យុវជន៤នាក់ត្រូវបានឃាត់ខ្លួន ករណីយកគ្រាប់បែកដៃចូលទៅការិយាល័យបោះឆ្នោត
យុវជនចំនួន៤នាក់ ត្រូវបានសមត្ថកិច្ចឃាត់ខ្លួនបានភ្លាមៗ ខណៈពួកគេយកគ្រាប់បែកដៃមួយគ្រាប់ចូលទៅការិយាល័យរៀបចំការបោះឆ្នោតមួយកន្លែងនៅខេត្តព្រះវិហារ កាលពីយប់មិញនេះ។ បើតាមសមត្ថកិច្ច ករណីនេះបានកើតឡើងនៅការិយាល័យបោះឆ្នោតលេខ ០៣១៧ ស្ថិតនៅក្នុងសាលារៀនចំរើនផល ឃុំឈានមុខ ស្រុកត្បែងមានជ័យ ។ ប៉ុន្តែអ្នកនាំពាក្យគណៈកម្មាធិការជាតិរៀបចំ ការបោះឆ្នោតអះអាងថានេះមិនមែនជាករណីធ្ងន់ធ្ងរប៉ះពាល់ដំណើរការបោះឆ្នោតនោះទេ។
ចុះផ្សាយនៅថ្ងៃ៖
ស្តាប់ - ០១:១៦
លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំ ការបោះឆ្នោត(គ.ជ.ប) បានអះអាងថា ករណីនេះគឺមិនមែនជាការវិធង្សនាដែលរារាំងដល់ដំណើរការបោះឆ្នោតនោះទេ។ លោកចាត់ទុកករណីនេះថា គ្រាន់តែជាចរិករបស់ក្មេងស្ទាវដែលនិយមលេងសម្ភារៈបែបនេះតែប៉ុណ្ណោះ។
បើតាមលោក ហង្ស ពុទ្ធា សមត្ថកិច្ចបានឃាត់ខ្លួនយុវជនទាំង៤នាក់សួរនាំ និងកំពុងពិចារណាថានឹងសម្រេចដោះលែងវិញឬយ៉ាងណា?
យោងតាមរបាយការណ៍របស់សមត្ថកិច្ច គឺនៅម៉ោង៧យប់ ថ្ងៃទី២៧ ខែកក្កដា ឆ្នាំ២០១៨ មានយុវជន៤នាក់ បានយកគ្រាប់បែកដៃមួយគ្រាប់ចូលក្នុងការិយាល័យបោះឆ្នោតលេខ ០៣១៧ ស្ថិតនៅក្នុងសាលារៀនចំរើនផល ឃុំឈានមុខ ស្រុកត្បែងមានជ័យ ខេត្តព្រះវិហារ ប៉ុន្តែត្រូវបានកម្លាំងសន្តិសុខការពារនៅទីនោះ ធ្វើការឃាត់ខ្លួន រួចបញ្ជូនទៅកាន់នគរបាលប៉ុស្តិ៍ធ្វើការសាកសួរ។
បើតាមអ្នកនាំពាក្យ(គ.ជ.ប) ស្ថាប័នរៀបចំការបោះឆ្នោតមួយនេះបានសហការជាមួយក្រសួងមហាផ្ទៃ និងក្រសួងការពារជាតិដើម្បីការពារសន្តិសុខទាំងមូលក្នុងអំឡុងពេលរៀបចំការបោះឆ្នោតថ្នាក់ជាតិនេះ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ