RFA បដិសេធការចោទប្រកាន់ដែលថា លោក ជុន ច័ន្ទបុត្រ ជាចារកម្មរបស់រដ្ឋាភិបាលកម្ពុជា
វិទ្យុអាស៊ីសេរី បានចេញប្រកាសមួយនៅថ្ងៃនេះ ដោយអះអាងថា លោក ហួត វុទ្ធី ហៅ ជុន ច័ន្ទបុត្រ អនុប្រធានវិទ្យុអាស៊ីសេរីជាភាសាខ្មែរ មិនមែនជាចារកម្មរបស់លោកនាយករដ្ឋមន្រ្តី ហ៊ុន សែន នោះទេ។ ការបដិសេធជាផ្លូវការនេះ ធ្វើឡើងជាការឆ្លើយតបនឹងការចោទប្រកាន់របស់លោកនាយករដ្ឋមន្ដ្រី ហ៊ុន សែន និងបន្ទាប់ពីបណ្តាញផ្សព្វផ្សាយដែលស្និទនឹងរដ្ឋាភិបាលកម្ពុជា នៅតែបន្តចេញផ្សាយសំឡេងសន្ទនា រវាងលោក ជុន ច័ន្ទបុត្រ និងមេទ័ពម្នាក់នាពេលកន្លងទៅ។
ចុះផ្សាយនៅថ្ងៃ៖ កែប្រែថ្ងៃទី៖
តាមរយៈសេចក្តីប្រកាសព័ត៌មានរបស់ខ្លួន វិទ្យុអាស៊ីសេរី បានចាត់ទុកការចោទប្រកាន់របស់លោកនាយករដ្ឋមន្រ្តី ហ៊ុន សែន និងមន្ត្រីរបស់លោក មកលើ លោក ជុន ច័ន្ទបុត្រ ថាជាការចោទប្រកាន់ "ខ្វះភាពសុចរិត និងខ្វះសច្ចភាព"។
គួរជម្រាបថា នៅពេលសំណេះសំណាលជាមួយនិស្សិតនិងអ្នកគាំទ្រប្រហែល៨០០នាក់ ក្នុងទីក្រុងស៊ីដនី កាលពីថ្ងៃទី១៦ខែមីនា លោកនាយករដ្ឋមន្ត្រី ហ៊ុន សែន បានប្រកាសថា លោក ជុន ច័ន្ទបុត្រ ជាចារកម្មរបស់លោកយូរណាស់មកហើយ។ លោកប្រមុខរដ្ឋាភិបាលខ្មែរ បានអះអាងថា លោក ជុន ចាន់បុត្រ ដែលល្បីខាងវោហាស័ព្ទ ធ្លាប់បានពឹងពាក់ឲ្យឧត្តមសេនីយ៍ឯក ម៉ៅ សុផាន់ បញ្ជាការកងពលតូចលេខ៧០និងឧត្តមសេនីយ៍ឯក ហ៊ុន ម៉ាណែត កូនប្រុសច្បងរបស់លោកឲ្យជួយការពារជីវិតរបស់ខ្លួន ដើម្បីកុំឲ្យភ្នាក់ងារចារម្ម CIA អាមេរិក តាមសម្លាប់ដូច លោក កែម ឡី។
ប៉ុន្តែនៅក្នុងសេចក្ដីថ្លែងការណ៍របស់ខ្លួននាថ្ងៃអាទិត្យនេះ វិទ្យុអាស៊ីសេរី បានអះអាងថា អ្នកសារព័ត៌មាននៅអាស៊ីសេរី ក៏ដូចជានៅស្ថាប័នផ្សេងទៀតដែរ គឺសុទ្ធតែមានសេរីភាពពេញលេញក្នុងការនិយាយទាក់ទងជាមួយមន្ដ្រីណាក៏បាន។ និងថា លោក ហួត វុទ្ធី ហៅ ជុន ច័ន្ទបុត្រ បានជូនដំណឹងជាផ្លូវការទៅកាន់ថ្នាក់ដឹកនាំអាស៊ីសេរី អំពីជំនួបជាមួយមន្ដ្រីរបស់លោក ហ៊ុន សែន និងថែមទាំងបានកត់ត្រាទុកនូវកិច្ចសន្ទនាគ្នា ជាមួយលោក ហ៊ុន ម៉ាណែត និង លោក ម៉ៅ សុផាន់ នោះផងដែរ។ សម្រាប់អាស៊ីសេរី អនុប្រធានផ្នែកខេមរភាសារបស់ខ្លួនមិនបានរំលោភគោលការណ៍របស់ស្ថាប័នទេ។ តាមសេចក្តីប្រកាសដដែល។
សូមជម្រាបថា ប៉ុន្មានថ្ងៃកន្លងមកនេះ គេហទំព័រ Fresh News ដែលស្និទ្ធនឹងរដ្ឋាភិបាលនៅតែបន្តផ្សព្វផ្សាយខ្សែអាត់សំឡេងនៃការជួបសន្ទនា រវាង លោក ជុន ច័ន្ទបុត្រ និងលោកឧត្តមសេនីយឯក ម៉ៅ សុផាន់ មេបញ្ជាការកងពលលេខតូច៧០។ ក្នុងខ្សែអាត់សំឡេងនោះ គឺមាននិយាយពីបញ្ហាមួយចំនួនដូចជា ការសុំឲ្យជួយការពារសុវត្ថិភាពលោក ជុន ច័ន្ទបុត្រ ករណីបាញ់សម្លាប់ លោក កែម ឡី និងរឿងទាក់ទងនឹងគណបក្សប្រឆាំងជាដើម។
ប៉ុន្តែក្នុងសេចក្តីប្រកាសរបស់វិទ្យុអាស៊ីសេរី ក៏ដូចជាការបកស្រាយរបស់ លោក ជុន ច័ន្ទបុត្រ លោកទទួលស្គាល់ពីការសន្ទនានោះ តែថា សំឡេងនោះត្រូវបានគេកាត់ច្រឹបតែមួយផ្នែក ហើយកែនិងកាត់ត ជាការប៉ុនប៉ងរបស់អាជ្ញាធរដើម្បីបន្សាបសំឡេងឯករាជ្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ