តុលាការព្រហ្មទណ្ឌអន្តរជាតិប្រកាសបើកអង្កេត អំពើ“ឧក្រិដ្ឋកម្ម” លើជនជាតិរ៉ូហ៊ីងយ៉ា
ជាងមួយឆ្នាំក្រោយការបើកត្រួតពិនិត្យបឋម នៅថ្ងៃព្រហស្បតិ៍ទី ១៤ វិច្ឆិកា ២០១៩នេះ តុលាការព្រហ្មទណ្ឌអន្តរជាតិ (CPI) បានប្រកាសបើកអង្កេតជាផ្លូវការ ទង្វើហិង្សារបស់ភូមា ប្រឆាំងនឹងជនជាតិភាគតិចកាន់សាសនាអ៊ីស្លាមរ៉ូហ៊ីងយ៉ា រហូតមានចរន្តរត់ភៀសទាំងហ្វូងទៅប្រទេសបង់ក្លាដែសជិតខាង ថាពិតជាឧក្រិដ្ឋកម្មប្រល័យពូជសាសន៍ ដូចគេសង្ស័យមែនឬយ៉ាងណា?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
តុលាការព្រហ្មទណ្ឌអន្តរជាតិដែលមានបន្ទុកជំនុំជំរះបទឧក្រិដ្ឋធំៗ និងអាក្រក់ៗបំផុត នៅលើពិភពលោក បានចេញសេចក្តីថ្លែងការណ៍ ប្រកាសអនុញ្ញាតឱ្យរដ្ឋអាជ្ញារបើកអង្កេតជាផ្លូវការ សកម្មភាពឧក្រិដ្ឋរបស់ភូមាលើជនជាតិរ៉ូហ៊ីងយ៉ា ពីបទឧក្រិដ្ឋកម្មប្រឆាំងនឹងមនុស្សជាតិ។
“បន្ទាប់ពីបានត្រួតពិនិត្យបឋម តុលាការសង្កេតឃើញមានសកម្មភាពហិង្សាជាទូទៅ និងជាស្វ័យប្រវត្តិ ដែលអាចរាប់បានថាទង្វើឧក្រិដ្ឋកម្មប្រឆាំងនឹងមនុស្សជាតិ នៅតាមព្រំដែនភូមានិងបង់ក្លាដែស និងមានការធ្វើទុក្ខមុកម្នេញលើជនជាតិរ៉ូហ៊ីងយ៉ា ក្រោមហេតុផលសាសនានិងជាតិពិន្ធុ។ ទំហំនៃឧក្រិដ្ឋកម្ម ចំនួនជនរងគ្រោះ និងចំនួនជនភៀសខ្លួនប្រមាណពី៦សែនទៅ១លាននាក់រត់ពីភូមាទៅជ្រកកោននៅបង់ក្លាដែស បានបង្ហាញយ៉ាងច្បាស់ពីស្ថានភាពធ្ងន់ធ្ងរខ្លាំង ដែលតុលាការត្រូវតែបើកអង្កេត”។
សូមបញ្ជាក់ថា នៅខែសីហាឆ្នាំ២០១៧ ជនជាតិភាគតិចរ៉ូហ៊ីងយ៉ា ប្រមាណជាង៧៤០០០នាក់ បាននាំគ្នារត់គេចខ្លួនពីភូមាដែលប្រជាជនភាគច្រើនជាអ្នកកាន់ព្រះពុទ្ធសាសនា ក្រោយពីយោធាភូមាបានបើកប្រតិបត្តិការបង្ក្រាប។ ជាការរត់ភៀសខ្លួនទ្រង់ទ្រាយធំបំផុត មួយក្នុងប្រវត្តិសាស្ត្រពិភពលោក។
នៅខែកញ្ញាឆ្នាំ២០១៨ រដ្ឋអាជ្ញាររបស់តុលាការ លោកស្រី ហ្វាទូ បេនស៊ូដា បានបើកការត្រួតពិនិត្យបឋម បន្ទាប់ពីតុលាការក្រុងឡាអេ បានប្រកាសទទួលស្គាល់យុត្តាធិការបស់ខ្លួនក្នុងការស៊ើបអង្កេតនិងជំនុំជំរះសំណុំរឿងរ៉ូហ៊ីងយ៉ានេះ ព្រោះថ្វីបើភូមាមិនមែនជាប្រទេសហត្ថលេខីនៃសន្ធិសញ្ញាក្រុងរ៉ូម -ស្ថាបនិកតុលាការនេះមែន ប៉ុន្តែបង់ក្លាដែសដែលរងបន្ទុកទទួលជនជាតិរ៉ូហ៊ីងយ៉ាជាសមាជិករបស់សន្ធិសញ្ញា។ លោកស្រីរដ្ឋអាជ្ញារ បានស្នើសុំឱ្យតុលាការបើកអង្កេតជាផ្លូវការ តាំងពីខែមិថុនាមក តែទើបបានទទួលចម្លើយវិជ្ជមាននៅថ្ងៃនេះ។
កាលពីថ្ងៃចន្ទ ហ្កំប៊ី តំណាងឱ្យប្រទេសជាសមាជិកអង្កការកិច្ចសហប្រតិបត្តិការអ៊ីស្លាម៥៧ផ្សេងទៀត បានដាក់ពាក្យបណ្តឹងទៅតុលាការយុត្តិធម៌អន្តរជាតិប្រឆាំងនឹងភូមាដែរចំពោះទង្វើបែបប្រល័យពូជសាសន៍ជនជាតិភាគតិចអ៊ីស្លាមរ៉ូហ៊ីងយ៉ានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ