ប៉ូលិសបង់ក្លាដែសប្រកាសសម្លាប់បានមេក្លោងជីហាតដែលសម្លាប់ចំណាប់ខ្មាំងបរទេសកាលពីខែកក្កដា
ថ្ងៃសៅរ៍២៧សីហានេះ ប៉ូលិសបង់ក្លាដែសបានប្រកាសថា បានបើកប្រតិបត្តិការនៅជីតក្រុងដាកា ហើយបានសម្លាប់បានមេក្លោងនៃការវាយប្រហារហាងកាហ្វេទីក្រុងដាកា ដែលបានសម្លាប់មនុស្ស២២នាក់ កាលពីខែកក្កដា។ សកម្មជនជីហាត២នាក់ទៀតក៏ត្រូវបានប៉ូលិសសម្លាប់ដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១០
គួររំលឹកថា ថ្ងៃ១កក្កដាខែមុននេះ ក្រុមជីហាតបានវាយប្រហារហាងកាហ្វេមួយកន្លែង នៅទីក្រុងដាកា បង់ក្លាដែស សម្លាប់ចំណាប់ខ្មាំង២០នាក់ ក្នុងនោះ១៨នាក់ ជាជនបរទេស។ ភាគច្រើនជាជនជាតិអ៊ីតាលី និងជប៉ុន។
ថ្ងៃសៅរ៍នេះ ប៉ូលិសប្រាប់ថា សម្លាប់បាន តាមីម ឆវដឺហ៊ូរី Tamim Chowdhury ដែលជាមេក្លោងក្រុមជីហាត ក្នុងប្រតិបត្តិការ នៅណារ៉ាយ៉ាន់ហ្កាន់ច៍ Narayanganj ២៥គីឡូម៉ែត្រ ខាងត្បូងក្រុងដាកា។ ក្រុមជីហាតបូករួមទាំងមេក្លោងបានលាក់ខ្លួន នៅទីនោះ។
មេក្លោងជីហាត ឈ្មោះថា តាមីម ឆវឌឺហ៊ូរី មានសញ្ជាតិ២៖ កាណាដា និងបង់ក្លាដែស។ តាមីមជាមេក្រុមមូចាហ៊ីឌីន បង់ក្លាដែស ជាក្រុមជ្រុលនិយមអ៊ីស្លាមក្នុងស្រុក។ ក្រុមនេះរងការចោទប្រកាន់ថា បានសម្លាប់ជនបរទេស រឺវាយប្រហារអ្នកកាន់សាសនាផ្សេងពីអ៊ីស្លាម។ អាជ្ញាធរបង់ក្លាដែសបានហាមឃាត់សកម្មភាពក្រុមមួយនេះ។
មេក្លោងជីហាត តាមីម បានមកដល់បង់ក្លាដែស៣ឆ្នាំហើយ ហើយបានដឹកនាំនិងឧបត្ថម្ភការឃោសនាជ្រុលនិយមរបស់យុវជនសាសនាអ៊ីស្លាម។
គួររំលឹកដែរថា ក្រុមជីហាតរដ្ឋអ៊ីស្លាម បានប្រកាសទទួលខុសត្រូវការចាប់មនុស្សធ្វើចំណាប់ខ្មាំង នៅហាងកាហ្វេ ទីក្រុងដាកា ខែកក្កដា តែរដ្ឋាភិបាលបង់ក្លាដែសបដិសេធថា គ្មានវត្តមានក្រុមជីហាតបរទេសក្នុងប្រទេសទេ។ រដ្ឋាភិបាលបានទំលាក់កំហុស ទៅលើក្រុមជីហាតក្នុងស្រុកវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ