ក្រុមអ្នកគាំទ្រអតីតបក្សប្រឆាំង ធ្វើបាតុកម្មសុំឲ្យជប៉ុនឈប់ផ្តល់ជំនួយដល់ការបោះឆ្នោតនៅកម្ពុជា
ដូចការគ្រោងទុក ក្រុមអ្នកគាំទ្រអតីតគណបក្សសង្រ្គោះជាតិ បានធ្វើបាតុកម្មមួយ នៅមុខស្ថានទូតជប៉ុនប្រចាំអង្គការសហប្រជាជាតិ ក្នុងទីក្រុងញូយ៉ក នៅថ្ងៃទី១ខែមិថុនាម្សិលមិញ ដើម្បីស្នើសុំឲ្យ ប្រទេសជប៉ុនដកខ្លួនថយ និងបញ្ឈប់ការផ្តល់ជំនួយ សម្រាប់ការបោះឆ្នោតនៅកម្ពុជា។ ប៉ុន្តែរដ្ឋាភិបាលកម្ពុជាអះអាងថា ការធ្វើបាតុកម្មនោះ វាគ្មានឥទ្ធិពលអ្វីឡើយទៅលើការសម្រេចរបស់រដ្ឋាភិបាលជប៉ុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
ក្នុងចំណោមបាតុករជាច្រើននាក់ដែលជាពលរដ្ឋខ្មែរនៅក្រៅប្រទេសនោះ ក៏មានដែរ អតីតតំណាងរាស្ត្រគណបក្សសង្រ្គោះជាតិ លោក ញ៉យ ចំរើន និងលោក រៀល ខេមរិន្ទ ព្រមទាំង លោកហ៊ីង សុខសាន្ត ប្រធានយុវជនអតីតគណបក្សសង្រ្គោះជាតិ និងកញ្ញា កឹម សម្មាធិតា កូនស្រីពៅ លោក កឹម សុខា។
កញ្ញា កឹម សម្មាធិតា បានថ្លែងជាភាសាអង់គ្លេស មានខ្លឹមសារថា៖ «ពួកយើងឈរនៅទីនេះ គឺជំរុញឲ្យប្រទេសជប៉ុនដកជំនួយនិងការគាំទ្រដល់ការបោះឆ្នោតនៅកម្ពុជានាពេលខាងមុខ»។ កញ្ញា កឹម សម្មាធិតា ស្នើដូច្នេះ ដោយសារកញ្ញាយល់ឃើញថា ការបោះឆ្នោតពេលខាងមុខដែលគ្មានវត្តមានគណបក្សប្រឆាំងធំជាងគេ គឺជាការបោះឆ្នោតក្លែងក្លាយ។
ប៉ុន្តែលោក សុខ ឥសាន អ្នកនាំពាក្យគណបក្សប្រជាជនកម្ពុជា បានចាត់ទុកការធ្វើបាតុកម្មនេះថាជារឿងអស់សំណើច។ មិនត្រឹមតែអស់សំណើចទេ លោក សុខ ឥសាន អះអាងថា បាតុកម្មនេះគ្មានឥទ្ធិពលអ្វីទៅលើការសម្រេចរបស់ប្រទេសជប៉ុន ក្នុងការគាំទ្រការបោះឆ្នោតនៅកម្ពុជាឡើយ។
ប៉ុន្តែយ៉ាងណាក៏ដោយ បាតុកម្មរបស់អ្នកគាំទ្រអតីតបក្សប្រឆាំងក្នុងលំនាំដូចគ្នានេះ នឹងនៅតែរៀបចំធ្វើជាបន្តបន្ទាប់ទៀត។ បើតាម លោក អេង ឆៃអ៊ាង អនុប្រធានអតីតគណបក្សសង្រ្គោះជាតិ ការធ្វើបាតុកម្មនេះមិនមែនមានតែនៅមុខស្ថានទូតជប៉ុនប្រចាំអង្គការសហប្រជាជាតិតែមួយនោះទេ គឺនឹងមានធ្វើជាបន្តបន្ទាប់ទៀត នៅសហរដ្ឋអាមេរិក ដោយមានការគាំទ្រពីពលរដ្ឋខ្មែរ ទាំងនៅកាណាដា អូស្រ្តាលី និង នៅអ៊ឺរ៉ុប ជាដើម។
អ្នកគាំទ្រគណបក្សប្រឆាំងនៅក្រៅប្រទេសប្រកាសថា ពួកគេក៏នឹងធ្វើបាតុកម្មម្តងទៀតនៅពាក់កណ្តាលខែនេះ ដើម្បីអំពាវនាវកុំឲ្យសហគមន៍អន្តរជាតិទទួលស្គាល់ការបោះឆ្នោតនៅកម្ពុជា។
សូមបញ្ជាក់ថា មកដល់ពេលនេះប្រទេសជប៉ុនមិនបានផ្តាច់ជំនួយមកកម្ពុជា ទាំងជំនួយអភិវឌ្ឍ និងជំនួយសម្រាប់ការបោះឆ្នោត បើទោះបីជាសហភាពអឺរ៉ុប និងសហរដ្ឋអាមេរិក បានផ្តាច់ជំនួយដល់ គ.ជ.បរបស់កម្ពុជា តាំងពីមានការរំលាយគណបក្សសង្រ្គោះជាតិឆ្នាំមុនក៏ដោយ។ ប៉ុន្តែជាជំហរចុងក្រោយ ប្រទេសជប៉ុនបានប្រាប់មន្រ្តីរដ្ឋាភិបាលកម្ពុជាម្តងហើយម្តងទៀតថា ក្នុងនាមជាដៃគូ ជប៉ុនចង់ឃើញការបោះឆ្នោតនៅកម្ពុជាឆ្លុះបញ្ចាំងពីឆន្ទៈពិតរបស់ពលរដ្ឋខ្មែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ