លោកសម រង្ស៊ី បន្តអំពាវនាវកុំឲ្យកងទ័ពស្តាប់បញ្ជា ទោះប្រឈមនឹងការកាត់ទោសនៅក្រោយពិធីបុណ្យចូលឆ្នាំខ្មែរ
លោក សម រង្ស៊ី អតីតប្រធាន គណបក្ស ប្រឆាំងដែលកំពុងនីរទ្ទេសខ្លួននៅក្រៅប្រទេស បានសរសេរនៅលើគណនីយហ្វេសបុករបស់លោកកាលពីពីរថ្ងៃមុននេះថា លោកមិនខ្វល់ពីការកោះហៅរបស់តុលាកាក្រុងភ្នំពេញនោះឡើយ។ តុលាការក្រុងភ្នំពេញ ដែលបានចេញដីកាកោះហៅលោក សម រង្ស៊ី ឲ្យចូលសវនាការក្នុងសំណុំរឿងញុះញង់កងទ័ព នៅក្រោយពិធីបុណ្យចូលឆ្នាំខ្មែរខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
គឺតាមរយៈគណនីយហ្វេសបុករបស់ខ្លួន លោក សម រង្ស៊ី អតីតប្រធានគណបក្សប្រឆាំងដែលកំពុងនីរទ្ទេសខ្លួននៅក្រៅប្រទេស បានបន្តរិះគន់តុលាការកម្ពុជា ថាជាតុលាការអាយ៉ង បន្ទាប់ពីតុលាការក្រុងភ្នំពេញបានចេញដីកាកោះហៅលោកឲ្យចូលរួមសវនាការកាត់ទោស នៅថ្ងៃទី ២២ ខែមេសា ពោលគឺនៅក្រោយពីពិធីបុណ្យចូលឆ្នាំខ្មែរខាងមុខ។ ជាសវនាការពាក់ព័ន្ធនឹងសំណុំរឿង «ញុះញង់កុំឲ្យយោធាស្តាប់បង្គាប់ និងធ្វើឲ្យខូចទឹកចិត្តកងទ័ព»។ នេះបើយោងតាមដីកាកោះហៅរបស់អយ្យការអមសាលាដំបូងរាជធានីភ្នំពេញ កាលពីថ្ងៃទី ១៤ មីនា ឆ្នាំ ២០១៩នេះ។
លោក សម រង្ស៊ី ត្រូវបានចោទប្រកាន់ក្នុងបទចោទប្រកាន់ទាំងពីរខាងលើ តាមមាត្រា ៤៧១ និង៤៧២ នៃក្រមព្រហ្មទណ្ឌកម្ពុជា ចំពោះការអំពាវនាវកុំឲ្យយោធិនស្តាប់បង្គាប់ ដែលប្រព្រឹត្តទៅ កាលពីថ្ងៃទី ០៩ ធ្នូ ឆ្នាំ ២០១៧។ ជាសំណុំរឿងថ្មីចុងក្រោយបន្ថែមលើពាក្យបណ្តឹងជាច្រើនករណីទៀតដែលប្រឆាំងនឹងអតីតប្រធានគណបក្សប្រឆាំងលោក សម រង្ស៊ី។ តាមមាត្រាទាំងពីរនេះ លោកសម រង្ស៊ី នឹងត្រូវប្រឈមនឹងការផ្តន្ទាទោសឲ្យជាប់ពន្ធនាគារចន្លោះពី២ឆ្នាំ ទៅ៥ឆ្នាំ និងពិន័យជាប្រាក់ពី៤លានរៀលទៅ១០លានរៀល។ ប៉ុន្តែតាមរយៈគណនីយហ្វេសបុករបស់លោក កាលពីថ្ងៃទី ២៩ មីនា លោក សម រង្ស៊ី បានផ្គើននឹងដីកាកោះហៅនេះថា លោកមិនខ្វល់ពីការកោះហៅរបស់តុលាការក្រុងភ្នំពេញនេះទេ ហើយលោកនៅតែបន្តអំពាវនាវឲ្យកាន់តែខ្លាំងឡើងៗ ហើយកាន់តែញឹកញាប់ទៅៗថែមទៀត។ ជាក់ស្តែងបន្ថែមលើការអំពាវនាវនេះ កាលពីពីរថ្ងៃមុន លោក សម រង្ស៊ី បានអំពាវនាវថែមទៀត ដោយឲ្យជនរួមជាតិរបស់លោក ដែលមានកាំភ្លើងមួយដើមក្នុងដៃ ងើបប្រឆាំងនឹងការបង្រ្កាបនានា ពិសេសនៅពេលណាគេមករឹបអូសដីធ្លី និងផ្ទះសម្បែងជាដើម។ បើតាមលោក សម រង្ស៊ី ការការពារអាយុជីវិតរបស់ប្រជាពលរដ្ឋម្នាក់ៗ ពេលប្រឈមមុខនឹងការគំរាមកំហែងដល់ជីវិត ពីសំណាក់ជនណាមួយ ឬក្រុមណាមួយនោះ មិនមានទោសអ្វីទេចំពោះមុខច្បាប់។
សូមបញ្ជាក់ថា គិតត្រឹមដំណាច់ខែមីនា ឆ្នាំ ២០១៩នេះ គឺមានរយៈពេលជាង៤ឆ្នាំមកហើយ ដែលលោក សម រង្ស៊ី អតីតប្រធានគណបក្សប្រឆាំង បានកំពុងរស់នៅដោយនីរទ្ទេសខ្លួននៅក្រៅប្រទេស ចាប់តាំងពីលោកបានចេញពីប្រទេសកម្ពុជា នៅយប់ថ្ងៃទី ១២ តុលា ឆ្នាំ ២០១៥ ពោលគឺនៅក្រោយពិធីបុណ្យភ្ជុំបិណ្ឌមកនោះ។ ប៉ុន្តែតាមរយៈសុន្ទរកថាដែលស្រែកមកពីក្រៅប្រទេស លោក សម រង្ស៊ី តែងតែសន្យាថា លោកនឹងវិលត្រលប់មកកាន់ប្រទេសកម្ពុជាវិញឲ្យខាងតែបាន នៅក្នុងឆ្នាំ២០១៩នេះ បើទោះបីជាត្រូវប្រឈមនឹងការចាប់ខ្លួនក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ