សហភាពការងារកម្ពុជាស្នើឲ្យដោះលែងសកម្មជនដីធ្លីពីរនាក់នៅខេត្តព្រះសីហនុ
សហភាពការងារកម្ពុជា របស់ លោក អាត់ ធន់ បានចេញសេចក្តីថ្លែងការណ៍មួយកាលពីម្សិលមិញដោយទាមទារឲ្យដោះលែងសកម្មជនដីធ្លីចំនួន២នាក់ ដែលសមត្ថកិច្ចខេត្តព្រះសីហនុបានចាប់ខ្លួនពាក់ព័ន្ធនឹងបញ្ហាដីធ្លី។ បើតាមសហភាពការងារកម្ពុជា ទង្វើអយុត្តិធម៌នេះ បានធ្វើឲ្យពលរដ្ឋមានការភ័យខ្លាច និងព្រួយបារម្ភខ្លាំងទៅលើសុវត្ថិភាពលំនៅឋាន និងសិទ្ធិលើដីធ្លីរបស់ពួកគេ។
ចុះផ្សាយនៅថ្ងៃ៖
លោក ទេព សុផា និងលោក ឆាយ រ័ត្ន រហូតមកទល់ពេលនេះ នៅមិនទាន់ត្រូវបានដោះលែងនៅឡើយទេ បន្ទាប់ពីពួកគេត្រូវបានអាជ្ញាធរចាប់ខ្លួន កាលពីថ្ងៃចន្ទ នៅក្នុងទំនាស់ដីធ្លីមួយ នៅសង្កាត់១ ខេត្តព្រះសីហនុ។
យោងតាមសេចក្តីថ្លែងការណ៍របស់សហភាពការងារកម្ពុជា ព្រឹត្តិការណ៍នេះផ្តើមចេញពីសកម្មភាពរបស់អាជ្ញាធរខេត្ត ដែលជីកដីកាយព្រំ រំលោភលើដីប្រជាពលរដ្ឋជាង១០០គ្រួសារ ជាហេតុធ្វើឲ្យពលរដ្ឋខឹងសម្បា និងចុះទៅយំស្រែកក្នុងប្រឡាយព្រំដី ដើម្បីស្នើឲ្យអាជ្ញាធរបញ្ឈប់សកម្មភាពជីកកកាយ។ ខណៈនោះ ឈ្មោះ ទេព សុផា បុគ្គលិកស្ម័គ្រចិត្តរបស់សហភាពការងារកម្ពុជាបានស្រែកហៅប្រជាពលរដ្ឋទាំងនោះឡើងពីប្រឡាយដើម្បីយកបញ្ហាទៅដោះស្រាយតាមច្បាប់ជាមួយអាជ្ញាធរខេត្ត ស្រាប់អភិបាលរងខេត្តឈ្មោះ ស្រ៊ុន ស្រ៊ន់ បញ្ជាសមត្ថកិច្ចឲ្យចាប់ខ្លួន ឈ្មោះទេព សុផា ភ្លាមៗតែម្តង។ បន្ទាប់មកឈ្មោះ ឆាយ រ័ត្ន សកម្មជនដីធ្លីម្នាក់ទៀត បានដើរទៅជម្រាបសួរអាជ្ញាធរករណីចាប់ខ្លួនឈ្មោះ ទេព សុផា ពេលនោះអាជ្ញាធរបានចាប់ខ្លួនឈ្មោះ ឆាយ រ័ត្ន បន្ថែមទៀត។ នេះជាការបញ្ជាក់នៅក្នុងសេចក្តីថ្លែងការណ៍ដដែល។
លើសពីនេះទៀត បើតាមសហភាពការងារកម្ពុជា អាជ្ញាធរមិនត្រឹមតែចាប់ខ្លួនមនុស្ស២នាក់ប៉ុណ្ណោះទេ គឺថែមទាំងផ្ទុះអាវុធចំនួន៣គ្រាប់ដោយបណ្តេញប្រជាពលរដ្ឋ និងវាយប្រជាពលរដ្ឋឲ្យរងរបួសមួយចំនួន។
សហភាពការងារកម្ពុជា បានស្នើឲ្យរដ្ឋមន្រ្តីក្រសួងមហាផ្ទៃ និងរដ្ឋមន្រ្តីក្រសួងរៀបចំដែនដី ពិនិត្យទៅលើសកម្មភាពរបស់អាជ្ញាធរដែនដី ព្រមទាំងទាមទារឲ្យដោះលែងបុរស២នាក់នោះដោយឥតលក្ខខណ្ឌ និងដោះស្រាយវិវាទដីធ្លីជាបន្ទាន់ដើម្បីឲ្យពលរដ្ឋទាំងនោះបានសិទ្ធិកាន់កាប់ដីធ្លីស្របច្បាប់។
តាមព័ត៌មានចុងក្រោយពីសហភាពការងារកម្ពុជា លោក ទេព សុផា និងលោក ឆាយ រ័ត្ន ត្រូវបានបញ្ជូនចេញពីស្នងការនគរបាលខេត្តព្រះសីហនុ មកកាន់សាលាដំបូងខេត្តនេះ ដើម្បីស៊ើបអង្កេត និងសាកសួរ នៅវេលាម៉ោង១០ព្រឹក ថ្ងៃពុធ ទី២២ ខែមករា ឆ្នាំ២០១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ