ស្ថាបនិកអង្គការមីន លោក អាគីរ៉ា ត្រូវបានដោះលែង តែអង្គការរបស់លោកនៅបន្តបិទទ្វារ
លោកអាគីរ៉ាឈ្មោះដើមអឿនយក្ស ជាស្ថាបនិកនៃអង្គការសារមន្ទីរគ្រាប់មីន រួមនឹងមនុស្ស២នាក់ផ្សេងទៀត ត្រូវបានតុលាការខេត្តសៀមរាបដោះលែងឲ្យនៅក្រៅឃុំបណ្ដោះអាសន្ន កាលពីថ្ងៃទី២០ខែកញ្ញា។ បើទោះជាលោកអាគីរ៉ាបាននៅក្រៅឃុំពិតមែន តែអង្គការសារមន្ទីរគ្រាប់មីន ស្ថិតក្នុងស្រុកបន្ទាយស្រី មិនទាន់បើកទ្វារឲ្យដំណើរការឡើងវិញនៅឡើយទេ គិតមកដល់ថ្ងៃសៅរ៍នេះ។
ចុះផ្សាយនៅថ្ងៃ៖
ស្តាប់ - ០១:៤០
បន្ទាប់ពីត្រូវបានដោះលែងឲ្យនៅក្រៅឃុំបណ្ដោះអាសន្ន លោកអាគីរ៉ា និង សមាជិក២នាក់ទៀតដែលជាអនុប្រធាន និងជាបុគ្គលិកអង្គការសារមន្ទីរគ្រាប់មីន បានត្រឡប់ទៅស្នាក់នៅផ្ទះរបស់ពួកគេរៀងៗខ្លួន។
បើទោះបីជាចេញមកនៅក្រៅឃុំហើយក៏ដោយ គេនៅមិនទាន់ដឹងទេថា អ្នកទាំងបី នឹងត្រូវស្ថិតនៅក្រោមការឃ្លាំមើលរបស់តុលាការ ឬក៏អត់ ខណៈដីកាបង្គាប់ឲ្យដោះលែងឲ្យនៅក្រៅឃុំបណ្ដោះអាសន្ន មិនត្រូវបានបង្ហាញឲ្យឃើញជាសាធារណៈនោះទេ។ នេះបើតាមការឲ្យដឹងពី លោក សួស ណារិន មន្ត្រីអង្គការអាដហុកប្រចាំខេត្តសៀមរាប ដែលបានថ្លែងប្រាប់វិទ្យុបារាំងអន្ដរជាតិនៅថ្ងៃសៅរ៍នេះ។
ជាការកត់សម្គាល់ រហូតមកទល់ថ្ងៃសៅរ៍នេះ ទីស្នាក់ការអង្គការសារមន្ទីរគ្រាប់មីន ស្ថិតក្នុងស្រុកបន្ទាយស្រី នៅតែបន្តបិទទ្វារ បើទោះបីជាស្ថាបនិកនៃអង្គការនេះ ត្រូវបានដោះលែងក៏ដោយ។ ទន្ទឹមនឹងការបិទទ្វារ សមត្ថកិច្ចក៏នៅតែបន្តឈរជើងយាមកាមយ៉ាងតឹងរ៉ឹងនៅទីនោះដដែល។ នេះបើតាម លោក សួស ណារិន។ អនាគតនៃអង្គការសារមន្ទីរគ្រាប់មីនរបស់លោក អាគីរ៉ា ថាតើនឹងបើកដំណើរការឡើងវិញឬអត់ ស្ថិតនៅក្នុងភាពស្រពេចស្រពិល ខណៈកុមារកំព្រា១៧នាក់ដែលពីមុនរស់នៅក្នុងបន្ទុកមើលថែរបស់ លោក អាគីរ៉ា ត្រូវបានបញ្ជូនទៅក្រសួងសង្គមកិច្ចដើម្បីមើលថែបណ្ដោះអាសន្ន។
សូមជម្រាបជូនថា លោក អាគីរ៉ា និងបុគ្គលិករួមការងាររបស់លោក ត្រូវចាប់ខ្លួននៅថ្ងៃទី២៨ខែសីហា ក្រោមបទចោទលាក់ទុកអាវុធខុសច្បាប់។ ក្រៅពីជាស្ថាបនិកសារមន្ទីរមីនក្នុងខេត្តសៀមរាប លោកអាគីរ៉ា មានកេរ្តិ៍ឈ្មោះល្បីសុះសាយទាំងនៅក្នុងនិងក្រៅប្រទេស ដោយសារលោកត្រូវបានទូរទស្សន៍ CNN ផ្ដល់ងារជា «វីរបុរស CNN ឬ CNN Heroes» កាលពីឆ្នាំ២០១០កន្លងទៅ តាមរយៈសកម្មភាពបោសសំអាតមីនដោយស្ម័គ្រចិត្តរបស់លោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ