អង់គ្លេស បង្ហាញផែនការកម្រាសជិត១០០ទំព័រ ស្តីពីការចាកចេញពីសហភាពអឺរ៉ុប
ពីរឆ្នាំក្រោយពីពលរដ្ឋអង់គ្លេសបោះឆ្នោតប្រជាមតិចាកចេញពីសហភាពអឺរ៉ុប, នៅថ្ងៃទី១២កក្កដានេះ រដ្ឋាភិបាលអង់គ្លេស បានសម្រេចដាក់បង្ហាញចេញផែនការលម្អិតជាលើកដំបូង ស្តីពីទំនាក់ទំនងអង់គ្លេសនិងសហភាពអឺរ៉ុប។ ថ្នាក់ដឹកនាំរដ្ឋាភិបាលអង់គ្លេស បានឡើងការពារគម្រោងដែលគេហៅថា សៀវភៅស នៅក្នុងសភា ហើយការជជែកពិភាក្សាគ្នា គឺធ្វើឡើងយ៉ាងតឹងសរសៃក មុននឹងសម្រេចអនុវត្តនៅទីបំផុត។
ចុះផ្សាយនៅថ្ងៃ៖
ស្តាប់ - ០២:៣៦
បរិយាកាសមុននឹងសម្រេចអនុម័តគម្រោងរបស់សៀវភៅស គឺពោរពេញដោយភាពអឺងកង។ មុននឹងនាយករដ្ឋមន្ត្រីឡើងនិយាយបង្ហាញគម្រោងការ, អ្នកតំណាងរាស្ត្រអង់គ្លេសរអ៊ូទ្រហឹងពេញសភា ដោយសារមិនបានទទួលគម្រោងសេចក្តីព្រាងជាមុន។ សមាជិកសភាខ្លះ បានសុំពេលសម្រាក៥នាទី ដើម្បីពន្យារពេល និងឲ្យក្រុមការងារចែកសំណៅឯកសារ ឲ្យបានដល់គ្រប់ដៃអ្នកតំណាងរាស្ត្រ។ ទីបំផុតទៅ គេបានចែកដល់ដៃសមាជិកសភា ហើយអ្នកមួយចំនួន ក៏បានទទួលដោយការបោះពីចម្ងាយខ្លះផង។
គម្រោងការនេះ គឺគេប្រសិទ្ធនាមឲ្យថា សៀវភៅស ដែលមានកម្រាស៩៨ទំព័រ ចែងលម្អិតពីទំនាក់ទំនងអង់គ្លេស និងសហភាពអឺរ៉ុប ទៅថ្ងៃខាងមុខ។ បើគេពិនិត្យខ្លឹមសារត្រួសៗ គឺមានចែងស្តីពីការចរាចរណ៍ទំនិញ ដែលអង់គ្លេសចង់បាន កិច្ចព្រមព្រៀងថ្មីមួយជាមួយសហភាពអឺរ៉ុប ចំពោះការផ្តោះប្តូរទំនិញដោយសេរី។ ក៏មានចែងដែរ ពីការធ្វើដំណើររបស់ភ្ញៀវទេសចរ យុវជនអឺរ៉ុប និងអ្នកជំនួញ ដោយមិនចាំបាច់មានទិដ្ឋាការ ទៅកាន់អង់គ្លេស ដោយគ្រាន់តែមានការត្រួតពិនិត្យ មិនធូររលូងដូចពីមុន។ អ្នកធ្វើការងារដែលជាប្រជាជនសហភាពអឺរ៉ុប នៅតែមានសិទ្ធិចូលទៅធ្វើការនៅអង់គ្លេសដដែល។ ចំណែកឯ ចៅក្រមអឺរ៉ុប នឹងត្រូវអញ្ជើញឲ្យចូលរួមក្នុងគណៈកម្មាធិការអង់គ្លេស-សហភាពអឺរ៉ុប ជាដើម។
គម្រោងផែនការនេះរងការទិតៀនជាខ្លាំង។ អ្នកតំណាងរាស្ត្រមកពីបក្សអភិរក្សនិយម លោគ Jacob Rees- Mogg ដែលចង់ឃើញអង់គ្លេសលះលែងដាច់ស្រឡះតែម្តងពីសហភាពអឺរ៉ុប បានរះគន់គម្រោងនេះ ថាមានតែឈ្មោះប៉ុណ្ណោះ។ ហើយលោកសង្កត់ធ្ងន់ថា នេះគឺពុំមែនជាអ្វីដែលពលរដ្ឋអង់គ្លេសបោះឆ្នោតចង់បាននោះទេ។
ចំណែកប្រធានាធិបតីអាមេរិកក៏បានចោទសួរខ្លួនឯងខ្លះដែរពីគម្រោងនេះ។ ពីក្រុងព្រុចសែល លោកដូណាល់ ត្រាំ បានថ្លែងមុននឹងដាក់ជើងជាន់ដីអង់គ្លេសថា «ខ្ញុំមិនដឹងទេថា គម្រោងនេះស្របទៅតាមអ្វីដែលពលរដ្ឋអង់គ្លេសបោះឆ្នោះចង់ចាកចេញពីសហភាពអឺរ៉ុប។ អង់គ្លេសបោះឆ្នោតគឺចង់ផ្តាច់ទំនាក់ទំនងពីសហភាពអឺរ៉ុប។»
ក៏ប៉ុន្តែ លោកស្រីនាយករដ្ឋមន្ត្រី Theresa May បានអះអាងការពារថា «គម្រោងនេះ ពិតជាឆ្លើយតបទៅតាមប្រជាមតិរបស់ពលរដ្ឋអង់គ្លេស ដែលបោះឆ្នោតចាកចេញពីសហភាពអឺរ៉ុប កាលពីខែមិថុនា២០១៦។»
គួរជម្រាបដែរថា ដោយសារតែគម្រោងដ៏ស្មុគស្មាញនិងដ៏ចម្រូងចម្រាសនេះ រដ្ឋមន្ត្រីពីររូប បានលាលែងចេញពីតំណែងនាពេលថ្មីៗនេះ។ នោះគឺលោក David Davis រដ្ឋមន្ត្រីទទួលបន្ទុកចរចារឿង Brexit នេះ ហើយម្នាក់ទៀត គឺប្រមុខការទូត លោក Boris Johnson ដែលលោកទាំងពីរនេះ មាននិន្នាការចង់ឲ្យអង់គ្លេសលះលែងដាច់ស្រឡះតែម្តងពីសហភាពអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ