Amnesty International៖ ស្ថានភាពសិទ្ធិមនុស្សនៅហុងកុង កាន់តែធ្លាក់ចុះ
ស្ថានភាពសិទ្ធិមនុស្សនៅហុងកុង កាន់តែធ្លាក់ចុះដុនដាប ក្នុងរយៈកាលចុងក្រោយនេះ។ នេះ បើយោងតាមរបាយការណ៍មួយ របស់អង្គការ Amnesty International ដែលបានចេញផ្សាយ នៅថ្ងៃអង្គារ ទី២៦មីនានេះ។ អង្គការ Amnesty International បានលើកឡើងជាអាថិ នូវការថយចុះខ្លាំង ផ្នែកសេរីភាពបញ្ចេញមតិ និងសេរីភាពភាពជួបជុំតវ៉ានានា របស់ប្រជាជនហុងកុង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
របាយការណ៍ របស់ Amnesty International បានលើកឡើងថា ការគោរពសិទ្ធិសេរីភាពនៅហុងកុង បានធ្លាក់ចុះខ្លាំង។ ប្រភពនៃបញ្ហានេះ គឺដោយសារ ពាក្យថា “សន្តិសុខជាតិ”។ យោងតាមរបាយការណ៍ របស់Amnesty International គឺរដ្ឋបាលកោះហុងកុង បានប្រើប្រាស់ពាក្យថា ដើម្បីការពារសន្តិសុខជាតិ ដើម្បីយកទៅអនុវត្តក្នុងការរិតបន្តឹងសិទ្ធិសេរីភាព។
របាយការណ៍លើកឡើងថា ពាក្យថា “សន្តិសុខជាតិ” ដែលមានចែងក្នុងច្បាប់ហុងកុង គឺមានន័យទូលំទូលាយជ្រុលពេក ពុំមានការកំណត់ព្រំដែនឲ្យច្បាស់ ហើយធ្វើឲ្យពុំមានស្ថិរភាពគតិយុត្តិ។ បន្ថែមពីនេះ រដ្ឋអំណាចហុងកុង អាចអនុវត្តគោលការណ៍ “សន្តិសុខជាតិ” នេះ ដោយអត្តនោម័ត ដើម្បីធ្វើទុក្ខបុកម្នេញ ទៅលើសកម្មជននយោបាយ សមាគម ឬគណបក្សនយោបាយដែលរិះគន់ការដឹកនាំ។
ជាផលវិបាក អ្នកជំនាញរបស់ Amnesty International បានសង្កេតឃើញថា ប្រជាជនហុងកុង កាន់តែលែងហ៊ាននិយាយ ឬតវ៉ាអ្វីច្រើន ដោយសារម្នាក់ៗ ភ័យខ្លាចត្រូវជាប់ទោស ក្រោមពាក្យថា “សន្តិសុខជាតិ” នេះ។ ចំណែកការជួបជុំគ្នា បង្កើតជាសមាគម ឬធ្វើបាតុកម្មតវ៉ា ក៏កាន់តែថយចុះ ដោយសារប្រជាជនភ័យខ្លាច ពីការចាប់ទោសអូសដំណើរ។ ច្បាប់ស្តីពីសន្តិសុខជាតិ អាចបើកផ្លូវ ឲ្យមានការចាប់ដាក់ឃុំ ទៅលើមនុស្សកាន់តែច្រើន។
របាយការណ៍ ក៏បានរំលឹកផងដែរ អំពីករណីរំលោភសិទ្ធិសេរីភាព និងសិទ្ធិនយោបាយមួយចំនួន នាពេលកន្លងមកនៅហុងកុង។ មានជាអាថិ ការបណ្តេញអ្នកកាសែតជនជាតិអង់គ្លេសម្នាក់ ដែលធ្វើការឲ្យ Financial Times ដោយសារ តែអ្នកកាសែតនេះ បានអញ្ជើញ លោក Andy Chan ដែលជាមេដឹកនាំគណបក្សឯករាជ្យនិយម ឲ្យចូលរួមក្នុងកម្មវិធីសន្និសីទ “ក្លឹបអ្នកកាសែតបរទេស” នៅហុងកុង។ ចំណែក គណបក្សរបស់លោក Andy Chan វិញ ត្រូវបានអាជ្ញាធរហុងកុងហាមឃាត់ មិនឲ្យចូលរួមក្នុងការបោះឆ្នោតទេ កាលពីខែកញ្ញា ឆ្នាំទៅមិញ។
ជាចុងបញ្ចប់ Amnesty International បានលើកឡើងថា ការប្រើប្រាស់ ពាក្យថា “សន្តិសុខជាតិ” ដើម្បីយកជាលេស ធ្វើទុក្ខបុកម្នេញទៅលើសម្លេងនយោបាយប្រឆាំង គឺជាយុទ្ធសាស្ត្ររបស់រដ្ឋអំណាចដែលមានទំនោរផ្តាច់ការ។ ដោយឡែក ក្រសួងការបរទេសអាមេរិក ក៏បានចេញរបាយការណ៍មួយដែរ ប៉ុន្មានថ្ងៃមុននេះ ដោយបានសំដែងការព្រួយបារម្ភថា បរិយាកាសរិតបន្តឹងសិទ្ធិសេរីភាពនៅហុងកុង នឹងធ្វើឲ្យប៉ះពាល់ ដល់វិស័យជំនួញរកស៊ីរបស់សហគ្រាស។ សម្រាប់អាមេរិក គឺវាប្រាកដណាស់ ដែលថា រដ្ឋបាលហុងកុង ចង់បំពេញបំណងបក្សកុម្មុយនិស្តិចិនប៉េកាំង ជាជាងការពារប្រជាជនហុងកុងខ្លួនឯង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ