ជប៉ុនសម្លាប់មាន់៣៧០០០ក្បាល ព្រោះឆ្លងមេរោគផ្តាសាយបក្សី
អាជ្ញាធរសុខាភិបាលជប៉ុន បានប្រាប់ឲ្យដឹងថា គេទើបបានពិនិត្យឃើញ មានករណី ឆ្លងមេរោគផ្តាសាយបក្សី មួយកន្លែងទៀត នៅកសិដ្ឋានចិញ្ចឹមមាន់ មួយកន្លែង លើកោះ ហុងហ្ស៊ូ ភាគកណ្តាលប្រទេសជប៉ុន។ មាន់ចំនួន ៣ម៉ឺន ៧ពាន់ក្បាល ត្រូវបាន សម្លាប់ចោល ដើម្បីទប់ស្កាត់ កុំឲ្យមេរោគរីករាលដាល ទៅកសិដ្ឋានផ្សេងទៀត។ នេះជាករណីទីបី ហើយដែលមានការលេចឡើងជាថ្មី នូវមេរោគ ផ្ដាសាយបក្សី នៅតាមកសិដ្ឋានចិញ្ចឹមមាន់ នៅជប៉ុន ក្នុងរយៈពេលមួយខែនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
ម្ចាស់កសិដ្ឋានចិញ្ខឹមមាន់មួយកន្លែង នៅខេត្ត យ៉ាមាហ្គូឈី លើកោះ ហុងហ្ស៊ូ បានផ្តល់ដំណឹងបន្ទាន់ ដល់អាជ្ញាធរសុខាភិបាលជប៉ុន បន្ទាប់ពីមាន់ជាង២០ ក្បាល បានងាប់ផ្ទួនៗគ្នា។ ក្រោយការធ្វើតេស្ត៍រកមេរោគ អាជ្ញាធរជប៉ុន បានរកឃើញថា មាន់ទាំងនោះ ពិតជាបានងាប់ ដោយសារមេរោគផ្តាសាយបក្សី H5N1 ប្រាកដមែន។
ភ្លៀមៗនោះ គឺនៅព្រឹកថ្ងៃអង្គារ ម្សិលមិញ អាជ្ញាធរ បានតម្រូវឲ្យសម្លាប់មាន់ទាំងអស់ នៅក្នុងកសិដ្ឋាន ដែលមានចំនួន ៣ម៉ឺន ៧ពាន់ក្បាល។ អាជ្ញាធរក៏បានចាត់ តំបន់សន្តិសុខពិសេស ក្នុងរង្វង់១០ គីឡូមែត្រ ជុំវិញកសិដ្ឋានកើតហេតុ ហើយហាមមិនឲ្យនាំយកសត្វមាន់ រឺទា ចេញពីតំបន់នេះទេ។
សូមបញ្ជាក់ថា នេះជាករណីទីបីហើយ ចាប់តាំងពីដើមខែ ធ្នូនេះ ដែលមានការរើបមកវិញ នូវមេរោគផ្តាសាយបក្សី H5N1។ កាលពីពាក់កណ្តាលខែ នៅក្នុងខេត្ត មីយ៉ាហ្សាគី មានកសិដ្ឋានចិញ្ចឹមមាន់មួយកន្លែង ក៏មានករណីឆ្លងមេរោគ ផ្តាសាយបក្សីដែរ។ មាន់ប្រមាណជា ៤ពាន់ក្បាល ត្រូវបានសម្លាប់ចោល។ ហើយ កាលពីថ្ងៃចន្ទ ពីរថ្ងៃមុននេះទៀត នៅក្នុងខេត្ត មីយ៉ាហ្សាគី ដដែល មានកសិដ្ឋានមួយទៀត នៅចម្ងាយជាង ១០០ គីឡូមែត្រ ពីកសិដ្ឋានមុន ក៏មានករណីមេរោគ H5N1 ដែរ។ មាន់ជាង ៤ម៉ឺន ២ពាន់ក្បាល ក៏ត្រូវបានគេ សម្លាប់ចោល ភ្លៀមៗនោះដែរ។
ភ្លៀមៗ ក្រោយទទួលបានដំណឹងផ្ទួនៗបែបនេះ កោះហុងកុង បានសម្រេចបិទ មិនឲ្យនាំសាច់មាន់ សាច់ទា និងផលិតផល ជាប់ទាក់ទងផ្សេងទៀត ចូលពីប្រទេសជប៉ុនទេ។ សូមបញ្ជាក់ថា បើគិតពីដើមឆ្នាំ រហូតមកដល់ខែ តុលា ឆ្នាំ២០១៤នេះ ហុងកុងបាននាំចូល សាច់មាន់ សាច់ទា ចំនួន៤ពាន់ ៦រយតោន និងពងមាន់ពងទា ចំនួន ជិត១៨លានគ្រាប់ ពីជប៉ុន។ កាលពីថ្ងៃអាទិត្យ ថ្មីៗនេះ ហុងកុងទើបតែបាន ប្រកាសសញ្ញាអាសន្ន ដោយសារមានករណី អ្នកជំងឺផ្តាសាយបក្សីម្នាក់។
សូមរំលឹកថា ចាប់តាំងពីឆ្នាំ ២០០៣ មក មេរោគ ផ្តាសាយបក្សី H5N1 បានសម្លាប់ជីវិតមនុស្ស អស់ ៤០០នាក់ហើយ ហើយដែលភាគច្រើន ជាប្រជាជននៅតំបន់ អាស៊ីអាគ្នេយ៍យើងនេះ។ រីឯមេរោគផ្តាសាយបក្សី មួយទៀត ដែលកាចសាហាវដែរ ហើយដែលទើបតែ ចេញរូបរាង្គនៅឆ្នាំ២០១៣នេះ គឺមេរោគ H7N9 បានសម្លាប់ជីវិត អស់ ១៧០នាក់ហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ