មេធាវីអតីតអ្នកកាសែតអាស៊ីសេរីប្តឹងសាទុក្ខទៅកំពូល ជំទាស់សាលដីកាឧទ្ធរណ៍
បណ្ដឹងស្នើឲ្យដោះលែងអតីតអ្នកកាសែតវិទ្យុអាស៊ីសេរីពីរនាក់ បានវិវត្តមកដល់ជុំទី២ហើយ ក្រោយការស្នើសុំលើកទី១មិនបានសម្រេច។ ការវិវត្តនេះ បន្ទាប់ពីមេធាវីការពារក្ដីអ្នកទាំងពីរបានដាក់ពាក្យប្ដឹងសាទុក្ខមកកាន់តុលាការកំពូលកាលពីថ្ងៃទី២៥មេសា ជំទាស់នឹងសាលដីកាសាលាឧទ្ធរណ៍។ ជាសាលដីកាមិនអនុញ្ញាត្តឲ្យអតីតអ្នកកាសែតទាំងពីរបាននៅក្រៅឃុំបណ្ដោះអាសន្ន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
លោក កែវ វន្នី មេធាវីការពារក្ដីអតីតអ្នកកាសែតវិទ្យុអាស៊ីសេរីទាំងពីរថ្លែងប្រាប់វិទ្យុបារាំងអន្តរជាតិនៅថ្ងៃសុក្រនេះ ដោយមានក្ដីរំពឹងថា តុលាការកំពូលនឹងពិចារណា ដោះលែងកូនក្ដីរបស់លោកឲ្យមានសេរីភាពឡើងវិញ តាមរយៈពាក្យបណ្ដឹងសារទុក្ខនៅជុំទី២នេះ។ ប៉ុន្តែយ៉ាងណាក៏ដោយ បើទោះបីជាតុលាការកំពូលសម្រេចដូចគ្នាទៅនឹងសាលាឧទ្ធរណ៍នោះ លោកមេធាវីនឹងប្ដឹងសារទុក្ខជុំទី៣បន្តទៀត ដោយផ្ដើមចេញពីសាលាដំបូងរាជធានីភ្នំពេញ។ តែបើតាមហេតុផលរបស់សាលាឧទ្ធរណ៍មូលហេតុដែលបន្តឃុំខ្លួនអតីតអ្នកកាសែតទាំងពីរ លោកយាង សុធារិន(យាង សុជាមេត្តា) និងលោកអ៊ួន ឈិន ព្រោះបារម្ភខ្លាចពួកគេរត់ចេញទៅក្រៅប្រទេសដែលនឹងធ្វើឲ្យប៉ះពាល់ដល់នីតិវិធីរបស់តុលាការ។ នេះបើតាមសេចក្ដីសម្រេចរបស់ក្រុមប្រឹក្សាជំនុំជម្រះសាលាឧទ្ទរណ៍កាលពីថ្ងៃទី១៩មេសា។
សូមបញ្ជាក់ថា សំណុំរឿងប្ដឹងសាទុក្ខនៅជុំទី២នេះស្ថិតនៅក្នុងបទចោទប្រកាន់ចាស់ស្ដីពី«ការប្រគល់ឲ្យរដ្ឋបរទេសនូវព័ត៌មានជាអាទិ៍ដែលអាចធ្វើឲ្យអន្តរាយការការពារជាតិ» ស្របតាមមាត្រា ៤៤៥ នៃក្រមព្រហ្មទណ្ឌរបស់កម្ពុជា ដែលអាចជាប់ពន្ធនាគារ ពី ៧ ទៅ ១៥ឆ្នាំ។ ដោយឡែកទាក់ទងសំណុំរឿងថ្មីពាក់ព័ន្ធនឹងការផលិតវីដេអូអាសអាភាសត្រូវបានលោកមេធាវី កែវ វន្នី គូសបញ្ជាក់ថាកំពុងស្ថិតនៅក្នុងដៃចៅក្រមស៊ើបសួរ។ តែសំណុំរឿងនេះ ចៅក្រមស៊ើបសួរមិនទាន់បានហៅពួកគេមកសួរនាំនៅឡើយទេ។
គូររម្លឹកឡើងវិញថា កាលពីពាក់កណ្ដាលវិច្ឆិកា ឆ្នាំ ២០១៧ អ្នកទាំង ២ ត្រូវបានអាជ្ញាធរខ័ណ្ឌមានជ័យ ចូលទៅចាប់ខ្លួន និងរឹបអូសសម្ភារៈប្រើប្រាស់ទាំងអស់នៅក្នុងបន្ទប់ណ្ឋាគារមួយ ក្រុងភ្នំពេញ។ គិតមកដល់ពេលនេះ គឺមានរយៈពេលជិត៦ខែហើយ ដែលអ្នកទាំង២ ត្រូវបានជាប់ឃុំក្នុងពន្ធនាគារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ