បោះឆ្នោតឃុំ សង្កាត់ហុងកុង៖ជាក្តីសង្ឃឹមសម្រាប់ក្រុមអ្នកប្រជាធិបតេយ្យ និងជាតេស្តសម្រាប់លោកស្រីការី ឡាំ
ចុះផ្សាយនៅថ្ងៃ៖
ស្តាប់ - ០៥:៤៨
នៅថ្ងៃអាទិត្យ ទី២៤ វិច្ឆិកា ហុងកុងដែលជាទឹកដីស្វយ័តរបស់ចិនដីគោកបានរៀបចំបោះឆ្នោតជ្រើសរើសក្រុមប្រឹក្សាឃុំ សង្កាត់។ មានពលរដ្ឋហុងកុងចំនួន ៤ ១៣០ ០០០នាក់ក្នុងចំនួនពលរដ្ឋហុងកុងសរុបទាំង ៧ ៣០០ ០០០នាក់បានចុះឈ្មោះបោះឆ្នោតសម្រាប់ការបោះឆ្នោតនេះ។ គួររម្លឹកថា ការបោះឆ្នោតជ្រើសរើសក្រុមប្រឹក្សាឃុំ សង្កាត់នៅហុងកុងត្រូវរៀបចំធ្វើនៅរៀងរាល់ ៤ឆ្នាំម្តង។ តែការបោះឆ្នោតលើកនេះបានរៀបចំឡើង ក្នុងពេលដែលហុងកុងកំពុងស្គាល់វិបត្តិនយោបាយយ៉ាងធ្ងន់ធ្ងរ ពោលចលនាបាតុកម្មរបស់ក្រុមអ្នកប្រជាធិបតេយ្យដែលបានអូសបន្លាយតាំងពី ៦ខែ។
បរិយាកាសរួមនៃការរៀបចំបោះឆ្នោតឃុំ សង្កាត់នៅហុងកុងពេលនេះ គឺល្អ។ ល្អព្រោះមានពលរដ្ឋហុងកុងដែលបានចុះឈ្មោះបោះឆ្នោតជាង ៤លាននាក់បាននាំគ្នាចេញទៅបោះឆ្នោតដោយសុខចិត្តឈរតម្រង់ជួររង់ចាំដល់វេនរបស់ខ្លួន ទោះបីជាត្រូវរង់ចាំប៉ុន្មានម៉ោងក៏ដោយ។ មានការកត់សម្គាល់ចំនួន ៣នៅក្នុងការបោះឆ្នោតឃុំ សង្កាត់ហុងកុងលើកនេះ ទី១ ចំនួនអ្នកចុះឈ្មោះបោះឆ្នោតបានកើនបន្ថែម ៤០០ ០០០នាក់ បើធៀបនឹងការបោះឆ្នោតក្នុងឆ្នាំ ២០១៥ ទី២ អត្រាអ្នកចូលរួមបោះឆ្នោតលើកនេះមានការកើនឡើង បើធៀបនឹងការបោះឆ្នោតកាលពី ៤ឆ្នាំមុន និងទី៣ ការបោះឆ្នោតលើកនេះបានធ្វើឡើងនៅក្នុងបរិបទមួយដែលហុងកុងកំពុងស្គាល់វិបត្តិនយោបាយធ្ងន់ធ្ងន់អូសបន្លាយតាំងពី ៦ខែ។
ថ្មីៗនេះមានការលើកឡើងថា ការបោះឆ្នោតឃុំ សង្កាត់ពេលនេះប្រហែលជាមិនអាចរៀបចំបានផងដោយបារម្ភពីការអុកឡុករបស់ក្រុមបាតុករអ្នកប្រជាធិបតេយ្យ។ តែខុសពីការគិតទុក ការបោះឆ្នោតនេះបែរជាប្រពឹត្តទៅដោយរលូន និងថែមទាំងមានការអំពាវនាវឲ្យចូលរួមបោះឆ្នោតពីចលនាអ្នកប្រជាធិបតេយ្យទៀតផង។
ការបោះឆ្នោតឃុំ សង្កាត់មិនសូវទទួលបានការចាប់អារម្មណ៍
ជាទូទៅ ការបោះឆ្នោតជ្រើសរើសក្រុមប្រឹក្សាឃុំ សង្កាត់មិនសូវបានគ្រប់គ្នាយកចិត្តទុកដាក់ ហើយអត្រាអ្នកចូលរួមបោះឆ្នោតក៏មានតិចតួច។ តែបរិបទនៃការរៀបចំបោះឆ្នោតឃុំ សង្កាត់លើកនេះមិនដូចកាលពីឆ្នាំ ២០១៥ ទេ។ ការបោះឆ្នោតឃុំ សង្កាត់លើកនេះបានធ្វើឡើង ក្នុងពេលដែលហុងកុងកំពុងស្គាល់វិបត្តិនយោបាយយ៉ាងជ្រៅមួយមិនធ្លាប់មាន តាំងពីហុងកុងត្រូវបានអង់គ្លេសប្រគល់ទៅឲ្យចិនដីគោកក្នុងឆ្នាំ ១៩៩៧។ បេក្ខជនដែលឈរឈ្មោះសម្រាប់ការបោះឆ្នោតមួយនេះច្រើនជាបេក្ខជនមានទំនោររករដ្ឋាភិបាលហុងកុងដែលគាំទ្រចិនដីគោក។
ការបោះឆ្នោតលើកនេះមានបេក្ខជនឈរឈ្មោះដល់ទៅជាង ១ ១០០នាក់ដែលពលរដ្ឋហុងកុងត្រូវជ្រើសរើសក្រុមប្រឹក្សាឃុំ សង្កាត់តែចំនួន ៤៥២នាក់សម្រាប់ ១៨ឃុំ សង្កាត់។ ក្រុមប្រឹក្សាឃុំ សង្កាត់មានតួនាទីទទួលបន្ទុកកិច្ចការក្នុងឃុំ សង្កាត់របស់ខ្លួនដោយគ្រប់គ្រងលើការចំណាយមួយចំនួន និងមានសិទ្ធិសម្រេចលើការងារទាក់ទងនឹងសុខភាពសាធារណៈ ឬមួយមធ្យោបាយដឹកជញ្ជូនសាធារណៈជាដើម។ បើធៀបនឹងការបោះឆ្នោតជ្រើសរើសសមាជិកសភា ឬប្រមុខដឹកនាំហុងកុង ការបោះឆ្នោតជ្រើសរើសក្រុមប្រឹក្សាឃុំ សង្កាត់ជារឿងតូចតាច។ តែនៅក្នុងបរិបទសព្វថ្ងៃ ការបោះឆ្នោតមួយនេះកំពុងក្លាយជាក្តីសង្ឃឹមសម្រាប់ក្រុមអ្នកប្រជាធិបតេយ្យ និងជាតេស្តសម្រាប់ប្រមុខដឹកនាំហុងកុងលោកស្រីការី ឡាំ។
ជាការបោះឆ្នោតប្រជាមតិប្រឆាំងលោកស្រីការី ឡាំ?
នៅចំពោះមុខ លទ្ធផលនៃការបោះឆ្នោតឃុំ សង្កាត់ពេលនេះនឹងមិនអាចធ្វើឲ្យមានការផ្លាស់ប្តូររូបភាពវិបត្តិនយោបាយនៅហុងកុងពេលនេះទេព្រោះវិបត្តិនយោបាយមួយនេះអាស្រ័យលើកត្តាច្រើន ពោលមិនអាស្រ័យតែលើលទ្ធផលនៃការបោះឆ្នោតជ្រើសរើសក្រុមប្រឹក្សាឃុំ សង្កាត់ពេលនេះ ឬមួយក៏លទ្ធផលនៃការបោះឆ្នោតផ្សេងទៀតនាពេលខាងមុខឡើយ។ តែសម្រាប់ក្រុមសកម្មជនអ្នកប្រជាធិបតេយ្យហុងកុងដែលបានចុះផ្លូវធ្វើបាតុកម្មតាំងពី ៦ខែកន្លងទៅ ពួកគេបានឆ្លៀតយកការបោះឆ្នោតឃុំ សង្កាត់ពេលនេះដើម្បីបញ្ចេញ និងប្រើជារូបភាពនៃការបោះឆ្នោតប្រជាមតិប្រឆាំងនឹងលោកស្រីការី ឡាំ។
ចំនួនអ្នកចុះឈ្មោះបោះឆ្នោតលើកនេះមានការកើនឡើង អ្នកបោះឆ្នោតបានចំណាយពេលតម្រង់ជួរដើម្បីចូលរួមបោះឆ្នោត និងកំណើននៃអត្រាអ្នកចូលរួមបោះឆ្នោតដោយសារតែមានការអំពាវនាវពីក្រុមអ្នកប្រជាធិបតេយ្យជាសក្ខីកម្មមួយដែលបញ្ជាក់ថា ពលរដ្ឋហុងកុងពិតជាបាននាំគ្នាគាំទ្របុព្វហេតុរបស់ក្រុមអ្នកប្រជាធិបតេយ្យ។ ពិតណាស់ ទោះបីជាចលនាអ្នកប្រជាធិបតេយ្យឈ្នះនៅការបោះឆ្នោតឃុំ សង្កាត់ពេលនេះក៏ដោយក៏នៅមិនទាន់អាចបិទបញ្ចប់វិបត្តិនយោបាយពេលនេះបានដែរ។ តែយ៉ាងហោចណាស់ ក៏អាចជាការរួមចំណែកជួយលើកទឹកចិត្តបន្ថែម និងជួយពង្រឹងការទាមទាររបស់ពួកគេជាបន្តទៀត។ ចំណែករដ្ឋអំណាចនៅហុងកុងក៏ដូចនៅចិនដីគោកអាចនឹងពិចារណាឡើងវិញពីដំណោះស្រាយដែលខ្លួនត្រូវធ្វើចំពោះហុងកុងនាពេលខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ