ក្រុមអ្នកប្រជាធិបតេយ្យតៃវ៉ាន់ធ្វើបាតុកម្មដើម្បីសម្តែងសាមគ្គីភាពជាមួយក្រុមអ្នកប្រជាធិបតេយ្យហុងកុង
នៅថ្ងៃអាទិត្យ ទី២៩ កញ្ញា ក្រុមអ្នកគាំទ្រប្រជាធិបតេយ្យនៅកោះតៃវ៉ាន់បាននាំគ្នាធ្វើបាតុកម្មដើម្បីសម្តែងសាមគ្គីភាព និងគាំទ្រចំពោះក្បួនបាតុកម្មរបស់ក្រុមអ្នកគាំទ្រប្រជាធិបតេយ្យនៅហុងកុង។ ក្បួនបាតុកម្មនៅតៃវ៉ាន់ពេលនេះ រួមទាំងក្បួនបាតុកម្មដែលកំពុងបន្តមាននៅហុងកុងបានធ្វើឡើង ២ថ្ងៃមុនប្រទេសចិនរៀបចំខួបកំណើត ៧០ឆ្នាំនៃការបង្កើតសាធារណរដ្ឋប្រជាមានិតចិននៅថ្ងៃអង្គារ ទី១ តុលាសប្តាហ៍ក្រោយ។ ក្រុមអ្នកគាំទ្រប្រជាធិបតេយ្យនៅតៃវ៉ាន់កំពុងបារម្ភពីស្ថានការណ៍ដែលកំពុងកើតមាននៅហុងកុងដែលជាអតីតដែនដីអាណានិគមអង់គ្លេស និងដែលបច្ចុប្បន្នជាដែនដីស្វយ័តរបស់ចិនដីគោក។
ចុះផ្សាយនៅថ្ងៃ៖
ស្តាប់ - ០២:០៥
« យើងគាំទ្រហុងកុង យើងប្រឆាំងនឹងរបបផ្តាច់ការនិយម » នេះជាឈ្មោះដែលក្រុមអ្នករៀបចំបាតុកម្មបានដាក់ឲ្យសម្រាប់ក្បួនបាតុកម្មនៅក្នុងទីក្រុងតៃប៉ិកនាថ្ងៃអាទិត្យ ទី២៩ កញ្ញា។ ការរៀបចំក្បួនបាតុកម្មរបស់ក្រុមអ្នកប្រជាធិបតេយ្យតៃវ៉ាន់ពេលនេះ គឺដើម្បីសម្តែងសាមគ្គីភាព និងចូលរួមគាំទ្រចំពោះក្រុមបាតុករអ្នកប្រជាធិបតេយ្យហុងកុង។ តែគេមិនត្រូវភ្លេចនិយាយទេថា នេះមិនមែនជាលើកទី១ ទេដែលក្រុមអ្នកគាំទ្រប្រជាធិបតេយ្យនៅតៃវ៉ាន់បានរៀបចំក្បួនបាតុកម្មរបៀបនេះ។ អ្វីដែលក្រុមអ្នកគាំទ្រប្រជាធិបតេយ្យតៃវ៉ាន់បារម្ភ គឺខ្លាចចិនដីគោកប្រើឥទ្ធិពលសង្កត់ខ្លួនដូចនៅហុងកុង។
ពិតណាស់ គេមិនអាចប្រដូចដែនដីហុងកុងទៅនឹងដែនដីតៃវ៉ាន់បានទេ ព្រោះជាដែនដីពីរដែលមានលក្ខន្តិកៈខុសគ្នាស្រឡះ។ ហុងកុងដែលជាអតីតដែនដីអាណានិគមអង់គ្លេសបានក្លាយជាដែនដីស្វយ័តរបស់ចិនដីគោកតាំងពីឆ្នាំ ១៩៩៧។ ចំណែកតៃវ៉ាន់ជាដែនដីឯករាជ្យរស់នៅដោយទីពឹងលើខ្លួនឯង តែចិនបន្តចាត់ទុកជាខេត្តឧទ្ទាមរបស់ខ្លួន និងគំរាមប្រើកម្លាំងវាយយក បើតៃវ៉ាន់ហ៊ានប្រកាសឯករាជ្យនៅថ្ងៃណាមួយ។ ជាក់ស្តែងនៅដើមឆ្នាំ ២០១៩ ប្រធានាធិបតីចិនលោកស៊ី ជីនពីងបានគំរាមយកតៃវ៉ាន់មកគ្រប់គ្រង់ក្នុងដៃដោយប្រើប្រព័ន្ធប្រទេសមួយប្រព័ន្ធពីរដូចនៅហុងកុង។
ប្រធានាធិបតីតៃវ៉ាន់លោកស្រី Tsai Ing-wen ដែលមាននិន្នាការប្រឆាំងចិនដីគោកកំពុងស្គាល់កំណើនប្រជាប្រិយភាពខ្ពស់។ កាលពីប៉ុន្មានខែមុននេះ លទ្ធផលនៃការស្ទង់មតិបានឲ្យលោកស្រី Ing-wen ចាញ់ឆ្នោតនៅក្នុងការបោះឆ្នោតប្រធានាធិបតីតៃវ៉ាន់នៅឆ្នាំ ២០២០។ តែឥឡូវនេះ កម្រិតប្រជាប្រិយភាពរបស់លោកស្រីបានស្ទុះឡើងវិញគួរឲ្យក៏សម្គាល់។ តើស្ថានការណ៍នៅហុងកុងសព្វថ្ងៃមិនមែនកំពុងជួយផ្តល់សន្ទុះដល់ក្រុមអ្នកគាំទ្រប្រជាធិបតេយ្យ និងក្រុមអ្នកចង់បានសេរីភាពនៅតៃវ៉ាន់ទេ ឬយ៉ាងណា?៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ