ចិនច្រានចោលការរិះគន់របស់បារាំងនិងអាល្លឺម៉ង់រឿងអ៊ុយហ្គួរនិងហុងកុង
រដ្ឋាភិបាលប៉េកាំង ច្រានចោលទាំងស្រុងនូវការរិះគន់របស់បារាំងអាល្លឺម៉ង់ ស្តីអំពីស្ថានភាពសិទ្ធិមនុស្សរបស់ជនជាតិភាគតិចកាន់សាសនាអ៊ីស្លាម អ៊ុយហ្គួរនៅស៊ីងជាំង និងបាតុកម្មនៅហុងកុង។ ចិនបញ្ចេញប្រតិកម្មបែបនេះ ដោយនៅថ្ងៃម្សិលមិញ បារាំងបានអំពាវនាវឱ្យចិនបញ្ឈប់ទង្វើចាប់ឃុំឃាំងមនុស្សទាំងហ្វូងៗ ក្រោមលេសបញ្ជូនទៅអប់រំវិជ្ជាជីវៈ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
សំណុំរឿងស៊ីងជាំង ក៏ដូចជាហុងកុង ជាកិច្ចការផ្ទៃក្នុងរបស់ចិនទាំងស្រុង ដែលគ្មានរដ្ឋាភិបាលបរទេស អង្គការស្ថាប័នណា ឬបុគ្គលណា ឬមហាអំណាចណាមួយអាចចូលជ្រៀតជ្រែកបានឡើយ។ នេះជាប្រតិកម្មរបស់អ្នកនាំពាក្យក្រសួងការបរទេសចិន តបទៅសំដីរបស់ប្រមុខការទូតបារាំង និងលោកស្រីនាយករដ្ឋមន្ត្រីអាល្លឺម៉ង់ កាលពីម្សិលមិញ។
សូមរំលឹកថា នៅចំពោះមុខសភា លោកស្រីមែរកិល បានគូសបញ្ជាក់អំពីភាពចាំបាច់ដែលត្រូវរិះគន់សកម្មភាពរំលោភសិទ្ធិមនុស្សនៅចិន និងត្រូវលើកសរសើរពលរដ្ឋហុងកុងដែលបានចូលរួមបោះឆ្នោតយ៉ាងកុះករ។ ចំណែកប្រមុខការទូតបារាំងវិញ លោកបានអំពាវនាវដោយត្រង់ៗឱ្យប៉េកាំងបិទជំរំឃុំឃាំងនៅស៊ីងជាំង និងព្រមបើកទ្វារឱ្យអង្គការសហប្រជាជាតិចុះទៅត្រួតពិនិត្យផ្ទាល់ដល់កន្លែង។ បើតាមលោករដ្ឋមន្ត្រី បារាំងកំពុងតាមដាន ដោយប្រុងប្រយ័ត្នបំផុតដំណឹងនិងភស្តុតាងដែលផ្សព្វផ្សាយដោយសម្ព័ន្ធអ្នកសារព័ត៌មាន និងបណ្តាញសារព័ត៌មានអន្តរជាតិ កាលពីថ្ងៃអាទិត្យ អំពីប្រព័ន្ធគាបសង្កត់យ៉ាងតឹងរ៉ឹងជាទីបំផុតរបស់ចិន លើជនជាតិភាគតិចអ៊ុយហ្គួរ ដោយមានការចាប់ឃុំឃាំងទាំងហ្វូងៗនៅតំបន់ស៊ីងជាំង។
ក្រោយការផ្សព្វផ្សាយនោះភ្លាម ចិនបានអះអាងថាជាការប្រឌិតព័ត៌មាននិងបានចោទប្រកាន់ក្រុមអ្នកសារព័ត៌មានថាបានប្រើវិធីសាស្ត្រដ៏គួរស្អប់ខ្ពើមដើម្បីចាប់ថ្នាក់ស្ថានភាពនៅស៊ីងជាំង។ បើតាមអង្គការការពារសិទ្ធិមនុស្ស មានអ្នកកាន់សាសនាអ៊ីស្លាម ភាគច្រើនជាជនជាតិភាគតិច អ៊ុយហ្គួរប្រមាណជា១លាននាក់កំពុងជាប់ឃុំឃាំងក្នុងជំរំលត់ដំអប់រំនយោបាយនៅស៊ីងជាំង។ ប៉ុន្តែប៉េកាំង បានច្រានចោលតួលេខនេះ និងបានបញ្ជាក់ថា ជាមជ្ឈមណ្ឌលអប់រំវិជ្ជាជីវៈ ដើម្បីប្រយុទ្ធប្រឆាំងនឹងចលនាផ្តាច់ខ្លួនបែបអ៊ីស្លាមនិយម ក្រោយពីចិនបានរងភេរវកម្មពីសំណាក់សកម្មជនអ៊ុយហ្គួរ កាលពីឆ្នាំកន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ