គ្រោះថ្នាក់ចរណ៍៖ អ្នកច្បាប់និងអ្នកអនុវត្តច្បាប់ស្នើមហាជនបញ្ចប់ការប្រើហិង្សាទៅលើជនបង្ក
អ្នកនាំពាក្យរដ្ឋាភិបាលនៅថ្ងៃទី១មេសានេះ បានរៀបចំធ្វើសន្និសីទសារព័ត៌មានស្ដីពីទិដ្ឋភាពច្បាប់ និងវិធានការទប់ស្កាត់គ្រោះថ្នាក់ចរាចរណ៍។ ជាសន្និសីទ ដែលបានផ្ដោតទៅលើទំនួលខុសត្រូវរបស់អ្នកបង្ក ដែលចំណុចនេះគេមើលឃើញថា ភាគច្រើននៃជនបង្កបានរត់គេចពីបញ្ហា។ ប៉ុន្តែដើម្បីទទួលបានយុត្តិធម៌ស្មើគ្នា អ្នកច្បាប់និងអ្នកអនុវត្តច្បាប់ស្នើឲ្យជនបង្កប្រឈមមុខដោះស្រាយ ខណៈមានការស្នើឲ្យបញ្ចប់ការប្រើហិង្សាទៅលើជនបង្ក។
ចុះផ្សាយនៅថ្ងៃ៖
តាមរយៈការលើកឡើងនៅក្នុងសន្និសីទកាសែតនាថ្ងៃចន្ទនេះ លោកឧត្តមសេនីយ៍ឯក រុន រ័ត្នវាសនា ប្រធាន នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈក្រសួងមហាផ្ទៃគូសបញ្ជាក់ថា ពេលខ្លះជនបង្កមិនមែនជាអ្នកខុសទាំងស្រុងឡើយ ពោលគឺពួកគេក៏ជាជនរងគ្រោះដែរ។ ដូច្នេះរាល់អ្នកបង្ក ត្រូវប្រឈមមុខដោះស្រាយបញ្ហាដោយសន្តិវិធីនៅនឹងកន្លែង។
ជុំវិញការជំរុញនេះ សំណួរបានចោទឡើងថា ជនបង្កនឹងក្លាយជាជនរងគ្រោះម្នាក់ទៀតតាមរយៈការប្រើអំពើហិង្សារបស់មហាជន។ កង្វល់នេះ លោក សុខ ផេង អនុប្រធានក្រុមប្រឹក្សាអ្នកច្បាប់នៃទីស្តីការគណៈរដ្ឋមន្ត្រីផ្ដល់យោបល់ថា ក្នុងស្ថានភាពដែលអ្នកបង្ក មើលទៅទំនងដឹងខ្លួនថា ជារងគ្រោះដោយហិង្សា ពួកគេអាចភៀសខ្លួន ទៅកន្លែងមានសុវត្ថិភាព តែពុំមែនជាការជំរុញឲ្យរត់គេចខ្លួនឡើយ តែអាចចូលខ្លួនដោះស្រាយបញ្ហាតាមក្រោយ។ ប៉ុន្តែមហាជនត្រូវចាំថា ប្រសិនបើព្រួតគ្នាវាយជនបង្ក ពួកគេនឹងក្លាយជាជនបទល្មើសប្រព្រឹត្តបទល្មើសថ្មីមួយទៀតពីបទហិង្សា និងមនុស្សឃាតដោយចេតនា។ នេះបើតាម លោក សុខ ផេង។ លោកថា មានច្បាប់មួយប៉ុណ្ណោះជាអ្នកវិនិច្ឆ័យទោសកំហុស។
គួរជម្រាបថា ការក្រើនរំឭករបស់សមត្ថកិច្ច និងអ្នកច្បាប់ធ្វើឡើងបន្ទាប់ពីមួយរយៈពេលចុងក្រោយនេះគ្រោះថ្នាក់ចរាចរណ៍កើតឡើង ក្រោមរូបភាពធ្ងន់ធ្ងរ។ ជាក់ស្ដែងថ្មីៗនេះ យុវតីម្នាក់បានបើករថយន្តបុកនិស្សិតស្រីម្នាក់ស្លាប់ភ្លាមៗនៅនឹងកន្លែង ដែលហេតុការណ៍ធ្វើឲ្យសាធារណៈជនស្ដីបន្ទោសលើការធ្វេសប្រហែសរបស់អ្នកប្រើប្រាស់ផ្លូវ។ ផ្អែកតាមច្បាប់ចរាចរណ៍ផ្លូវគោក ជនដែលបើកបររថយន្តបង្កឲ្យគេស្លាប់ គឺប្រឈមនឹងការផាកពិន័យ២០លានរៀល មិនឲ្យប្រើប្រាស់រថយន្តរយៈពេល៥ឆ្នាំ ដកហូតការប្រកបវិជ្ជាជីវៈផ្សេងៗ ដែលនេះជាទោសបន្ទោសថែមលើការជាប់ពន្ធនាគារ។
បើតាមរបាយការណ៍របស់សមត្ថកិច្ចរយៈពេល៣ខែក្នុងឆ្នាំ២០១៩ គ្រោះថ្នាក់ចរាចរណ៍សម្លាប់មនុស្សជិត២០០នាក់ ខណៈមួយថ្ងៃមនុស្សស្លាប់ចន្លោះពី៩ទៅ១១នាក់។ ដោយឡែកក្នុង១ឆ្នាំៗ កម្ពុជាខាតបង់៣៥០លានដុល្លារ ដោយសារតែគ្រោះថ្នាក់ចរាចរណ៍ ខណៈអ្នកស្លាប់មិនពាក់មួកសុវត្ថិភាពមានជាង៧៨%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ