ទិវាជាតិនៃការចងចាំ២០ឧសភា៖ លោក ហ៊ុន សែន អំពាវនាវឲ្យប្រជាពលរដ្ឋចូលរួមការពារសន្តិភាព
នៅក្នុងឱកាសទិវាជាតិនៃការចងចាំ ២០ឧសភា លោកនាយករដ្ឋមន្ត្រី ហ៊ុន សែន បានអំពាវនាវឲ្យប្រជាពលរដ្ឋទាំងអស់ចូលរួមថែរក្សាការពារសន្តិភាពឲ្យបានគង់វង្ស។ សូមបញ្ជាក់ថា នៅថ្ងៃអាទិត្យនេះ កម្ពុជាប្រារព្ធទិវាជាតិនៃការចងចាំ ២០ ឧសភា ដើម្បីរំលឹកដល់វិញ្ញាណក្ខន្ធ ដល់ជនរងគ្រោះជាង៣លាននាក់ ដែលបានស្លាប់បាត់បង់ជីវិតនៅក្នុងរបបប្រល័យពូជសាសន៍ប៉ុលពត។
ចុះផ្សាយនៅថ្ងៃ៖
ស្តាប់ - ០៣:១០
ដូចរាងរាល់ឆ្នាំដែរ ទិវាជាតិនៃការចងចាំ ឬ ទិវាចងកំហឹង ២០ ឧសភា ត្រូវបានរដ្ឋាភិបាលកម្ពុជា ប្រារព្ធឡើងនៅឯសារមន្ទីរប្រល័យពូជសាសន៍បឹងជើងឯក ស្ថិតនៅក្នុងខណ្ឌដង្កោ ជាយទីក្រុងភ្នំពេញ ដោយមានការចូលរួមពីមហាជនទូទៅជាង៧ពាន់នាក់។ ពិធីនេះ បានប្រារព្ធធ្វើឡើង ក្រោមអធិបតីភាពអភិបាលរាជធានីភ្នំពេញ លោក ឃួង ស្រេង និងអតីតអភិបាលរាជធានីភ្នំពេញ លោក ប៉ា សុជាតិវង្ស និងអ្នកមុខអ្នកការជាច្រើនរូបទៀត។ ពិធីបានចាប់ផ្តើមដោយការសំដែងរឿងខ្លី ស្តីពី ការឡើងកាន់អំណាចនៃរបបប្រល័យពូជសាសន៍ ប៉ុល ពត និងការឈានទៅរំដោះប្រទេសចេញពីរបបខ្មែរក្រហម នៅថ្ងៃទី ៧ មករា ឆ្នាំ១៩៧៩ ។
ទិវាជាតិនៃការចងចាំ ត្រូវបានរដ្ឋាភិបាលកម្ពុជា ប្រារព្ធឡើង ដើម្បីជាការរំលឹកដល់វិញ្ញាណក្ខន្ធដល់ជនរងគ្រោះជាង៣លាននាក់ ដែលបានស្លាប់បាត់បង់ជីវិត នៅក្នុងរបបប្រល័យពូជសាសន៍ប៉ុលពត។ សម្រាប់លោកនាយករដ្ឋមន្ត្រី ហ៊ុន សែន ថ្ងៃទី ២០ ឧសភានេះ គឺជាការរំលឹកឡើងវិញ ដល់ការឈឺចាប់ពីឧក្រិដ្ឋកម្ម ដែលបានកើតឡើងក្នុងរបបប្រល័យពូជសាសន៍ប៉ុលពត (១៧ មេសា ១៩៧៥ - ៦ មករា ១៩៧៩)។ បើតាមលោកនាយករដ្ឋមន្ត្រី ប្រជាពលរដ្ឋកម្ពុជាភាគច្រើនលើសលុប បានដឹង និងបានយល់ច្បាស់ អំពីរឿងរ៉ាវសោកនាដកម្មដ៏ជូរចត់ ដែលប្រជាពលរដ្ឋខ្មែរបានឆ្លងកាត់ជិត៣ទសវត្សរ៍ ក្នុងភ្នក់ភ្លើងសង្គ្រាមនិងទឹកភ្នែក ការកាប់សម្លាប់ ការបំផ្លិចបំផ្លាញ ការជម្លៀសចេញពីទីលំនៅរបស់ខ្លួនដោយបង្ខំ និងការបង្ខំឱ្យធ្វើការដូចសត្វធាតុជាដើម។ មិនតែប៉ុណ្ណោះ ប្រជាពលរដ្ឋកម្ពុជា ត្រូវស្លាប់ដោយគ្មានថ្នាំសង្កូវព្យាបាល គ្មានអាហារបរិភោគគ្រប់គ្រាន់ គ្មានសិទ្ធិសេរីភាព គ្មានលទ្ធិប្រជាធិបតេយ្យ ហើយសូម្បីតែសិទ្ធិរស់រានមានជីវិតដែលជាសិទ្ធិមូលដ្ឋានមានពីកំណើតរបស់មនុស្សក៏គ្មានដែរ។ ទន្ទឹមនឹងការលើកឡើងបែបនេះ លោកនាយករដ្ឋមន្ត្រី ហ៊ុន សែន ក៏បានឆ្លៀតយកថ្ងៃនេះ ដើម្បីបន្តអំពាវនាវឲ្យប្រជាពលរដ្ឋកម្ពុជា ចូលរួមថែរក្សាការពារសន្តិភាព ឱ្យបានគង់វង្សជារៀងរហូត។ បើតាមលោកនាយករដ្ឋមន្ត្រី សន្តិភាពបានផ្តល់ឱកាសគ្រប់យ៉ាង ដល់ប្រជាពលរដ្ឋក្នុងការកសាងសង្គមគ្រួសារ សហគមន៍ និងប្រទេសជាតិ ឱ្យកាន់តែរីកចម្រើនឡើង។ សូមបញ្ជាក់ថា នេះគឺជាឆ្នាំទី១ហើយ ដែលទិវាជាតិនៃការចងចាំ ២០ឧសភា ត្រូវប្រារព្ធធ្វើឡើង បន្ទាប់ពីរដ្ឋាភិបាលកម្ពុជា បានសម្រេចដាក់បញ្ចូលជាថ្ងៃឈប់សម្រាក កាលពីដើមឆ្នាំ២០១៨ ខណៈពីមុនមកគេស្គាល់ត្រឹមថា ជាទិវានៃការចងកំហឹង។
គួរជំរាបជូនដែរថា ការប្រារព្ធទិវាជាតិនៃការចងចាំ ២០ ឧសភា ឆ្នាំ២០១៨នេះ បានធ្វើឡើងខណៈដែលតុលាការឧក្រិដ្ឋកម្មប្រល័យពូជសាសន៍ខ្មែរក្រហម (ECCC) កំពុងបន្តដំណើរការកាត់ទោសលើអតីតមេដឹកនាំខ្មែរក្រហមកំពូលៗ រួមមាន លោក នួន ជា និង ខៀវ សំផន ពីបទឧក្រិដ្ឋកម្មប្រល័យពូជសាសន៍ ឧក្រិដ្ឋកម្មប្រឆាំងនឹងមនុស្សជាតិ និងឧក្រិដ្ឋកម្មសង្គ្រាម ខណៈលោក អៀង សារី អតីតរដ្ឋមន្ត្រីការបរទេសនិងភរិយាបានទទួលមរណភាពទៅហើយ កាលពីឆ្នាំ២០១៣ និងឆ្នាំ២០១។ បច្ចុប្បន្ន តុលាការនេះ ក៏កំពុងបើកការស៊ើបអង្កេតទៅលើអតីតអ្នកទទួលខុសត្រូវខ្ពស់បំផុតនៃរបបខ្មែរក្រហម៤រូបទៀត នៅក្នុងសំណុំរឿង០០៣ និង០០៤ ខណៈលោកកាំង ហ្គេចអ៊ាវ ហៅឌុច អតីតមេគុកទួលស្លែង កំពុងអនុវត្តទោសនៅក្នុងពន្ធនាគារអស់មួយជីវិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ