បក្សប្រជាធិបតេយ្យមូលដ្ឋានអំពាវនាវឲ្យអាជ្ញាធរប្ដូរការឃុំខ្លួន លោក កឹម សុខា ពីពន្ធនាគារមកឃុំនៅផ្ទះ
គណបក្សប្រជាធិបតេយ្យមូលដ្ឋាន នៅថ្ងៃសុក្រម្សិលមិញ បានអំពាវនាវឲ្យអាជ្ញាធរដោះលែងលោក កឹម សុខា និងអ្នកទោសមនសិការឬសកម្មជនដីធ្លីផ្សេងទៀត។ សម្រាប់លោក កឹម សុខា គណបក្សប្រជាធិបតេយ្យមូលដ្ឋាន ចង់ឲ្យអាជ្ញាធរ ប្ដូរការឃុំខ្លួនពីពន្ធនាគារ មកជាការឃុំខ្លួននៅក្នុងផ្ទះវិញ។ ការអំពាវនាវដូច្នេះ ធ្វើឡើងក្នុងឱកាសដែលកម្ពុជាប្រារព្ធព្រះរាជពិធីបុណ្យចម្រើនព្រះជន្មព្រះមហាក្សត្រ នៅថ្ងៃទី១៣ ដល់ថ្ងៃទី១៥ ខែឧសភានេះ។
ចុះផ្សាយនៅថ្ងៃ៖
ស្តាប់ - ០២:១៨
ឆ្លៀតក្នុងឱកាសនៃព្រះរាជពិធីបុណ្យចម្រើនព្រះជន្មព្រះមហាក្សត្រ គណបក្សប្រជាធិបតេយ្យមូលដ្ឋានបានស្នើសុំយ៉ាងទទូចដល់រាជរដ្ឋាភិបាលកម្ពុជា អនុញ្ញាតឲ្យ លោក កឹម សុខា អាចស្ថិតនៅក្រៅឃុំ ឬបើមិនដូច្នោះទេ អាចផ្លាស់មកឃុំឃាំងក្នុងគេហដ្ឋានវិញ ដោយស្ថិតក្រោមការត្រួតពិនិត្យរបស់តុលាការ។ បើតាមគណបក្សប្រជាធិបតេយ្យមូលដ្ឋាន សំណើនេះ ធ្វើឡើងដោយផ្អែកលើមូលហេតុមនុស្សធម៌ និងដើម្បីបង្ករបរិយាកាសនយោបាយឲ្យបានប្រសើរឡើងមុនការបោះឆ្នោតមកដល់។ លើសពីនេះទៀត គណបក្សដែលប្រកាសចូលរួមការបោះឆ្នោតនៅពេលខាងមុខដែរនេះ ក៏ស្នើឲ្យរដ្ឋាភិបាលលើកលែងទោស ឬដោះលែងអ្នកទោសមនសិការ ឬសកម្មជនដីធ្លីមួយចំនួនទៀតឲ្យនៅក្រៅឃុំផងដែរ។
ក៏ប៉ុន្តែអ្នកនាំពាក្យក្រសួងយុត្តិធម៌ លោក គឹម សន្តិភាព បានបញ្ជាក់ប្រាប់វិទ្យុបារាំងអន្ដរជាតិថា ការស្នើសុំលើកលែងទោស ឬបន្ថូរបន្ថយទោសដល់ទណ្ឌិត អាចធ្វើឡើងតែក្នុងឱកាសបុណ្យចូលឆ្នាំខ្មែរ បុណ្យវិសាខបូជា និងបុណ្យអុំទូកតែប៉ុណ្ណ៉ោះ ពោលគឺមិនមានទេ ក្នុងឱកាសព្រះរាជពិធីបុណ្យចម្រើនព្រះជន្មព្រះមហាក្សត្រនៅពេលនេះ។
ការស្នើលើកលែងទោស ឬដោះលែងឲ្យនៅក្រៅឃុំ ដល់អ្នកទោសមនសិកា ឬសកម្មជនដីធ្លីមួយចំនួនទៀត ត្រូវបានអ្នកនាំពាក្យក្រសួងយុត្តិធម៌បានបញ្ជាក់ថា កំពុងតែស្ថិតក្នុងនីតិវិធីរបស់តុលាការ។ ចំណែកសំណើចំពោះករណីលោក កឹម សុខា វិញ លោក គឹម សន្តិភាព ពន្យល់ថា ច្បាប់ខ្មែរមិនមានចែងពីការឃុំខ្លួននៅក្នុងផ្ទះដូចដែលគណបក្សប្រជាធិបតេយ្យមូលដ្ឋានស្នើឡើយ។
សូមបញ្ជាក់ថា លោក កឹម សុខា បានជាប់ឃុំក្នុងពន្ធនាគារត្រពាំងផ្លុងជាប់ព្រំដែនវៀតណាម អស់រយៈពេលជាង៨ខែមកហើយ ក្រោមអ្វីដែលរដ្ឋាភិបាលកម្ពុជាចោទថា «ក្បត់ជាតិ»។ ចំណែក សកម្មជនដីធ្លីតំបន់ បឹងកក់ អ្នកស្រី ទេព វន្នី ត្រូវបានតុលាការកាត់ទោសដាក់ពន្ធនាគារ២ឆ្នាំកន្លះពីបទប្រើអំពើហិង្សាលើសន្តិសុខ ២នាក់នៅជិតផ្ទះលោកនាយករដ្ឋមន្ត្រីហ៊ុន សែន ខណៈមានតវ៉ារឿងដីធ្លីកាលពីឆ្នាំ២០១៣។ រីឯសកម្មជនអតីតគណបក្សសង្រ្គោះជាតិជាង១០រូបទៀតក៏ត្រូវបានតុលាការកាត់ទោសចន្លោះពី៧ដល់២០ឆ្នាំ ដោយចោទពីបទកុប្បកម្ម បន្ទាប់ពីមានការតវ៉ារំដោះទីលានប្រជាធិបតេយ្យកាលពីឆ្នាំ២០១៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ