សហភាពអឺរ៉ុបរិះគន់ច្បាប់អាពាហ៍ ពិពាហ៍ភូមា
សហភាពអឺរ៉ុបបានចេញសេចក្តីថ្លែងការណ៍ ប្រតិកម្ម នៅថ្ងៃព្រហស្បតិ៍ រិះគន់ច្បាប់អាពាហ៍ ពិពាហ៍ភូមា ដែលទើបត្រូវបានសភាបោះឆ្នោត អនុម័ត កាលពីថ្ងៃអង្គារទី ៧ កក្កដា។ តាមសហភាពអឺរ៉ុប ច្បាប់អាពាហ៍ ពិពាហ៍មានគោលដៅ បិទសិទ្ធិសេរីភាពរបស់ស្រ្តីភូមា ដែលចង់រៀបអាពាហ៍ ពិពាហ៍ជាមួយនឹងបុរស ដែលកាន់សាសនា ផ្សេង ក្រៅពីពុទ្ធសាសនា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
ច្បាប់អាពាហ៍ ពិពាហ៍ដែលអ្នកតំណាងរាស្រ្តភូមាបានបោះឆ្នោតអនុម័ត កាលពីថ្ងៃអង្គារមានលក្ខណៈរើសអើងសុទ្ធសាធ និងបិទសិទ្ធិសេរីភាពរបស់ស្រ្តីពុទ្ធសាសនិក ភូមា ដែលចង់រៀបការជាមួយនឹងបុរសដែលមកពីសាសនាដទៃ។ នៅក្នុងសេចក្តីថ្លែងការណ៍ ចេញផ្សាយ កាលពីថ្ងៃព្រហស្បតិ៍ សហភាពអឺរ៉ុបបានវាយតម្លៃថា ច្បាប់អាពាហ៍ ពិពាហ៍ ធ្វើឡើង ដោយមិនត្រឹមត្រូវ មិនសមស្របតាមបទដ្ឋានអន្តរជាតិស្តីពីសិទ្ធិមនុស្ស។
នៅក្នុងច្បាប់អាពាហ៍ ពិពាហ៍ភូមា គេបានចែងថា ដែលស្រ្តីពុទ្ធសាសនិកភូមា ដែលត្រូវរៀបការជាមួយបុរសកាន់សាសនាដទៃ ក្រៅពីពុទ្ធសាសនា ត្រូវដាក់ពាក្យសុំការអនុញ្ញាតិទៅអាជ្ញាធរមូលដ្ឋាន និងបិទដំណឹងភ្ជាប់ពាក្យ ជាសាធារណៈ។ ស្រ្តីភូមា នឹងអាចរៀបអាពាហ៍ ពិពាហ៍ បើសិនគ្មានការជំទាស់ពី បុគ្គលណាម្នាក់។ អ្នកដែលល្មើស មិនគោរពតាមច្បាប់ អាពាហ៍ ពិពាហ៍ នឹងត្រូវទទួលរងទោសជាប់ពន្ធនាគារ ២ឆ្នាំ។
តាមសមាជិកសភា មកពីគណបក្សកាន់អំណាច ច្បាប់អាពាហ៍ ពិពាហ៍ មានគោលដៅការពារប្រយោជន៍ តាំងពីសិទ្ធិលែងលះ សិទ្ធិទទួលទ្រព្យសម្បត្តិ និងការពារសិទ្ធិចិញ្ចឹមកូន ឲ្យស្រ្តី កាន់ពុទ្ធសាសនា ដែលត្រូវរៀបការជាមួយ បុរសដែលមកពីសាសនាដទៃ។ ច្បាប់អាពាហ៍ ពិពាហ៍ ភូមា ស្ថិតនៅក្នុងចំណោមច្បាប់ដ៏ចម្រូងចម្រាសចំនួន ៤ ដែលរដ្ឋាភិបាលភូមា បង្កើតឡើង គ្រប់គ្រងប្រជាជន ដែលនៅក្នុងនោះ ក៏មានផងដែរ ច្បាប់កំណត់អត្រាកំណើត សម្រាប់សហគមន៍កាន់សាសនាអ៊ីស្លាម។ លោកស្រី អ៊ុងសាន ស៊ូជី ប្រធានគណបក្សប្រឆាំង រិះគន់ច្បាប់អាពាហ៍ពិពាហ៍ ដែលលោកស្រីជឿថា កំពុងរំលោភសិទ្ធិស្រ្តីភូមា។ ចំណែកក្រុមការពារសិទ្ធិមនុស្សវាយតម្លៃថា រាល់ច្បាប់គ្រប់គ្រងប្រជាជនភូមា ដែលរដ្ឋាភិបាលរបស់លោកថេន សេន តាក់តែង ឡើង គឺធ្វើទៅតាមការប៉ងចង់បានរបស់ចលនាក្រុមព្រះសង្ឃជាតិនិយមភូមា ដែលឃោសនា ថា អាស៊ី ក្នុងនោះមានភូមា ដែលអ្នកកាន់សាសនាព្រះពុទ្ធច្រើន លើសលប់ នឹងត្រូវលុកលុយ គ្របដណ្តប់ដោយសាសនាអ៊ីស្លាមទៅនឹងថ្ងៃអនាគត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ