Amnesty International រិះគន់លើការប្រើកម្លាំងហួសហេតុរបស់ប៉ូលិសហុងកុងទៅលើបាតុករ
នៅថ្ងៃសុក្រ ទី២០ កញ្ញា អង្គការសិទ្ធិមនុស្សអន្តរជាតិ Amnesty International បានចេញផ្សាយរបាយការណ៍មួយស្តីពីស្ថានការណ៍នៅហុងកុង។ របាយការណ៍បានរិះគន់ចាស់ដៃលើប៉ូលិសហុងកុងដែលបានប្រើកម្លាំង និងវិធានការហួសហេតុបង្រ្កាបលើហ្វូងបាតុករអ្នកគាំទ្រប្រជាធិបតេយ្យហុងកុង។ Amnesty International បានបរិហារលើយុទ្ធសាស្រ្តមិនទំនង និងខុសច្បាប់របស់ប៉ូលិសហុងកុងដែលអាចជាករណីធ្វើទារុណកម្ម។ គួររម្លឹកថា អស់ជាច្រើនសប្តាហ៍កន្លងមកដែលសកម្មជនប្រជាធិបតេយ្យហុងកុងធ្វើបាតុកម្មទាមទារសិទ្ធិសេរីភាព និងប្រជាធិបតេយ្យ។ តែជាទូទៅ ក្បួនបាតុកម្មបានរងការវាយបង្រ្កាបយ៉ាងហិង្សាពីកម្លាំងប៉ូលិស។
ចុះផ្សាយនៅថ្ងៃ៖
ស្តាប់ - ០២:១៧
របាយការណ៍របស់ Amnesty International បានធ្វើឡើងដោយផ្អែកលើចម្លើយសាកសួរជាមួយបាតុករប្រមាណជា ២០នាក់ដែលអ្នកខ្លះបានសម្រាកព្យាបាលក្នុងមន្ទីរពេទ្យនៅក្រោយការឃាត់ខ្លួន។ Amnesty International បានបញ្ជាក់ច្បាស់ៗនៅក្នុងរបាយការណ៍របស់ខ្លួនថា ប៉ូលិសហុងកុងបានប្រើកម្លាំង និងវិធានការលើកកម្រិតដែលមានចែងក្នុងច្បាប់ហុងកុង ឬច្បាប់អន្តរជាតិ។ « នៅក្នុងវិធានការបង្ការនឹងការសងសឹកវិញ កម្លាំងសន្តិសុខហុងកុងមិនញញើតនឹងប្រើយុទ្ធសាស្រ្តមិនទំនង និងខុសច្បាប់ប្រឆាំងនឹងពលរដ្ឋក្នុងពេលបាតុកម្ម » នេះជាការថ្លែងរបស់នាយក Amnesty International ប្រចាំអាស៊ីខាងកើតលោកនីកូឡា ប៊ីកឺលីន។
តាមលោកនីកូឡា ប៊ីកឺលីន យុទ្ធសាស្រ្តមិនទំនង និងខុសច្បាប់មានរាប់បញ្ចូលទាំងការចាប់ខ្លួនតាមអំពើចិត្ត និងការប្រើហិង្សាប្រឆាំងលើអ្នកឃាត់ខ្លួនដែលជារូបភាពធ្វើទារុណកម្ម។ Amnesty International បានយល់ស្របតាមការទាមទាររបស់ក្រុមបាតុករឲ្យបង្កើតគណៈកម្មការស៊ើបអង្កេតឯករាជ្យមួយស្តីពីឥរិយាបទរបស់ប៉ូលិសហុងកុង។ តែសំណើមួយនេះត្រូវបានរដ្ឋអំណាចហុងកុងបដិសេធ។ ដោយឡែក ប៉ូលិសហុងកុងបានឆ្លើយតបភ្លាមៗដោយច្រានចោលរបាយការណ៍របស់ Amnesty International និងបញ្ជាក់ថា ប៉ូលិសហុងកុងតែងមានការថ្លឹងថ្លែង និងអត់ធ្មត់នៅក្នុងការប្រើកម្លាំងរបស់ខ្លួន។ គួររម្លឹកថា តាំងពីខែមិថុនាដែលក្រុមបាតុករអ្នកប្រជាធិបតេយ្យហុងកុងបានផ្តើមបាតុកម្មប្រឆាំងនឹងសេចក្តីព្រាងច្បាប់របស់លោកស្រីការី ឡាំដែលគ្រោងធ្វើបត្យាប័នជនសង្ស័យហុងកុងទៅកាត់ទោសនៅចិនដីគោក។
តែឥឡូវនេះ និងក្រោយពីលោកស្រីការី ឡាំបានប្រកាសដកសេចក្តីព្រាងច្បាប់នោះចេញវិញមក បាតុករហុងកុងបានបន្តទាមទារនូវលក្ខខណ្ឌចំនួន ៤ ទៀតរួមមាន បើកការស៊ើបអង្កេតស្តីពីឥរិយាបទរបស់កម្លាំងប៉ូលិស លើកលែងទោសដល់បាតុករដែលបានចាប់ខ្លួន បញ្ឈប់ការហៅបាតុករថាជាកុប្បករ ឬអ្នកបះបោរ និងបង្កើតប្រព័ន្ធបោះឆ្នោតសកលសម្រាប់ជ្រើសរើសប្រមុខដឹកនាំហុងកុង។ គេបានសង្កេតឃើញថាជារួមថា ក្បួនបាតុកម្មបានបង្កប់ដោយអំពើហិង្សាយ៉ាងខ្លាំងក្លារវាងកម្លាំងប៉ូលិស និងបាតុករ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ