ប្រមុខដឹកនាំហុងកុងព្រមានអាមេរិកពីការលូកដៃចូលជ្រៀតជ្រែកនៅក្នុងវិបត្តិផ្ទៃក្នុងហុងកុង
នៅថ្ងៃអង្គារ ទី១០ កញ្ញា ប្រមុខដឹកនាំហុងកុងលោកស្រីការី ឡាំបានចេញមុខព្រមានអាមេរិកប្រឆាំងនឹងរាល់ការលូកដៃចូលជ្រៀតជ្រែកនៅក្នុងវិបត្តិហុងកុង។ លោកស្រីការី ឡាំបានថ្លែងយ៉ាងដូចនេះនៅក្នុងសន្និសីទកាសែតមួយដោយបញ្ជាក់បន្ថែមថា វាមិនសមរម្យទាល់តែសោះសម្រាប់ប្រទេសមួយដែលលូកលាន់នៅក្នុងកិច្ចការផ្ទៃក្នុងរបស់ហុងកុង។ ប្រតិកម្មខ្លាំងៗរបស់លោកស្រីការី ឡាំបានធ្វើឡើង បន្ទាប់ពីក្រុមបាតុករអ្នកប្រជាធិបតេយ្យហុងកុងបាននាំគ្នាធ្វើបាតុកម្មនៅពីមុខស្ថានកុងស៊ុលអាមេរិកាំងក្នុងទីក្រុងហុងកុងកាលពីថ្ងៃអាទិត្យ ទី៨ កញ្ញា។ គោលដៅនៃបាតុកម្មរបស់ពួកគេ គឺចង់ឲ្យសភាអាមេរិកាំងអនុម័តលើសេចក្តីព្រាងច្បាប់មួយសម្តែងការគាំទ្រចំពោះចលនាគាំទ្រប្រជាធិបតេយ្យហុងកុង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៤
គេនៅមិនទាន់ដឹងចម្លើយរបស់អាមេរិកចំពោះការទាមទារចង់បានរបស់ក្រុមបាតុករអ្នកប្រជាធិបតេយ្យហុងកុងនៅឡើយទេ។ អ្វីដែលគេអាចនិយាយបាន ប្រមុខដឹកនាំហុងកុងលោកស្រីការី ឡាំបានចេញមុខព្រមានត្រង់ៗថា សេចក្តីព្រាងច្បាប់ណាមួយរបស់អាមេរិកដែលសំដៅលូកដៃនៅក្នុងកិច្ចការផ្ទៃក្នុងហុងកុងនឹងធ្វើឲ្យប៉ះពាល់ដល់ទំនាក់ទំនងពិសេសរវាងអាមេរិក និងហុងកុង។ ទំនាក់ទំនងពិសេសដែលលោកការី ឡាំចង់និយាយ គឺទំនាក់ទំនងសេដ្ឋកិច្ចដែលលោកស្រីយល់ថា បើមានការផ្លាស់ប្តូរណាមួយនៅក្នុងទំនាក់ទំនងពិសេសរវាងអាមេរិក និងហុងកុងជះផលវិបាកដល់ភាគីទាំងពីរ។
ប្រមុខដឹកនាំហុងកុងរូបនេះដដែលបានបន្ថែមដោយសង្ឃឹមថា គ្មានមនុស្សណាទៀតនៅហុងកុងនឹងបន្តទាមទារសុំឲ្យអាមេរិកអនុម័តច្បាប់មួយដែលសំដៅត្រួតពិនិត្យលើការអនុវត្តច្បាប់របស់រដ្ឋអំណាចហុងកុងទេ។ គួររម្លឹកថាមកទល់ពេលនេះ មានសមាជិកសភាអាមេរិកាំងពីគ្រប់និន្នាការនយោបាយបានសម្តែងការគាំទ្រចំពោះចលនាអ្នកប្រជាធិបតេយ្យហុងកុង។ ចំណែករដ្ឋបាលអាមេរិករបស់លោកដូណាល់ ត្រាំដែលកំពុងមានសង្រ្គាមពាណិជ្ជកម្មជាមួយចិនបានអំពាវនាវឲ្យមានដំណោះស្រាយដោយសន្តិវិធី និងបញ្ជាក់ជាថ្មីពីកាតព្វកិច្ចរបស់ចិនដែលត្រូវដោះស្រាយវិបត្តិមួយនេះ។
គួរបញ្ជាក់ថា ចិនធ្លាប់បានចោទអាមេរិកពីបទបានគាំទ្រក្រុមបាតុករអ្នកប្រជាធិបតេយ្យហុងកុង ហើយអាមេរិកក៏ធ្លាប់បានច្រានចោលលើការចោទប្រកាន់នេះ និងបានទាមទារឲ្យចិនបង្ហាញភស្តុតាង។ តែចិនមិនបានបង្ហាញភស្តុតាងជាក់ស្តែងអ្វី ក្រៅពីសេចក្តីថ្លែងការណ៍គាំទ្របាតុករហុងកុងរបស់ឥស្សរជននយោបាយអាមេរិកាំងទេ។ សូមរម្លឹកថា តាំងពីខែមិថុនាដែលក្រុមបាតុករអ្នកប្រជាធិបតេយ្យហុងកុងបានផ្តើមបាតុកម្មប្រឆាំងនឹងសេចក្តីព្រាងច្បាប់របស់លោកស្រីការី ឡាំដែលគ្រោងធ្វើបត្យាប័នជនសង្ស័យហុងកុងទៅកាត់ទោសនៅចិនដីគោក។ តែគេសង្កេតឃើញថា ទោះបីជាលោកស្រីការី ឡាំបានព្យួរ និងបានប្រកាសដកសេចក្តីព្រាងច្បាប់នោះចេញវិញក៏ដោយក៏ក្រុមអ្នកប្រជាធិបតេយ្យមិនបញ្ឈប់បាតកម្មដែរ។
នៅមានលក្ខខណ្ឌចំនួន ៤ ទៀតដែលប្រជាជនហុងកុងបន្តទាមទារពេលនេះ ទី១ បើកការស៊ើបអង្កេតមួយស្តីពីទង្វើ ឥរិយាបទរបស់កម្លាំងប៉ូលិស ទី២ លើកលែងទោសដល់បាតុករដែលបានចាប់ខ្លួន ទី៣ បញ្ឈប់ការហៅបាតុករថាជាកុប្បករ ឬអ្នកបះបោរ និងទី៤ បង្កើតប្រព័ន្ធបោះឆ្នោតសកលសម្រាប់ជ្រើសរើសប្រមុខដឹកនាំហុងកុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ