មន្ដ្រីជំនាញនឹងចុះទៅមើលបង្គោលព្រំដែន បន្ទាប់ពីរដ្ឋមន្ត្រីការពារជាតិលើកឡើងពីភាពមិនប្រក្រតី
ពីខេត្តបន្ទាយមានជ័យ រដ្ឋមន្ត្រីក្រសួងការពារជាតិ លោកទៀ បាញ់ បានលើកឡើងថា បង្គោលនិងចំណុចព្រំដែនមួយចំនួនរវាងកម្ពុជា ថៃ វៀតណាម និងឡាវ នៅតែមានភាពមិនប្រក្រតី។ លោករដ្ឋមន្ដ្រីសង្កេតឃើញដូច្នេះ ក្នុងអំឡុងពេលលោកចុះសួរសុខទុក្ខកងកម្លាំងការពារព្រំដែន នៅថ្ងៃទី៨មីនាម្សិលមិញ។ ឆ្លើយតបនឹងការលើកឡើងរបស់លោករដ្ឋមន្ដ្រី ទៀ បាញ់ នេះ គណៈកម្មាធិការកិច្ចព្រំដែនអះអាងប្រាប់វិទ្យុបារាំងអន្ដរជាតិថា ខ្លួននឹងចុះទៅត្រួតពិនិត្យបន្ថែមដើម្បីបំពេញចន្លោះខ្វះខាត។
ចុះផ្សាយនៅថ្ងៃ៖
ភាពមិនប្រក្រតីនៃបង្គោលព្រំដែនដែលរដ្ឋមន្ដ្រីការពារជាតិសង្កេតឃើញ គឺស្ថិតនៅចំណុចច្រកជាំ ស្រុកអន្លង់វែង ខេត្តឧត្តរមានជ័យ រហូតដល់ច្រកចាំយាមខេត្តកោះកុង ដែលមានប្រវែង៨០៣គីឡូម៉ែត្រ និងមានបង្គោលសរុប៧៣បង្គោល។ នេះសម្រាប់ព្រំដែនជាមួយប្រទេសថៃ។ ក្រៅពីនេះ លោក ទៀ បាញ់ បញ្ជាក់បន្ថែមថា បង្គោលព្រំដែនមួយចំនួននៅចំណុចព្រំដែនជាមួយវៀតណាមនិងឡាវ ក៏មានភាពមិនប្រក្រតីដូចគ្នាដែរ។
បើតាមរដ្ឋមន្ត្រីក្រសួងការពារ បង្គោលខ្លះទ្រេត បង្គោលខ្លះគ្មានគ្រឹះ បង្គោលខ្លះត្រូវបានរំកិល និងបង្គោលខ្លះដាំបញ្ច្រាសជាដើម។ ជុំវិញភាពមិនប្រក្រតីនៃបង្គោលនិងព្រំដែននេះ លោក ទៀ បាញ់ អំពាវនាវឲ្យភាគីនៃប្រទេសទាំងសងខាងចរចាជាមួយគ្នាដោយសន្តិវិធី ពោលគឺមិនត្រូវបង្កើតជម្លោះ ឬ បង្កភាពតានតឹងដាក់គ្នានៅតាមព្រំដែនឡើយ ខណៈដែលយន្តការចរចាដោះស្រាយបញ្ហាព្រំដែននាពេលបច្ចុប្បន្ន មានភាពសកម្មនិងជឿនលឿនទៅមុខច្រើន។ នេះបើតាមលោក ទៀ បាញ់។
លោកស្រី កុយ ពិសី អនុប្រធានគណៈកម្មាធិការទទួលបន្ទុកកិច្ចការព្រំដែន បានគូសបញ្ជាក់ប្រាប់វិទ្យុបារាំងអន្ដរជាតិ នៅថ្ងៃសៅរ៍នេះថា អនុគណៈកម្មាធិការទទួលបន្ទុកកិច្ចការព្រំដែននៃខេត្តជាប់ព្រំដែនប្រទេសថៃ ឡាវ វៀតណាម នឹងចុះទៅជួសជុលនិងកែលម្អនូវបង្គោលណាដែលមានសភាពចាស់ទ្រុឌទ្រោមឬទ្រេត។ ភាពមិនប្រក្រតីនៃបង្គោលព្រំដែននេះ ដោយសារតែបង្គោលខ្លះត្រូវបានបោះយូរមកហើយដោយគិតមកដល់ពេលបច្ចុប្បន្នមានអាយុកាលជាង១០០ឆ្នាំមកហើយ។ ប៉ុន្តែយ៉ាងណាមិញ ប្រសិនបើបង្គោលព្រំដែនមួយចំនួនមានបញ្ហាខ្លាំង ភាគីកម្ពុជាមិនអាចដោះស្រាយដោយឯកតោភាគីឡើយ។ នេះបើតាមលោកស្រី កុយ ពិសី។
គួរជម្រាបជូនថា ដំណើការបោះបង្គោលព្រំដែនរវាងកម្ពុជានិងឡាវសម្រេចបាន៨៦ភាគរយ វៀតណាម៨៤ភាគរយ ខណៈថៃ៧៣ភាគរយ។ បច្ចុប្បន្នដំណើរការចរចាព្រំដែនរវាងកម្ពុជាឡាវនិងវៀតណាម ស្ថិតនៅក្នុងដំណាក់កាលគូរផែនទីផ្ទេរពី១០០ពាន់មក៥០ពាន់ដើម្បីជាមូលដ្ឋាននៅក្នុងដំណើកការបោះបង្គោលព្រំដែនបន្ត។ ក្នុងនោះដំណើការគូរផែនទីរវាងកម្ពុជានិងឡាវនេះ នាយករដ្ឋមន្ត្រីនៃប្រទេសទាំងពីរ បានព្រមព្រៀងគ្នារៀបចំបែបបទបច្ចេកទេសស្នើទៅកាន់ប្រទេសបារាំង ដើម្បីឲ្យជួយដោះស្រាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ