ក្រសួងការបរទេសប្រកាសឥតកែប្រែដំណើរទស្សនកិច្ចលោក ហ៊ុន សែន ទៅអូស្ត្រាលី បើទោះបីជាមានបាតុកម្មប្រឆាំង
ក្រសួងការបរទេសកម្ពុជា នៅថ្ងៃទី ១២ មីនានេះ បានប្រកាសពីដំណើរទស្សនកិច្ចរបស់លោកនាយករដ្ឋមន្ត្រី ហ៊ុន សែន ទៅកាន់ប្រទេសអូស្ត្រាលី ដើម្បីចូលរួមកិច្ចប្រជុំកំពូលពិសេសអាស៊ាន-អូស្ត្រាលី ដែលនឹងធ្វើឡើងចុងសប្តាហ៍នេះ។ ដំណើររបស់ប្រមុខរដ្ឋាភិបាលកម្ពុជា នៅអូស្ត្រាលី គឺចំពេលដែលមានក្រុមពលរដ្ឋខ្មែរដែលត្រៀមទទួលស្វាគមន៍ និងក្រុមពលរដ្ឋខ្មែរដែលត្រៀមធ្វើបាតុកម្មប្រឆាំងផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
បើគ្មានការប្រែប្រួលទេ ប្រមុខរដ្ឋាភិបាលកម្ពុជាលោក ហ៊ុន សែន នឹងដឹកនាំគណៈប្រតិភូជាន់ខ្ពស់កម្ពុជា អញ្ជើញទៅចូលរួមកិច្ចប្រជុំកំពូលពិសេសអាស៊ាន-អូស្ត្រាលី ចាប់ពីថ្ងៃទី ១៦ ដល់ថ្ងៃទី ១៨ ខែមីនា ខាងមុខនេះ បើទោះបីជាមានការគំរាមធ្វើបាតុកម្មប្រឆាំងយ៉ាងណាក្តី។ ដំណើរទស្សនកិច្ចរបស់ប្រមុខរដ្ឋាភិបាលកម្ពុជា នៅក្នុងកិច្ចប្រជុំកំពូលពិសេស ដែលនឹងប្រព្រឹត្តទៅនៅទីក្រុងស៊ីដនី ប្រទេសអូស្ត្រាលីនេះ គឺតបតាមការអញ្ជើញរបស់នាយករដ្ឋមន្ត្រីអូស្ត្រាលី លោក ម៉ាល់កុម ធឺនប៊ុល (Malcolm Turnbull)។ នេះបើតាមសេចក្តីប្រកាសរបស់ក្រសួងការបរទេសកម្ពុជា។
គួរជំរាបជូនថា ដំណើរទស្សនកិច្ចរបស់ប្រមុខរដ្ឋាភិបាលកម្ពុជាទៅកាន់ប្រទេសអូស្ត្រាលីនេះ ហាក់កំពុងជួបភាពចម្រូងចម្រាស់។ ចម្រូងចម្រាស់ដោយសារតែ មានសហគមន៍ខ្មែរមួយក្រុមបានប្រកាសស្វាគមន៍ តែមានសហគមន៍ខ្មែរមួយក្រុមទៀត បានប្រកាសធ្វើបាតុកម្មប្រឆាំង។ តាមរយៈសេចក្តីថ្លែងការណ៍រួម ចុះថ្ងៃទី ១២ មីនានេះ សហគមន៍ខ្មែរមួយក្រុមតំណាងឲ្យសហគមន៍ខ្មែរចំនួន៧ មកពីប្រទេសអូស្ត្រាលី និងណូវ៉ែលហ្សេឡង់ បានប្រកាសគាំទ្រ និងស្វាគមន៍ដំណើរទៅដល់របស់លោកនាយករដ្ឋមន្ត្រី ហ៊ុន សែន និងបានប្រកាសថ្កោលទោសចំពោះក្រុមប្រឆាំង។ ប៉ុន្តែផ្ទុយពីនេះ សហគមន៍ខ្មែរមួយក្រុមទៀតដឹកនាំដោយលោក ហុង លីម សមាជិករដ្ឋសភាអូស្ត្រាលីដើមកំណើតខ្មែរ និងដោយមានការចូលរួមពីភរិយាសពលោកបណ្ឌិត កែម ឡី គឺអ្នកស្រី ប៊ូ រចនា ផង បានប្រកាសឲ្យមានការធ្វើបាតុកម្មប្រឆាំងនឹងវត្តមានរបស់ប្រមុខរដ្ឋាភិបាលកម្ពុជាលោក ហ៊ុន សែន នៅអូស្ត្រាលីនេះ។
យ៉ាងណាក៏ដោយ តាមគម្រោង នៅក្នុងក្របខ័ណ្ឌនៃកិច្ចប្រជុំកំពូលពិសេសអាស៊ាន-អូស្ត្រាលី នេះ លោកនាយករដ្ឋមន្ត្រី ហ៊ុន សែន រួមជាមួយថ្នាក់ដឹកនាំអាស៊ាន និងនាយករដ្ឋមន្ត្រីអូស្ត្រាលី នឹងអញ្ជើញធ្វើជាអធិបតីភាពក្នុងពិធីចុះហត្ថលេខាលើអនុស្សារណៈនៃការយោគយល់គ្នារវាងអាស៊ាន និងអូស្ត្រាលី ស្តីពី កិច្ចសហប្រតិបត្តិការប្រយុទ្ធប្រឆាំងភេរវកម្មអន្តរជាតិ។ ក្រៅពីនោះ លោកនាយករដ្ឋមន្ត្រី ហ៊ុន សែន នឹងជួបប្រជុំទ្វេរភាគីជាមួយនាយករដ្ឋមន្ត្រី វៀតណាម លោក ង្វៀន សួនហ្វ៊ុក និងនាយករដ្ឋមន្ត្រីឡាវ លោក ថងលូន ស៊ីស៊ូលីត។ បន្ទាប់ពីនោះ ប្រមុខរដ្ឋាភិបាលកម្ពុជា ក៏មានគម្រោងជួបជាមួយសហគមន៍ខ្មែរនៅអូស្ត្រាលី រួមជាមួយនិស្សិត និងអតីតនិស្សិតខ្មែរ ដែលកំពុងសិក្សានិងរស់នៅក្នុងប្រទេសអូស្ត្រាលីផងដែរ។
សូមបញ្ជាក់ដែរថា អមដំណើរទស្សនកិច្ចរបស់លោកនាយករដ្ឋមន្ត្រី ហ៊ុន សែន នៅក្នុងកិច្ចប្រជុំនេះ រួមមាន លោកទេសរដ្ឋមន្ត្រី ប្រាក់ សុខុន រដ្ឋមន្ត្រីការបរទេសកម្ពុជា លោក ឱម យ៉ិនទៀង អនុប្រធានលេខាធិការដ្ឋាននៃគណៈកម្មាធិការជាតិប្រឆាំងភេរវកម្ម និងជាប្រធានអង្គភាពប្រឆាំងអំពើពុករលួយ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ព្រមទាំងសមាជិក-សមាជិការរដ្ឋាភិបាល មួយចំនួនទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ