បក្សធំពីរ នឹងបើកវគ្គបណ្ដុះបណ្ដាលសមត្ថភាពក្រុមប្រឹក្សាឃុំសង្កាត់របស់ខ្លួន
មួយសប្តាហ៍ក្រោយការបោះឆ្នោត គណបក្សសង្គ្រោះជាតិ បានបង្កើតគណៈកម្មការពិសេសមួយដើម្បីពង្រឹងសមត្ថភាពក្រុមប្រឹក្សាឃុំសង្កាត់ដឹកនាំដោយលោក សុន ឆៃ ដែលនឹងផ្ដើមការងារ នៅថ្ងៃទី១៣មិថុនាទៅ។ ចំណែកគណបក្សប្រជាជន ក៏នឹងពង្រឹងគោលជំហរ ការងារចំពោះមន្ត្រី ឃុំ សង្កាត់ របស់ខ្លួនដែរ នៅក្រោយការប្រកាសលទ្ធផលបោះឆ្នោតផ្លូវការ ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
ពង្រឹងសេវាសាធារណៈកុំឲ្យមានការថ្នាងថ្នាក់ពីប្រជាជជន នាំឲ្យមានការធ្លាក់ចុះសំឡេងគាំទ្រ គឺជាសារការដាស់តឿនរាល់ថ្ងៃរបស់គណបក្សប្រជាជនទៅកាន់មន្ត្រីឃុំសង្កាត់របស់ខ្លួន។ នេះបើតាមការគូសបញ្ជាក់របស់លោក សុខ ឥសាន អ្នកនាំពាក្យគណបក្សប្រជាជន។ លោក សុខ ឥសាន បន្ថែមថា មន្ត្រីឃុំសង្កាត់របស់គណបក្សប្រជាជនមិនបានជាប់ឆ្នោតក៏ទទួលបានការបណ្ដុះបណ្ដាលពីគណបក្សដែរ។
ចំណែកគណបក្សសង្គ្រោះជាតិវិញ បន្ថែមពីលើការបង្កើតគណៈកម្មការ ពង្រឹងសមត្ថភាពក្រុមប្រឹក្សាឃុំសង្កាត់ហើយ គណបក្សនឹងបង្កើតគណៈកម្មការចំណុះនៅតាមបណ្ដាលខេត្តដែលមានមេឃុំចៅសង្កាត់សង្គ្រោះជាតិជាប់ឆ្នោត។ លោក សុន ឆៃ ប្រធានគណៈកម្មការថ្មីនេះ បានគូសបញ្ជាក់ថា ការពង្រឹងសមត្ថភាពមន្ត្រី ឃុំសង្កាត់ធ្វើឡើងតាមរយៈការបណ្ដុះបណ្ដាលច្បាប់ ការដោះស្រាយបញ្ហា និងគំនិតនៃការអភិវឌ្ឍ។
មួយផ្នែកនៃការបណ្ដុះបណ្ដាលមន្ត្រីរបស់ខ្លួននេះ គណបក្សសង្គ្រោះជាតិបណ្ដាលមកពីមន្ត្រី ក្រុមប្រឹក្សាឃុំរបស់ខ្លួនខ្លះ មិនធ្លាប់ចូលប្រឡូកការងារជាមេឃុំ ឬចៅសង្កាត់ពីមុនមកទើបចាំបាច់ត្រូវតែបង្រៀនពីរបៀបផ្ដល់សេវាសាធារណៈធ្វើយ៉ាងម៉េចឲ្យប្រជាជនពេញចិត្ត។ បើតាមលោក សុន ឆៃ គណបក្សសង្គ្រោះជាតិក៏ចង់ពង្រឹងសមត្ថភាពជំទប់ទី១ ទី២ មកពីគណបក្សប្រជាជនដែរ ដើម្បីឲ្យប្រជាជនមើលឃើញពីសមត្ថភាពធ្វើការគ្រប់សមាជិកបក្សដែលជាប់ឆ្នោតទាំងអស់។
ប៉ុន្តែ លោក សុខ ឥសាន បានអះអាងថា មន្ត្រីឃុំសង្កាត់របស់គណបក្សប្រជាជនមានបទពិសោធន៍ការងារស្រាប់ និងតែងតែទទួលបានការបណ្ដុះបណ្ដាលនៅរៀងរាល់ថ្ងៃហើយ។តាមលទ្ធផលបឋមរបស់គ.ជ.ប. គណបក្សប្រជាជន ឈ្នះការគាំទ្រ នៅឃុំ សង្កាត់ចំនួន ជាង១១៥០។ គណបក្សសង្គ្រោះជាតិ ឈ្នះ នៅឃុំ សង្កាត់ជាង ៤៨០។
សូមបញ្ជាក់ថា ក្រៅពីគណបក្សធំទាំងពីរគណបក្សប្រជាធិបតេយ្យមូលដ្ឋានឯណេះវិញ បានចេញលិខិតអំពាវនាវដល់គណបក្សនយោបាយដែលឈ្នះ ទទួលបានតំណែងមេឃុំ និងចៅសង្កាត់ គួរណែនាំទៅសមាជិកក្រុមប្រឹក្សាឃុំ សង្កាត់របស់ខ្លួនឲ្យសម្របសម្រួល ក្នុងការបោះឆ្នោតជ្រើសរើសមេភូមិដោយប្រជាពលរដ្ឋក្នុងភូមិ មិនប្រកាន់និន្នាការនយោបាយ។ តែផ្ទុយទៅវិញមេភូមិទាំងនោះបែរជាដើរតាមដានប្រជាពលរដ្ឋ ហើយបម្រើការងារដោយរើសអើងនិន្នាការនយោបាយ និងគំរាមកំហែងបំភិតបំភ័យប្រជាពលរដ្ឋនៅមូលដ្ឋានរបស់ខ្លួនទៅវិញ។ បន្ថែមពីលើនេះ គណបក្សប្រជាធិបតេយ្យមូលដ្ឋានស្នើដល់រដ្ឋាភិបាលរៀបចំឲ្យមានកម្មវិធីជាតិពង្រឹងសមត្ថភាពមេឃុំ មេភូមិ ដើម្បីប្រជាពលរដ្ឋគ្រប់រូប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ