ក្រសួងមហាផ្ទៃគ្រោងជួបបន្ទប់ស្ថានការណ៍នៅសប្ដាហ៍ក្រោយ
លោក ប៉ុល លឹម រដ្ឋលេខាធិការក្រសួងមហាផ្ទៃបានបង្ហើបប្រាប់វិទ្យុបារាំងនៅថ្ងៃនេះថា លោកមានគម្រោងជួបជាមួយបន្ទប់ស្ថានការណ៍ដែលជាបណ្ដុំអង្គការសង្គមស៊ីវិល២៤ស្ថាប័ន នៅសប្ដាហ៍ក្រោយ។ ជាជំនួបធ្វើឡើងបន្ទាប់ពីបន្ទប់ស្ថានការណ៍ស្នើសុំជួបលោក ស ខេង កាលពីថ្ងៃអង្គារ តែរដ្ឋមន្ត្រីក្រសួងមហាផ្ទៃ ចាត់ លោក ប៉ុល លឹម មកជួបជំនួស។
ចុះផ្សាយនៅថ្ងៃ៖
ស្តាប់ - ០១:៤១
លោក ប៉ុល លឹម បានគូសបញ្ជាក់ទៀតថា នៅពេលនេះក្រុមការងាររបស់លោកកំពុងរៀបចំឯកសារដើម្បីត្រៀមជួបជាមួយបន្ទប់ស្ថានការណ៍។ ចំណែកបន្ទប់ស្ថានការណ៍ក៏ដូចគ្នាដែរ។ លោក សម គន្ធាមី ប្រធានអង្គការនិចហ្វិក និងជាសមាជិកនៃបន្ទប់ស្ថានការណ៍បានប្រាប់វិទ្យុបារាំងថា បន្ទប់ស្ថានការណ៍រង់ចាំតែការឆ្លើយតបពីក្រសួងមហាផ្ទៃតែប៉ុណ្ណោះថា ជួប នៅថ្ងៃណា ម៉ោងណា ទីកន្លែងណា? ចំណុចនេះលោក ប៉ុល លឹម បញ្ជាក់ត្រឡប់ទៅវិញថា នឹងជូនដំណឹងតាមក្រោយ។
លោក ប៉ុល លឹម និងលោក សម គន្ធាមី បានអះអាងដូចគ្នាថា ជំនួបនៅថ្ងៃខាងមុខនោះ ក្រសួងមហាផ្ទៃនឹងស្ដាប់អំពីសកម្មភាពការងាររបស់បន្ទប់ស្ថានការណ៍នៅអំឡុងពេលបោះឆ្នោតជ្រើសរើសក្រុមប្រឹក្សាឃុំសង្កាត់។ ចំណែកឯបន្ទប់ស្ថានការណ៍ក៏បានត្រៀមខ្លួនបង្ហាញពីដំណើរការងាររបស់ខ្លួននាពេលកន្លងមកដែរ។ បន្ថែមពីលើនេះទៀតបន្ទប់ស្ថានការណ៍នឹងបង្ហាញពីសកម្មភាពការងាររបស់ខ្លួនចំពោះការបោះឆ្នោតនៅឆ្នាំក្រោយផងដែរ។
សូមបញ្ជាក់ថា ភាពចម្រូងចម្រាសរវាងបន្ទប់ស្ថានការណ៍ និងរដ្ឋាភិបាលកើតមានឡើងបន្ទាប់ពីលោកនាយករដ្ឋមន្ត្រី ហ៊ុន សែន បានចោទបណ្ដុំអង្គការមិនមែនរដ្ឋាភិបាលនេះថា បានរំលោភច្បាប់ស្ដីពីសមាគម និងអង្គការមិនមែនរដ្ឋាភិបាល។ ហើយបានចាត់ទុកថា ពួកគេគឺមូលដ្ឋាននៃបដិវត្តន៍ពណ៌។
ប្រតិកម្មរបស់លោកនាយករដ្ឋមន្ត្រី បន្ទាប់ពីបណ្ដុំអង្គការទាំងនេះបានរិះគន់ការបោះឆ្នោតនោះថា មិនទាន់មានភាពសេរី និងយុត្តិធម៌ពេញលេញតាមរយៈការគាបសង្កត់នយោបាយទៅលើគណបក្សប្រឆាំង និងការគំរាមប្រើហិង្សាពីថ្នាក់ដឹកនាំគណបក្សកាន់អំណាច ជាដើម។ នេះបើតាមបន្ទប់ស្ថានការណ៍។ បន្ទាប់មកលោកនាយករដ្ឋមន្ត្រី ហ៊ុន សែន បានបញ្ជាឲ្យលោក ស ខេង ពិនិត្យទៅលើភាពស្រប់ច្បាប់ចំពោះបណ្ដុំអង្គការទាំងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ