ហ្សាក់ ស្ហៀរ៉ាក់ អតីតប្រធានាធិបតីបារាំងដែលស្រលាញ់ចូលចិត្តអាស៊ី
លោកហ្សាក់ ស្ហៀរ៉ាក់ អតីតប្រធានាធិបតី បារាំងបានទទួលមរណភាព កាលពីថ្ងៃព្រហស្បតិ៍ម្សិលមិញ ក្នុងជន្មាយុ ៨៦ឆ្នាំ។ ក្រៅតែធ្លាប់កាន់តំណែងសំខាន់ៗ តាំងពីចៅហ្វាយក្រុង ប៉ារីស នាយករដ្ឋមន្រ្តី និងជាប្រធានាធិបតី បារាំងដល់ទៅ ២អាណត្តិ (រយៈពេល ១២ឆ្នាំ) លោកហ្សាក់ ស្ហៀរ៉ាក់ ត្រូវបានគេទទួលស្គាល់ថា ជាប្រធានាធិបតីបារាំង ដ៏កម្រ ដែលបានចាប់អារម្មណ៍ ស្រឡាញ់ចូលចិត្តអាស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៩
លោកហ្សាក់ ស្ហៀរ៉ាក់ ចាប់ផ្តើមស្វែងយល់ ស្គាល់ អាស៊ី តាំងពីនៅវ័យជំទង់ នៅពេលលោក ឧស្សាហ៍ទៅទស្សនាសារមន្ទីរGuimetដែលជាសារមន្ទីរតាំងវត្ថុបុរាណអាស៊ីធំជាងគេ នៅទឹកដីអឺរ៉ុប។ នៅក្នុងសៀវភៅស្តីពីការចងចាំរបស់លោក បោះពុម្ពនៅឆ្នាំ ២០០៩ លោកបានសរសេរសារភាពថា នៅអាយុ ១៦ឆ្នាំ លោកមានគំនិតចង់ចូលកាន់សាសនាហិណ្ឌូ ព្រោះតែលោកចូលចិត្ត គំនិត អហិង្សាដែលបង្រៀនដោយមហាត្មៈ គន្ធី។
ជំនក់ចិត្តស្រឡាញ់ទ្វីបអាស៊ី កើតមាន កាន់តែច្រើនឡើង បន្ទាប់ពីលោកបានធ្វើទស្សនកិច្ចទៅប្រទេសជប៉ុន ចិន កូរ៉េ ឥណ្ឌា ឬវៀតណាម (លោក ស្ហៀរ៉ាក់ មានកូនស្រីចិញ្ចឹមម្នាក់ ជាក្មេងភៀសខ្លួន មកពីប្រទេសវៀតណាម)។ នៅសិង្ហបុរី ជាទី ដែលលោកផ្តើមទស្សនកិច្ចផ្លូវរដ្ឋជាលើកទី១ ទៅអាស៊ី ក្នុងនាមជាប្រធានាធិបតីបារាំង លោកស្ហៀរ៉ាក់ បានប្រកាស ក្តែងៗថា លោកស្រឡាញ់អាស៊ី ប្រជាជន ប្រទេស ហើយនិងវប្បធម៌អាយុរាប់ពាន់ឆ្នាំរបស់ទ្វីបនេះមួយនេះ។ ទស្សនកិច្ចនៅសិង្ហបុរី ជាឱកាសសម្រាប់ប្រធានាធិបតីបារាំង ប្រកាសបើកជំនួបកំពូល អឺរ៉ុប-អាស៊ី ដើម្បីបញ្ជាក់ពីយុទ្ធសាស្រ្តថ្មីរបស់បារាំងក្នុងការបង្ខិតខ្លួនចូលតំបន់អាស៊ី ដែលគេមិនសូវឲ្យចាប់អារម្មណ៍ ឲ្យតម្លៃកន្លងមក។ លោកហ្សាក់ ស្ហៀរ៉ាក់ ផ្តួចផ្តើមគំនិតនេះ ព្រោះតែលោកមានបេះដូងបើកចំហរទៅរកអាស៊ី ប៉ុន្តែ ជាមួយគ្នានោះ ក៏ហេតុផលមួយសំខាន់របស់ប្រធានាធិបតី ដែលមើលឃើញច្បាស់ពីសក្តានុពល និងការរីកចម្រើនដ៏ឆាប់រហ័សរបស់តំបន់អាស៊ីជាពិសេសប្រទេសចិន។
នៅប្រទេសចិន ជាទីដែលលោកអញ្ជើញទៅបំពេញទស្សនកិច្ចជាច្រើនដង នៅក្នុងអាណត្តិប្រធានាធិបតីរយៈពេល ១២ឆ្នាំ លោកស្ហៀរ៉ាក់ ឧស្សាហ៍ ចរចាសម្រេចបានកិច្ចព្រមព្រៀង ពាណិជ្ជកម្មសំខាន់ៗជាមួយទីក្រុងប៉េកាំង។ នៅក្នុងដំណើរទស្សនកិច្ចមួយលើកៗទៅ ប្រទេសចិន លោកបានជំរុញ ឲ្យការចុះហត្ថលេខាលើកិច្ចសន្យាទឹកប្រាក់រាប់ពាន់លានដុល្លារ (៤ពាន់លានដុល្លារ នៅឆ្នាំ ២០០៤ ជាកិច្ចសន្យាមហាសាល បំបែកឯតទគ្គកម្ម)។ ដើម្បីបានកិច្ចសន្យាពីប្រទេសចិន អតីតប្រធានាធិបតីបារាំង ប្រើគ្រប់យុទ្ធសាស្រ្តនយោបាយការទូត។ លោកធ្លាប់បានចេញមុខគាំទ្រគំនិត ដែលទាមទារឲ្យសហភាពអឺរ៉ុបលុបចោលទណ្ឌកម្ម ដែលហាមមិនឲ្យគេលក់អាវុធទៅឲ្យប្រទេសចិន នៅក្រោយ ការបង្រ្កាបដ៏ហិង្សានៅទីលានធានអានមេន។ លើសពីនោះ លោកស្ហៀរ៉ាក់ តមសំដី មិននិយាយរិះគន់ច្រើន បញ្ហារំលោភសិទ្ធិមនុស្សនៅប្រទេសចិន។
លោកស្ហៀរ៉ាក់ បង្ខិតប្រទេសបារាំង ឲ្យចូលជិតប្រទេសចិន ប៉ុន្តែ ក៏មិនភ្លេចជប៉ុន ដែលលោកសរសើរ កោតស្ញប់ស្ញែងជាពិសេស។ ស្រឡាញ់ ចូលចិត្ត កីឡា Sumo អតីតប្រធានាធិបតីបារាំង ធ្វើដំណើរជាញឹកញាប់ ក្នុងលក្ខណៈឯកជន ដើម្បី ទៅមើលការប្រកួតកីឡា Sumo នៅទីក្រុងតូក្យូ។ ការដាក់បញ្ចូលគ្នារវាងក្រុមហ៊ុនផលិតរថយន្ត បារាំង Renault ហើយនិងក្រុមហ៊ុននីសាន់របស់ជប៉ុន សព្វថ្ងៃ ជាស្នាដៃប្រឹងប្រែងមួយនៃនយោបាយការទូតរបស់លោកស្ហៀរ៉ាក់។
នៅពេលចូលនិវត្តន៍ ដកខ្លួនចេញពីនយោបាយ លោកស្ហៀរ៉ាក់ នៅតែមិនដកខ្លួនពីពិភពអាស៊ី។ នៅឆ្នាំ ២០០៦ លោកជាស្ថាបនិក បង្កើតសារមន្ទីរដែលមានឈ្មោះរបស់លោកផងដែរគឺ Quai Branly Jacques Chirac ជាទីដែលមានតាំងវត្ថុបុរាណ ស្នាដៃវប្បធម៌ មកពីអាហ្វ្រិក ដើមបូព៌ា និងអាស៊ីជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ