ភ្លើងឆេះព្រៃរាលដាលដល់ជាយក្រុង ស៊ីដនី
ភ្លើងឆេះព្រៃជាច្រើនកន្លែងកំពុងរាលដាលចូលទៅជិតទីក្រុងស៊ីដនី ដែលជាទីក្រុងប្រជុំជនធំជាងគេរបស់អូស្ត្រាលី។ នៅថ្ងៃអង្គារ ភ្លើងឆេះព្រៃជាង១០កន្លែង ដែលអំណោយផលដោយសារខ្យល់បក់ខ្លាំង គួបផ្សំនឹងអាកាសធាតុក្តៅស្ងួត បានឆាបឆេះដល់ព្រៃ នៅជាយក្រុងស៊ីដនី។ នៅពេលអ្នកវិទ្យាសាស្រ្តលើកឡើងពីកត្តាប្រែប្រួលអាកាសធាតុ នាយករដ្ឋមន្រ្តីអូស្រ្តាលី និយាយច្រើនពីការប្រឹងប្រែងរបស់ក្រុមពន្លត់អគ្គិភ័យ ហើយនិងការពង្រាយកងទ័ព ដើម្បីចូលរួមពន្លត់ភ្លើងឆេះព្រៃ។
ចុះផ្សាយនៅថ្ងៃ៖
នៅថ្ងៃអង្គារ ក្រុមពន្លត់អគ្គិភ័យអូស្ត្រាលី ត្រូវប្រើទាំងយន្តហោះ និងឧទ្ធម្ភាគចក្រ ដើម្បីចេញទៅពន្លត់ភ្លើង ដែលកំពុងឆាបឆេះ ដល់ជាយក្រុងស៊ីដនី។ នៅពេលរសៀល ភ្លើងឆេះព្រៃ ២កន្លែង បានចាប់ឆេះសន្ធោសន្ធៅ ឧទ្យានជាតិ ដែលសំបូរដោយដើមប្រេងខ្យល់ នៅជាយក្រុង Turramurra ដែលស្ថិតនៅចម្ងាយ ១៥គីឡូម៉ែត្រពីទីក្រុងស៊ីដនី។
តាមអាជ្ញាធរអូស្ត្រាលី ពេញមួយថ្ងៃអង្គារ គេរកឃើញមានភ្លើងឆេះព្រៃ ជាង ៣០០កន្លែង នៅតាមតំបន់ឆ្នេរសមុទ្រខាងកើតរបស់អូស្ត្រាលី។ ក្រុមពន្លត់អគ្គិភ័យ អូស្រាលី រាប់ពាន់នាក់ ត្រូវបានពង្រាយ ពេញ រដ្ឋNew South Walesដើម្បី ត្រៀមទប់ទល់ គ្រោះអគ្គិភ័យដ៏កំណាច និងលក្ខខណ្ឌមហន្តរាយ ដែលអូស្ត្រាលីកម្រនឹងជួបប្រទះ។ សម្រាប់ប្រធានទីភ្នាក់ងារពន្លត់អគ្គិភ័យ ប្រចាំរដ្ឋNew South Wales ដោយមើលទៅលើទំហំ ឆេះរាលដាល ភ្លើងឆេះព្រៃ លើកនេះ ក្រុមពន្លត់ភ្លើងត្រូវធ្វើការជាច្រើនថ្ងៃ ឬសប្តាហ៍ទៀត។ នៅរដ្ឋ New South Wales ភ្លើងឆេះព្រៃ បានដុតបំផ្លាញ ផ្ទៃដីប្រមាណ ១លានហិចតា ដែលស្មើនឹងផ្ទៃដីសរុបរបស់ប្រទេសហ្សាម៉ាអ៊ីកមួយ។
គិតមកត្រឹមថ្ងៃអង្គារ ភ្លើងឆេះព្រៃ បានសម្លាប់ជីវិតមនុស្ស៣នាក់ និងដុតបំផ្លាញ ផ្ទះសម្បែង សាលារៀន ច្រើនជាង ១៥០ខ្នង។ សាលារៀន ប្រមាណ ៦០០កន្លែងបានបិទទ្វារ។ អាជ្ញាធរបានប្រកាសលុបចោលផងដែរ ការប្រកួតប្រណាំងឡាន ដែលត្រូវរៀបចំនៅចុងសប្តាហ៍នេះ នៅ Coffs Harbour ក្នុងរដ្ឋ New South Wales
អ្នកជំនាញបានរៀបរាប់ពីលក្ខខណ្ឌអាកាសធាតុដ៏អាក្រក់ ដែលមិនធ្លាប់មាននៅអូស្ត្រាលី ជាទី ដែលរដូវស្លឹកឈើលាស់ កន្លងទៅ កើតមានអាកាសធាតុក្តៅខ្លាំង រហូតដល់ ៤០អង្សារ។ អាកាសធាតុក្តៅខ្លាំង បូកផ្សំនឹងខ្យល់បក់ ៨០គីឡូម៉ែត្រក្នុងមួយម៉ោង ជាកត្តាអំណោយផលដល់ភ្លើងឆេះព្រៃ ឆេះ វាលស្មៅ ដ៏ស្ងួតហួតហែង។
អ្នកវិទ្យាសាស្រ្ត លើកឡើងពីកត្តាប្រែប្រួលអាកាសធាតុ។ ភ្លើងឆេះព្រៃតែងកើតមាន នៅប្រទេសកោះអូស្ត្រាលី នៅក្នុងរដូវស្លឹកឈើលាស់ និងរដូវក្តៅ។ ប៉ុន្តែ ឆ្នាំនេះ រដូវភ្លើងឆេះកើតមានមុនកំណត់ ហើយនិងសាហាវខ្លាំង ដែលអូស្ត្រាលីទើបជួបជាលើកទី១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ