លោក សួន សេរីរដ្ឋា ស្នើឲ្យឈប់ប្រើឈ្មោះគណបក្សអំណាចខ្មែរ ខណៈលោកប្តូរឈ្មោះគណបក្សនេះ
លោក សួន សេរីរដ្ឋា ដែលត្រូវបានការលើកលែងទោសពីព្រះមហាក្សត្រ សម្រេចចិត្តទៅបង្កើតគណបក្សនយោបាយមួយទៀត បន្ទាប់ពីគណបក្សអំណាចខ្មែររបស់លោក ត្រូវបានធ្លាក់ទៅលើលោក សួង សុភ័ណ្ឌ ជាអ្នកគ្រប់គ្រង តាំងពីអំឡុងពេលលោក សួន សេរីរដ្ឋាជាប់ពន្ធនាគារ។ បើតាមលោក សួន សេរីរដ្ឋា ក្រសួងមហាផ្ទៃគួរតែលុបឈ្មោះគណបក្សអំណាចខ្មែរចោល ដោយបើកផ្លូវឲ្យសមាជិកបក្សនេះអាចមកចូលរួមនៅក្នុងគណបក្សថ្មីរបស់លោកវិញ។ ប៉ុន្តែលោក សួង សុភ័ណ្ឌ ដែលកំពុងគ្រប់គ្រងគណបក្សអំណាចខ្មែរ បញ្ជាក់ថា គណបក្សនេះបានធ្វើសមាជប្តូរឈ្មោះទៅជាគណបក្សខ្មែរឈ្នះតាមសំណើរបស់ក្រសួងមហាផ្ទៃហើយ។
ចុះផ្សាយនៅថ្ងៃ៖ កែប្រែថ្ងៃទី៖
ជាបឋមសូមរំឭកថា ភាពចម្រូងចម្រាស់នៃការដណ្តើមគ្នា គ្រប់គ្រងគណបក្សអំណាចខ្មែរបានកើតឡើងនៅគ្រា លោក សួន សេរីរដ្ឋា ត្រូវបានដោះលែង កាលពីយប់ថ្ងៃទី២៣ ខែសីហា ឆ្នាំ២០១៨ ក្រោយព្រះមហាក្សត្រលើកលែងទោស បន្ទាប់ពីលោកបានសរសេរលិខិតសុំទោសលោក ហ៊ុន សែន។ ក្នុងអំឡុងពេលលោក សួន សេរីរដ្ឋាជាប់ពន្ធនាគារនោះ គណបក្សអំណាចខ្មែរដែលប្រកាសមិនចូលរួមបោះឆ្នោតឆ្នាំ២០១៨កន្លងមក គឺស្ថិតក្រោមការគ្រប់គ្រងរបស់ លោក សួង សុភ័ណ្ឌ មកដល់ពេលនេះ។
ក៏ប៉ុន្តែបើតាម លោក សួន សេរីរដ្ឋា ការប្តូរឈ្មោះគណបក្សអំណាចខ្មែរដើម្បីបើកផ្លូវឲ្យសមាជិករបស់ខ្លួនអាចចូលរួមដោយសេរីនៅក្នុងគណបក្សថ្មីនិងប្រកួតប្រជែងក្នុងការបោះឆ្នោតឃុំ-សង្កាត់ឆ្នាំ២០២២ខាងមុខ។
គណបក្សថ្មីរបស់ លោក សួន សេរីរដ្ឋា ដែលត្រូវដាក់ឲ្យមានការបោះឆ្នោតសម្រេចនៅចុងសប្ដាហ៍នេះគឺទី១ឈ្មោះថា «គណបក្សខ្មែរកែទម្រង់» និងទី២ឈ្មោះថា «គណបក្សផ្ដល់អំណាចពលរដ្ឋ»។
បើតាម លោក សួន សេរីរដ្ឋា ការដែលលោកសម្រេចចិត្តទៅបង្កើតគណបក្សថ្មីនេះ គឺដើម្បីបន្តសកម្មភាពនយោបាយឆ្លើយតបទៅនឹងការចង់បានរបស់ក្រុមអ្នកគាំទ្រនៅក្នុងគណបក្សអំណាចខ្មែរ ដែលពីមុនមកជាលោកគឺអ្នកដឹកនាំ។
សូមរំឭកថា លោក សួន សេរីរដ្ឋា ត្រូវបានតុលាការកាត់ទោសពាក់ព័ន្ធនឹងបទញុះញង់កុំឱ្យយោធិនស្ដាប់បង្គាប់ និងបទញុះញង់ឱ្យប្រព្រឹត្តបទឧក្រិដ្ឋ ជាអាទិ៍ តាមក្រមព្រហ្មទណ្ឌនោះ គឺ បន្ទាប់ពីលោកបានបញ្ចេញសរសេរតាមហ្វេសប៊ុកទាក់ទងនឹងការបញ្ជាកងទ័ព ឱ្យទៅត្រៀមប្រយុទ្ធនឹងកងទ័ពឡាវ។ ក្នុងគ្រាដែលលោកជាប់ពន្ធនាគារនោះហើយ ដែលគណបក្សអំណាចខ្មែររបស់លោកបានធ្លាក់ទៅលើដៃ លោក សួង សុភ័ណ្ឌ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ