោះលោករដ្ឋមន្ត្រីខ្លាចពលរដ្ឋប្រើប្រាស់លុយខុសគោលដៅ។ តាមគម្រោងបន្ទាប់ពីចុះកិច្ចសន្យា និងទទួលប្រាក់រួច ប្រជាពលរដ្ឋនឹងផ្តើមរើចេញពីអគារប៊ូឌីញស ក្នុងថ្ងៃតែមួយដោយចាប់ផ្ដើមពីថ្ងៃទី៦ ខែមិថុនា រហូតដល់ថ្ងៃទី៦ ខែកក្កដា ។ ក្រសួងក៏នឹងឧបត្ថម្ភទឹកប្រាក់ ១០០ដុល្លារបន្ថែមទៅលើថ្លៃដឹកជញ្ជូនរបស់ពួកគេ។
តាមរយៈតម្លៃ១៤០០ដុល្លារក្នុងមួយម៉ែត្រការ៉េក៏យ៉ាងហោចណាស់ពលរដ្ឋមួយគ្រួសារទទួលបានថវិកាសរុបប្រមាណ៥ទៅ៦ម៉ឺនដុល្លារ ដោយអាស្រ័យទៅលើទំហំបន្ទប់ជាក់ស្ដែង។ គួររម្លឹកថា អគារប៊ូឌីញកសាងឡើងនៅឆ្នាំ១៩៦៣។ ជាមួយនឹងអាយុកាលច្រើនបែបនេះក្រសួងដែនដីគ្រោងនឹងធ្វើការអភិវឌ្ឍឡើងវិញជាមួយនឹងក្រុមហ៊ុនជប៉ុន Arakawa ក្នុងតម្លៃ៨០លានដុល្លារអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ