អ្នកតាមដាននយោបាយមើលឃើញថា ការប្រតិបត្តិតាមរដ្ឋធម្មនុញ្ញគឺធ្វើមិនបានត្រឹមត្រូវនៅឡើយ
នៅថ្ងៃទី២៤ ខែកញ្ញានេះ រដ្ឋធម្មនុញ្ញ ដែលជាច្បាប់កំពូលរបស់កម្ពុជាមានអាយុ២៦ឆ្នាំហើយ ក្រោយពីត្រូវបានព្រះមហាក្សត្រឡាយព្រះហស្តប្រកាសឲ្យប្រើប្រាស់កាលពីឆ្នាំ១៩៩៣។ ការប្រតិបត្តិរដ្ឋធម្មនុញ្ញនេះ ត្រូវបានអ្នកតាមដាននយោបាយមើលឃើញថា គឺធ្វើមិនបានត្រឹមត្រូវនៅឡើយ តែរដ្ឋសភាកម្ពុជាអះអាងថាការអនុវត្តរដ្ឋធម្មនុញ្ញមិនមានអ្វីចោទជាបញ្ហានោះទេ។
ចុះផ្សាយនៅថ្ងៃ៖
លោកបណ្ឌិត ឡៅ ម៉ុងហៃ អ្នកវិភាគនយោបាយ ក្នុងឱកាសខួប២៦ឆ្នាំនៃការប្រកាសដាក់ឲ្យប្រើប្រាស់រដ្ឋធម្មនុញ្ញ បានលើកឡើងថា ការអនុវត្តឬការប្រតិបត្តិតាមរដ្ឋធម្មនុញ្ញ គឺមិនបានត្រឹមត្រូវទេ ដោយសារតែការធ្វើវិសោធនកម្មជាបន្តបន្ទាប់លើច្បាប់កំពូលមួយនេះ ដូចជាការអនុម័តរដ្ឋធម្មនុញ្ញបន្ថែមជាដើម។ លោកបញ្ជាក់ថា ការកែរដ្ឋធម្មនុញ្ញ ឬវិសោធនកម្ម គឺមានន័យថាយើងមិនបានអនុវត្តរដ្ឋធម្មនុញ្ញ ដែលមានស្រាប់ទេ។
អគ្គលេខាធិការដ្ឋានរដ្ឋសភា លោក ឡេង ប៉េងឡុងបានថ្លែងប្រាប់វិទ្យុបារាំងអន្តរជាតិថា ការប្រតិបត្តិតាមរដ្ឋធម្មនុញ្ញតាំងពីដើមមកគឺមិនមានបញ្ហាអ្វីទេ ពីព្រោះថាការធ្វើវិសោធនកម្មកន្លងមកគឺបានធ្វើតាមរដ្ឋធម្មនុញ្ញ។ លោកបានចោទជាសំនួរថា តើការអនុវត្តរដ្ឋធម្មនុញ្ញកម្ពុជាបច្ចុប្បន្នបានជះឥទ្ធិពលអាក្រក់អ្វីដល់ប្រទេសជាតិ? គឺមិនមាននោះទេ។ លោក ឡេង ប៉េងឡុង បញ្ជាក់ថា ការអនុវត្តរដ្ឋធម្មនុញ្ញនៅពេលនេះគឺធ្វើបានល្អ។
បច្ចុប្បន្ននេះ រដ្ឋធម្មនុញ្ញ ដែលមាន១៧ជំពួក និង១៦០មាត្រា គឺបានកើតឡើងក្រោយមានកិច្ចព្រមព្រៀងសន្តិភាពទីក្រុងប៉ារីស ២៣ តុលា ១៩៩១ ដែលនាំឲ្យមានសភាធម្មនុញ្ញ។
តែក្រោយចប់សភាធម្មនុញ្ញ កម្ពុជាក៏បានបង្កើតរដ្ឋធម្មនុញ្ញឡើងនៅក្នុងឆ្នាំ១៩៩៣ ដោយមានការឯកភាពពីសំណាក់គណបក្សចំនួនបួនគឺ គណបក្សប្រជាជនកម្ពុជា គណបក្សហ៊្វុនស៊ិនប៉ិច គណបក្សប្រជាធិបតេយ្យសេរីនិយម ព្រះពុទ្ធសាសនា របស់លោកតា សឺន សាន និង គណបក្សម៉ូលីណាកា។ ខ្លឹមសារសំខាន់ៗនៃរដ្ឋធម្មនុញ្ញ បានយកមូលដ្ឋានគ្រឹះពីកិច្ចព្រមព្រៀងសន្តិភាពទីក្រុងប៉ារីសស្ដីពីបញ្ហាកម្ពុជាថ្ងៃទី២៣តុលាឆ្នាំ១៩៩១។
សូមជម្រាបជូនថា គិតរហូតមកដល់ពេលនេះ រដ្ឋធម្មនុញ្ញកម្ពុជា ត្រូវបានធ្វើវិសោធនកម្មចំនួន៩លើកមកហើយ។ ការធ្វើវិសោធនកម្មលើកទី១ នៅខែកក្កដាឆ្នាំ១៩៩៤ លើកទី២នៅខែមីនាឆ្នាំ១៩៩៩ លើកទី៣ ខែកក្កដាឆ្នាំ២០០១ លើកទី៤ខែកក្កដាឆ្នាំ២០០៤ លើកទី៥ខែឧសភាឆ្នាំ២០០៥ លើកទី៦ខែមីនាឆ្នាំ២០០៦ លើកទី៧ខែមករា ឆ្នាំ២០០៨លើកទី៨ គឺនៅថ្ងៃទី១ ខែតុលា ឆ្នាំ២០១៤ និងលើកទី៩នៅខែកុម្ភៈឆ្នាំ២០១៨នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ