លោក សុខ ឥសាន មិនជឿថាតុលាការកំពូលនឹងដោះលែងលោក កឹម សុខា ខណៈអ្នកវិភាគមានសង្ឃឹមលើការនៅក្រៅឃុំ
អ្នកនាំពាក្យគណបក្សកាន់អំណាចបានអះអាងថាលោកមិនជឿថា តុលាការកំពូលនឹងដោះលែងលោក កឹម សុខា នៅពេលដ៍ខ្លីខាងមុខនេះទេ បើទោះបីជាក្រុមអ្នកវិភាគ និងមេធាវីការពារក្តីឲ្យប្រធានអតីតបក្សប្រឆាំងរូបនេះ មានសង្ឃឹមថា កូនក្តីរបស់ខ្លួនអាចបាននៅក្រៅឃុំក៏ដោយ។ ការយល់ឃើញផ្ទុយគ្នានេះ គឺស្របពេលដែលសហភាពអឺរ៉ុប និងប្រទេសជិត១០ផ្សេងទៀត បានជំរុញសារជាថ្មីឲ្យដោះលែងលោក កឹម សុខា ខណៈការបោះឆ្នោតបានបញ្ចប់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
ថ្លែងប្រាប់វិទ្យុបារាំងអន្តរជាតិRFIនៅថ្ងៃសុក្រនេះ លោក សុខ ឥសាន អ្នកនាំពាក្យគណបក្សប្រជាជនកម្ពុជា អះអាងថា លោកហ៊ានភ្នាល់១០០ស៊ីតែ១ បើសិនជាតុលាការកំពូលដោះលែងលោក កឹម សុខា ក្រោយសវនាការនៅថ្ងៃទី២២ខែសីហានេះ។ ជាថ្ងៃដែលតុលាការជាន់ខ្ពស់មួយនេះ បើកសវនាការជុំទី២លើពាក្យបណ្តឹងរបស់ក្រុមមេធាវីការពារក្តី ដែលស្នើឲ្យតុលាការអនុញ្ញាតឲ្យលោក កឹម សុខា បាននៅក្រៅឃុំបណ្តោះអាសន្ន បន្ទាប់ពីឃុំឃាំងអស់រយៈពេល១១ខែ ដែលនៅមិនទាន់កាត់ទោស។
បើតាមលោក សុខ ឥសាន មូលហេតុដែលលោកមិនមានជំនឿថាតុលាការកំពូលដោះលែងលោក កឹម សុខា គឺព្រោះតែលោក កឹម សុខា បាននិយាយថាខ្លួនទទួលបានការបណ្តុះបណ្តាលពីបរទេសដើម្បីធ្វើផ្លាស់ប្តូរនៅកម្ពុជា ដែលរដ្ឋាភិបាលចាត់ទុកថាចង់ផ្តួលរំលំរដ្ឋាភិបាលកម្ពុជាស្របច្បាប់។ ម្យ៉ាងទៀត បើសិនជាដោះលែង លោក កឹម សុខា នោះមានន័យថា រឿងនេះជារឿងនយោបាយដូចការដែលមជ្ឈដ្ឋានជាច្រើនលើកឡើងនោះមែន។ នេះជាការបន្ថែមរបស់លោក សុខ ឥសាន។
ការបញ្ជាក់ជំហររបស់អ្នកនាំពាក្យគណបក្សកាន់អំណាចនៅពេលនេះ គឺជាការឆ្លើយតបទៅនឹងការលើកឡើងរបស់ក្រុមអ្នកវិភាគ និងមេធាវីការពារក្តីឲ្យលោក កឹម សុខា ដែលមានសង្ឃឹមថា ប្រធានអតីតបក្សប្រឆាំងរូបនេះ អាចបាននៅក្រៅឃុំក្រោយ សវនាការរបស់តុលាការកំពូលថ្ងៃ២២ខែសីហាខាងមុខនេះ។ ការលើកឡើងរបស់ក្រុមនេះ គឺផ្អែកលើការបោះឆ្នោតត្រូវបានបញ្ចប់ និងខណៈដែលប្រទេសលោកសេរីមួយចំនួន ជំរុញសារជាថ្មីឲ្យដោះលែង លោក កឹម សុខា។
សូមបញ្ជាក់ថា ភ្លាមៗក្រោយការបោះឆ្នោត ក្រុមប្រទេសប្រកាន់លទ្ធិប្រជាធិបតេយ្យ រួមមានសហភាពអឺរ៉ុប សហរដ្ឋអាមេរិក អូស្រ្តាលី បារាំង អង់គ្លេស នូវែលហ្សេឡង់ កាណាដា អាឡឺម៉ង់ ជាដើម សុទ្ធតែបានសង្កត់ធ្ងន់ឲ្យដោះលែងលោក កឹម សុខា។
ប៉ុន្តែប្រទេសទាំងអស់នេះ បានចាត់ទុកការបោះឆ្នោតនៅកម្ពុជាដែលគ្មានបក្សប្រឆាំងដ៏ធំចូលរួមនេះថា មិនអាចជឿទុកចិត្តបានឡើយ។ នេះគឺផ្ទុយស្រឡះនឹងប្រទេស ចិន រុស្សី វៀតណាម ថៃ និងប្រទេសឡាវ ជាដើម ដែលថាការបោះឆ្នោតនៅកម្ពុជាមានភាពត្រឹមត្រូវនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ