ប្រធានក្រុមហ៊ុនម្នាក់ត្រូវបានបញ្ជូនទៅតុលាការថ្ងៃនេះ ពីបទឆបោក ក្រោមរូបភាពទិញ-លក់ដីធ្លី
សមត្ថកិច្ចសម្រេចបញ្ជូនបុរសម្នាក់អាយុ៣៦ឆ្នាំទៅកាន់តុលាការខេត្តសៀមរាបនៅថ្ងៃសៅរ៍នេះ បន្ទាប់ពីប្រធានក្រុមហ៊ុនទិញ-លក់ដីឡូតិ៍រូបនេះ ត្រូវបានពលរដ្ឋជាច្រើននាក់ប្តឹងចោទប្រកាន់ពីបទឆបោកប្រាក់រាប់រយលានដុល្លារ។ បើតាមសមត្ថកិច្ច រូបភាពនៃអំពើឆបោកនេះ គឺជនសង្ស័យបានដើរតួនាទីជាម្ចាស់គម្រោងអភិវឌ្ឍន៍ ទៅលើវិស័យអចលនទ្រព្យ ដោយបបួលជនរងគ្រោះឲ្យដាក់លុយវិនិយោគ ហើយសន្យាទទួលបានភាគលាភ ឬប្រាក់ចំណេញខ្ពស់ប្រចាំខែ។
ចុះផ្សាយនៅថ្ងៃ៖ កែប្រែថ្ងៃទី៖
បុរសដែលសមត្ថកិច្ចចាប់ខ្លួនបញ្ជូនទៅកាន់តុលាការខេត្តសៀមរាបនោះ គឺឈ្មោះ ឌឹម សួនណាត អាយុ៣៦ឆ្នាំ ដែលមានទីលំនៅក្នុងសង្កាត់ភ្នំពេញថ្មី ខណ្ឌសែនសុខ។ ប៉ុន្តែជនសង្ស័យ ត្រូវបានសមត្ថកិច្ចអះអាងថា បានប្រព្រឹត្តបទល្មើសផ្តើមចេញពីខេត្តសៀមរាប តាមរយៈ ដើរតួនាទីជាម្ចាស់គម្រោងអភិវឌ្ឍន៍ ទៅលើវិស័យអចលនទ្រព្យ រួមមាន ពុះដីឡូតិ៍ ផ្ទះល្វែង និងវីឡាជាដើម។
ចំណាត់ការនេះធ្វើឡើង ក្រោយពីមានបណ្តឹងរបស់ពលរដ្ឋជាច្រើននាក់ ដែលប្រធានក្រុមហ៊ុន អ៊ីណា រីតា ឌីវេ លុប មែន។ ជាបណ្តឹងដែលប្តឹងពីបទឆបោកប្រាក់ក្នុងរូបភាពចូលហ៊ុនរកស៊ី ដែលធ្វើឲ្យជនរងគ្រោះម្នាក់ៗខ្លះ អស់លុយរាប់ពាន់ និងខ្លះរាប់ម៉ឺនដុល្លារ ដែលសរុបជាទឹកប្រាក់គឺខ្ទង់រយលានដុល្លារ។ រូបភាពឆបោកនេះ ជនសង្ស័យបានធ្វើកិច្ចសន្យាវិនិយោគ ជាមួយជនរងគ្រោះឲ្យដាក់លុយវិនិយោគ ដោយទទួលបានភាគរយខ្ពស់ប្រចាំខែ ដែលគេហៅថាភាគលាភ ឬប្រាក់ចំណេញ ប៉ុន្ដែជនរងគ្រោះបានទទួលប្រាក់ចំណេញនេះ តែខែដំបូង ឬពីរខែដំបូង ឬបីខែដំបូងតែប៉ុណ្ណោះ។
គេកត់សំគាល់ នេះមិនមែនជាលើកទី១ទេ។ ករណីក្រុមហ៊ុនរកស៊ីឆបោកស្រដៀងគ្នានេះគឺបានកើតផងដែរកាលពីពេលកន្លងទៅ។ ពលរដ្ឋជាង ២០០០នាក់មកពីគ្រប់រាជធានី ខេត្ត ទាំង ២៥ បានក្រុមហ៊ុន EBC ទៅតុលាការពីបទឆបោកប្រាក់ពួកគាត់ជាង ៥០លានដុល្លារ។ ការប្ដឹងនេះធ្វើឡើងបន្ទាប់ក្រុមហ៊ុន EBC រកស៊ីដាក់ទុនវិនិយោគជាមួយពលរដ្ឋ ដើម្បីទទួលបានការប្រាក់ ១០ភាគរយក្នុងមួយខែ។ប៉ុន្តែនាពេលបច្ចុប្បន្ន ការរកស៊ីដាក់ប្រាក់ក្រោមរូបភាពគម្រោងទិញ-លក់ អចលនៈទ្រព្យនេះបាននិងកំពុងតែកើតឡើងទូទាំងប្រទេស ដែលករណីមួយចំនួនត្រូវបានសមត្ថកិច្ចអះអាងថា ធ្វើឡើងក្រោមរូបភាពឆបោកតែប៉ុណ្ណោះ។ សមត្ថកិច្ចបានអំពាវនាវឲ្យជនរងគ្រោះដែលចាញ់បោកក្រុមហ៊ុន ក្នុងការរកស៊ីមុខរបរបែបនេះ ចេញមុខដាក់ពាក្យបណ្តឹង ប៉ុន្តែជនរងគ្រោះខ្លះទៀតមិនហ៊ានចេញមុខនៅឡើយ ដោយសារតែភាពអាម៉ាស ព្រោះចង់បានចំណេញលឿនពេក។
បើតាមសមត្ថកិច្ច ករណីបុរស ឈ្មោះ ឌឹម សួនណាត ជាប្រធានក្រុមហ៊ុន អ៊ីណា រីតា ឌីវេ លុប មែន គឺមានមន្ដ្រីជាន់ខ្ពស់ នៅក្រសួងស្ថាប័នរដ្ឋ និងកងកម្លាំងប្រដាប់អាវុធ ជាអ្នកជាប់ពាក់ព័ន្ធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ