ចិនប្រកាសបើកទីផ្សារកាបូនដើម្បីចូលរួមកាត់បន្ថយឧស្ម័នផ្ទះកញ្ចក់
កាលពីថ្ងៃអង្គារ ទីក្រុងប៉េកាំងបានឈានចូលដល់ថ្ងៃទី ២ ថ្ងៃប្រកាសអាសន្នកម្រិតផ្សែងពុលក្នុងបរិយាកាស។ នៅថ្ងៃអង្គារដដែល នៅក្នុងសន្និសីទអន្តរជាតិស្តីពីអាកាសធាតុក្នុងទីក្រុងប៉ារីសមន្រ្តីជាន់ខ្ពស់របស់រដ្ឋាភិបាលចិន បានប្រកាសបង្កើតទីផ្សារកាបូន ដែលនឹងត្រូវដាក់ឲ្យដំណើរការ ចាប់ពីឆ្នាំ ២០១៧ទៅ។ តើអ្វីទៅជាទីផ្សារភាគហ៊ុន កាបូនិក?
ចុះផ្សាយនៅថ្ងៃ៖
ស្តាប់ - ០៣:០៨
ទីផ្សារកាបូនមានទិសដៅចំបង កាត់បន្ថយឧស្ម័នផ្ទះកញ្ចក់ តាមរយៈប្រព័ន្ធទិញដូរ កូតា និងសិទ្ធិបញ្ចេញឧស្ម័នកាបូនិក ទៅក្នុងបរិយាកាស។ ទីផ្សារកាបូនអនុវត្តទៅតាមគោលការណ៍ ដែលថា អ្នកបញ្ចេញផ្សែងពុល ត្រូវតែបង់លុយ ទៅតាមចំនួនឧស្ម័នដែលខ្លួនបំភាយទៅក្នុងបរិយាកាស។ វិធានការគាបយកលុយបន្ថែម ពីក្រុមហ៊ុន រោងចក្រ ដែលបញ្ចេញ ឧស្ម័នកាបូនិក ធ្វើឡើង ដើម្បី ជំរុញលើកទឹកចិត្តឲ្យគេចេះសន្សំសំចៃក្នុងការប្រើថាមពល ឬ ឲ្យគេលះបង់ចោល ថាមពលដែលបានមកពីធ្យូងថ្ម និងបែរទៅអភិវឌ្ឍបច្ចេកវិទ្យា ដើម្បីបង្កើតថាមពលមិនចេះរីងស្ងួតដូចជាថាមពលបានមកពីពន្លឺ ព្រះអាទិត្យជាដើម។ នៅអាស៊ី កូរ៉េខាងត្បូងជាប្រទេសនាំមុខគេ ដែលបានអនុវត្តទីផ្សារកាបូនិក ដើម្បីកាត់បន្ថយការបញ្ចេញឧស្ម័នផ្ទះកញ្ចក់។
នៅទីផ្សារកាបូន គឺស្ថាប័នរដ្ឋ (ឬអង្គការសហប្រជាជាតិ សហភាពអឺរ៉ុប) ជាអ្នកកំណត់បរិមាណឧស្ម័នផ្ទះកញ្ចក់ ដែលជាទូទៅ ត្រូវមានកម្រិតតិចជាង ចំនួនឧស្ម័នដែលគេធ្លាប់បានបញ្ចេញ កន្លងមក។ ដោយផ្អែកលើបរិមាណឧស្ម័នផ្ទះកញ្ចក់ដែលរដ្ឋាភិបាលនីមួយៗសន្យាកាត់បន្ថយ នៅថ្នាក់អន្តរជាតិ ស្ថាប័នរដ្ឋអាចបែងចែកកូតាទៅឲ្យក្រុមហ៊ុន បុគ្គល ដែលអាជីវកម្មរបស់ពួកគេមានបញ្ចេញឧស្ម័នកាបូនិក។ ក្រុមហ៊ុនដែលបញ្ចេញឧស្ម័នកាបូនិកលើសពីកូតាដែលរដ្ឋបានកំណត់ ត្រូវបង់លុយ សុំទិញបន្ថែមកូតាពីទីផ្សារកាបូន ឬបើមិនដូច្នោះទេ គេត្រូវប្រឈមនឹងការបង់ប្រាក់ពិន័យ។ ចំណែកក្រុមហ៊ុនផ្សេងដែលបញ្ចេញឧស្ម័នកាបូនិក តិច ទាបជាងកូតាដែលខ្លួនមាន គឺអាចដាក់លក់កូតានៅសល់របស់ខ្លួន ទៅក្នុងទីផ្សារកាបូន។
ក្នុងករណីប្រទេសចិន ទីផ្សារកាបូនដែលនឹងលេចរូបរាង នៅឆ្នាំ ២០១៧ នឹងក្លាយជាទីផ្សារកាបូនធំជាងគេក្នុងពិភពលោក។ បើតាម លោកជាង ចាវលី អនុប្រធានការិយាល័យអាកាសធាតុ ទីផ្សារកាបូនរបស់ចិន មានការចូលរួមពីក្រុមហ៊ុនជិត ១ម៉ឺនក្រុមហ៊ុន។ តាមលោកជាង ចាវលី ផ្សារកាបូន នឹងលាតសន្ធឹងក្នុងខេត្តចំនួន ៣១របស់ប្រទេសចិន និងរួមបញ្ចូលវិស័យឧស្សាហកម្មចំនួន៦។ នៅឆ្នាំ ដំបូង ទីផ្សារកាបូនរបស់ចិន នឹងគ្របដណ្តប់លើឧស្ម័នផ្ទះកញ្ចក់ ៤ពាន់លានតោន ដែលស្មើនឹងពាក់កណ្តាលនៃបរិមាណឧស្ម័នផ្ទះកញ្ចក់។ តាមអង្គការស្តីពីគម្រោងកាបូនក្នុងពិភពលោក ចិនបញ្ចេញឧស្ម័នផ្ទះកញ្ចក់ ប្រមាណ ៩ពាន់លានតោន ក្នុងមួយឆ្នាំៗ ដែលក្នុងនោះ មានជាង៧២ភាគរយ ជាឧស្ម័នកាបូនិក។ ចាប់តាំងពីឆ្នាំ ២០០៥ ចិនបានវ៉ាដាច់ប្រទេសអាមេរិក ដោយបានក្លាយជាប្រទេសធំទី១ដែលបញ្ចេញឧស្ម័នកាបូនិកច្រើនជាងគេទៅក្នុងបរិយាកាស។ ឧស្ម័នកាបូនិក ដែលចិនបញ្ចេញបានកើនឡើងជារៀងរាល់ឆ្នាំ គឺប្រមាណ១២០ភាគរយ។ ការបញ្ចេញឧស្ម័នកាបូនិក កើនឡើង ដោយសារមានការកើនឡើងនៃការប្រើប្រាស់ធ្យូងថ្ម ប្រេង និងការផលិតស៊ីម៉ង់ ដែលដើរតួសំខាន់ដែរក្នុងការបញ្ចេញឧស្ម័នកាបូនិក ទៅក្នុងបរិយាកាស។ គឺឧស្ម័នកាបូនិកដែលបានក្លាយជាឧស្ម័នផ្ទះកញ្ចក់ ដើមហេតុបង្កឲ្យមានការប្រែប្រួលអាកាសធាតុ និងការឡើងកំដៅផែនដី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ