៥ឆ្នាំនៃការអនុវត្តគម្រោងបណ្ណាល័យក្នុងពន្ធនាគារ អ្នកជាប់ឃុំនិយមអានសៀវភៅប្រឡោមលោក
ទឹកប្រាក់ជាងកន្លះលានដុល្លារ(៥៥ ០០០០ដុល្លារ) ត្រៀមអនុវត្តគម្រោងបណ្ណាល័យនៅក្នុងពន្ធនាគារទូទាំងប្រទេសក្នុងដំណាក់កាលទី៣ ដែលជាដំណាក់កាលបញ្ចប់សម្រាប់រយៈពេលបីឆ្នាំពីឆ្នាំ២០១៩ដល់២០២២។ តាមអ្នកជំនាញមកពីអង្គការស៊ីប៉ាលើកបង្ហាញនៅថ្ងៃសុក្រនេះថា ៥ឆ្នាំនៃការអនុវត្តគម្រោងបណ្ណាល័យក្នុងពន្ធនាគារអ្នកជាប់ឃុំនិយមអានសៀវភៅប្រឡោមលោកច្រើនជាងគេ ខណៈសៀវភៅប្រភេទនេះការតែងនិពន្ធបានថយចុះ។
ចុះផ្សាយនៅថ្ងៃ៖
ក្នុងក្របខណ្ឌទូទាំងប្រទេសចំនួនអ្នកជាប់ឃុំ២ម៉ឺន៥ពាន់នាក់គឺមួយខែពួកគេចូលអានសៀវភៅ៧០០០ដងក្នុងបបណ្ណាល័យ ខណៈអ្នកជាប់ឃុំ៨០០០នាក់បានខ្ចីសៀវភៅប្រមាណជាង១ម៉ឺនក្បាលយកទៅអានក្នុងបន្ទប់។ ក្នុងនោះសៀវភៅប្រឡោមលោកនាំមុខសម្រាប់អ្នកជាប់ឃុំនិយមអាន និងតាមក្រោយដោយសៀវភៅទស្សនៈវិជ្ជា និងចិត្តវិទ្យា និងចុងក្រោយអ្នកជាប់ឃុំ១៥ភាគរយអានសៀវភៅប្រវត្តិសាស្ត្រ។ នេះបើតាមអង្គការស៊ីប៉ា។ សម្រាប់អង្គការស៊ីប៉ា ការនិយមអានសៀវភៅប្រឡោមលោកពីសំណាក់អ្នកជាប់ឃុំ ស្របពេលដែលការតែងនិពន្ធសៀវភៅប្រឡោមលោកនាពេលបច្ចុប្បន្នបានថយចុះ តែជំនួសមកវិញដោយភាពសំបូរបែបនៃប្រភេទសៀវភៅបែបអប់រំគំនិត។
សូមបញ្ជាក់ថា ចាប់តាំងពីអនុវត្តគម្រោងបណ្ណាល័យនៅក្នុងពន្ធនាគារទូទាំងប្រទេសគឺសៀវភៅ១០ម៉ឺនច្បាប់ដែលមានជាង២ពាន់ចំណងជើងដែលផ្ដល់ដោយភាគីពាក់ព័ន្ធគឺបានផ្ដល់បន្តទៅកាន់បណ្ណាល័យចំនួន២៦នៅក្នុងពន្ធធនាគារទូទាំងប្រទេស។
តាមរយៈការដាក់ឲ្យដំណើរការគម្រោងបណ្ណាល័យក្នុងពន្ធនាគារទូទាំងប្រទេសកន្លងមកនិងការត្រៀមអនុវត្តបន្តកម្មវិធីមុនសមាហរណកម្មជនជាប់ឃុំទៅក្នុងសង្គមវិញ ភាគីពាក់ព័ន្ធដែលរួមមានអង្គការស៊ីប៉ា អគ្គនាយកដ្ឋានពន្ធនាគារជាដើមបានកត់សម្គាល់ដូចគ្នាគម្រោងនេះ ផ្ដល់ប្រយោជន៍ច្រើនមែនទែនដល់អ្នកជាប់ឃុំ។ ជាក់ស្ដែងគឺអ្នកជាប់ឃុំ ទទួលបានចំណេះដឹងតាមរយៈការអានសៀវភៅបានច្រើន ហើយសម្មភាពនៃការអានក៏បានរួមចំណែកកាត់បន្ថយភាពចង្អៀតណែនក្នុងពន្ធនាគារ។ ម្យ៉ាងទៀតកាត់បន្ថយភាពស្មុគស្មាញ និងកាត់បន្ថយការគិតដែលចង់រត់គេចខ្លួនចេញពីពន្ធនាគារជាដើម។ នេះបើតាមលោក ព្រុំ ចាន់នី ប្រធាននាយកដ្ឋានអប់រំកែប្រែនិងស្ដារនីតិសម្បទានៃអគ្គនាយកដ្ឋានពន្ធនាគារ។
ប៉ុន្តែយ៉ាងណាក៏ដោយភាគីពាក់ព័ន្ធបានមូលមាត់គ្នាថា ភាពជោគជ័យនៃការដាក់ឲ្យដំណើរការគម្រោងបណ្ណាល័យក្នុងពន្ធនាគារមិនអាចកាត់ផ្ដាច់បានឡើយពីភាពចាំបាច់នៃថ្នាក់អក្ខរាកម្ម។ បច្ចុប្បន្នថ្នាក់អក្ខរាកម្មមាន៣៩កន្លែងនៅក្នុងពន្ធនាគារទូទាំងប្រទេស ខណៈដែលថ្នាក់អក្ខរាកម្មនេះកំពុងប្រឈមនឹងកង្វះគ្រូ។ គោលបំណងនៃការបង្កើតថ្នាក់អក្ខរាកម្មគឺដើម្បីបង្រៀនអ្នកជាប់ឃុំដែលមិនចេះអក្សរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ